Und nach dem bißhero im Rechten / offtmals die Beysitzer / durch etlich Partheyen / etwo vilmehr / auß tragender Hitz / dann genuegsamb gegründter Vrsachen / für verdächtlich angefochten / vnd auß dem Ring auffgefordert worden / daß dann nicht allein ihnen Beysitzern / sondern auch dem Gericht selbst / schimpflich vnd verklienerlich / auch den Rechten vnd Partheyen ein verlengerung ist / so sollen nun hinfüro dergleichen vngnuegsame muhtwillige aufforderungen gäntzlich abgestelt / vnd kein Beysitzer / es seyen dann genuegsame Vrsachen verhanden / auffzufordern oder ichtes derhalben zuvermelden / gestattet werden / Da aber je ein Parthey / jemandt derwegen Sprüch nicht erlassen vnd genuegsame vrsachen der verdächtigkeit fürzubringen hette / solle derselben die auffforderung nicht verbotten sein / doch daß dieselb Parthey stracks die vrsachen / seiner verdächtigkeit außführe / darüber dann alßbaldt erkennt / vnd was recht ist / ergehen solle.

Gleicherweiß soll es dißfalls / mit dem Herrn Landtshauptman vnd Herrn Landtsverweser / da sich jemandt wider sie ainiger verdächtligkeit beschwärn / oder aufffordern wolte / allerdings gehalten vnd verstanden werden.

Der Schrannenschreiber / soll seinem Ampt / mit vleissiger versorgung / aller Acten vnd Briefflichen Vrkunden / so zu Gericht eingelegt werden / vorstehen / vnd den Partheyen so vor disem Gericht zu handlen haben / förderliche Expedition mit aller beschaidenhait vnd gutem glimpffen / für sich selbst / vnd durch seine Cantzley Personen eruolgen lassen / die Partheyen an ihrem Rechten / souil an ihme sein wirdt / nicht verkürtzen / oder verabsaumen / auch derselben Acta vnd Brieffliche Vrkunden in vleissiger verwahrung vnd gehaimb haben / darzu sich auch / tauglicher guter Schreiber befleissen / wie solches sein nachfolgende Aidtspflicht / mit mehrerm mit sich bringt.

Ich N: gelob vnd schwör / daß ich dem Herrn N: Landtshauptman in Steyr / an statt deß Allerdurchleuchtigisten Großmechtigisten vnd Vnüberwindtlichisten Fürstens vnd Herrns / Herrns Ferdinanden deß Andern / erwöhlten Römischen Kaysers / auch zu Hungern vnd Böhaimb Königs / Ertzhertzogens zu Oesterreich / Hertzogens zu Steyr / etc. Vnsers allergenedigisten Herrn vnd Landtsfürstens / auch dem Herrn Landtsverweser / darzu einer Ersamen Landtschafft / mit solchem Schrannenschreiber Ampt / jederzeit getrew vnd gehorsamb sein / demselben mit schreiben vnd andern / meinem besten verstehen nach / fleissig vnd getrewlich außwarten / die Partheyen dem Armen als dem Reichen / vnd dem Reichen als dem Armen / mit den Zeugbrieffen vnd Abschieden befürdern / auch die Rahtschläg so vor Gericht / vnd den Herrn vnd Landtleuthen / vnd Beysitzern / in solchen Landts vnd Hoffrechten beschehen / Gleichsfals auch die Briefflichen Vrkunden / vnd andere der Partheyen eingebrachte Schrifften / in guter gehaimb vnd fleissiger Verwahrung halten / niemandts offenbahren / darzu keiner Parthey wider die ander rahten / noch von ainigem Vrthel vnd Abschied / darzu Briefflichen Vrkunden / so in dem Rechten ergehen / vnd eingebracht werden / Copeyen vnd Abschrifften wider alt herkommen / vnd wo derohalben die Partheyen strittig seyn / ohne erlaubnuß vnd erkandtnuß deß Gerichts / nicht geben noch zustellen / vnd in solchen allem nicht ansehen / weder Müeht / Gab / Schanckung / Gunst / Freundtschafft / Feindtschafft noch iechtes anders / in keinerley weiß / sondern daß alles handlen soll / vnd will / daß einem getrewen Diener vnd Schrannenschreiber zustehet / vnd von alters herkommen / ohne arglist vnd gefähr / Als mir Gott helff vnd sein heiliges Evangelium.

Gerichts Zeugbrieff deß Ersten Tags. 24. Pfen. Ladung. 24. Pfen. Für ein Gerichts Zeugbrieff / indifferenter. 2. ß. Gerichts Zeugbrieff deß Scherms. 2. ß. Vrkundtschreiben darauff. 2. ß. Gerichts Zeugbrieff der verkündung. 2. ß. Verkündtschreibung. 2. ß. Gerichts Zeugbrieff in welchem ein WeißArtickel einkombt. 3. ß. Da aber zween WeißArtickel inserirt werden. 4. ß. Commissions Befelch / sambt dem Einschluß. 3. ß. Compas per verschaffung der Zeugen. 2. ß. Compas per examinierung oder Schrifftlichen außsag / in welchen allzeit WeißArtickel eingeschlossen werden. 3. ß. GerichtsZeugbrieff der eröfneten Weisung. 2. ß. GerichtsZeugbrieff der Behöbnuß 1. fl. 4. ß. GerichtsZeugbrieff der Entbröchung. 1. fl. 4. ß. GerichtsZeugbrieff der Landtsfürstlichen declaration. 4. ß. GerichtsZeugbrieff der Expens. 6. ß. GerichtsZeugbrieff deß Ansatz. 1. fl. GerichtsZeugbrieff deß vernewerten Ansatz. 2. ß. GerichtsZeugbrieff der Einantworttung. 2. ß. GerichtsZeugbrieff deß Compas. 2. ß. Für das Compasschreiben. 2. ß. GerichtsZeugbrieff deß ersten Anbots. 2. ß. Anbottschreiben. 2. ß. Schätz Commission Befelch. 2. ß. Für einen gemainen Landtscherm. Da aber derselb lang ist / stehet es / bey deß löblichen Gerichts moderation. 3. fl. GerichtsZeugbrieff abgangs. 2. ß. Von einem Lehen Berueff. 1. fl. Meldtbrieff. 2. ß. Apostlbrieff. 4. ß. Vidimus. 1. ß. In appellationibus, für ein Blat. 1. ß. 2. Pfen. Insimili was sonsten abgeschrieben wirdt.. 24. Pfen. Rahtschlag. 1. ß. Befelch sampt der Copey. 2. ß. 24. Pfen. Bericht zu 4. ß. vnd 1 fl. darnach es viel mühe bedarff. Resolutions Abschrifft 1. ß.

Für gemaine Abschiedt / da nur die Klag / oder ein Vrthel einkombt. 2. ß. Abschiedt / mit Haupt: oder Gegenweiß Artickel / einfach 3. ß. Abschiedt / der lang vnd viel schreibens bedarff / wird nach denen Blättern bezahlt / für jedes. 24. Pfen. Abschiedt der Weisung 2. ß. Commissions Befelch sampt dem Einschluß. 3. ß. Compas per verschaffung. 2. ß. Compas per schrifftliche außsag der examinirung der Zeugen / da weißArtickel eingeschlossen werden / jedes. 3. ß. Abschiedt Schubs. 2. ß. Abschiedt der eröffneten weisung. 2. ß. Abschiedt der Behöbnuß. 1. fl. 4. ß. Abschiedt der Entbröchung. 1. fl. 4. ß. Abschiedt der Expens. 1. fl. Abschiedt deß Ansatzs. 1. fl. Abschiedt vernewerten Ansatzes. 2. ß. Abschiedt Ersten Anbots. 2. ß. Anbottschreiben. 2. ß.

Gleichermassen sollen die Secretarij vn[d] Gerichtsschreiber / bey der Landtshauptmanschafft geschworn vnd verpflicht seyn / die Partheyen in ihren handlungen zubefürdern / ihrem Ampt fleissig vnd getrewlich vorzustehen / auch niemandt wider die gebür / mit Tax zu beschwären / gegen mennigklich dermassen sich vnverweißlich vnd gebürlich zuverhalten vnd zuerzaigen / damit niemandt in seinen Rechten vnd handlungen durch sie verkürtzt oder auffgehalten / sondern fürderlich expedirt werde / vilweniger solle er ainiger Parthey ihre handlungen wider die ander führen / wie in gleichem auch von denen Partheyen keine Bestallungen annehmen / ihnen in ihren Sachen nicht Rahtsamb seyn / noch auch sich gegen ihnen mit den Schrifften machen, einlassen.

Für einen ExpensAbschiedt. 2. ß. Für einen WeisungsAbschiedt. 2. ß. Für ein Behöbnuß. 1. fl. 4. ß. Für ein declaration, so in Landtshauptman: vnd Votzdombischen Verhören ergangen. 4. ß. Vmb ein Compas. 4. ß. Vmb ein Blat in weisungs Sachen. 24. Pfen. In Appellations Sachen. 1. ß. 2. Pfen. Vmb ein Fürforderung in das Hoffrecht. 4. ß. Vmb ein Befelch. 2. ß. 24. Pfen. Vmb ein gemainen Bericht. 2. ß. 24. Pfen. Vmb einen langen außführlichen Bericht / von ein: biß in zween vnd mehr Gulden / nach moderation deß Herrn Landtshauptmans.

Ich N. gelob vnd schwör an statt der Röm: Kays: auch zu Hungern vnd Böhaimb Kön: Mayest: Herrn Herrn Ferdinanden Ertzhertzogen zu Oesterreich / vnsers allergenedigisten Herrn vnd Landtsfürstens / etc. Dem Herrn / Herrn N: Landtshauptman in Steyr / mit disem meinem angenombnen Ampt / jederzeit / getrew vnd gehorsamb zusein / demselben meinem besten verstehen nach / fleißig vnd getrewlich außzuwarten / die Partheyen dem Armen als dem Reichen / vnd dem Reichen als dem Armen / in ihren Rechtssachen / vnd andern handlungen / auffs beste befürdern / auch niemandt wider die gebür / mit dem Tax beschwären / die Rahtschläg so vor Gericht / oder andern versamblungen von Herrn vnd Landtleuthen / Landträthen vnd Beysitzern beschehen / gleichsfals auch die Briefflichen Vrkunden / vnd andere der Partheyen eingebrachte Schrifften / in guter gehaimb vnd fleissiger verwahrung halten / niemandts offenbahren / darzu keiner Parthey wider die ander nit rathen / noch von ainigen Briefflichen Urkunden / so eingebracht werden / Copeyen vnd Abschrifften wider alt herkommen / vnd wo die Partheyen derhalben strittig seyn / ohne erlaubnuß vnd erkandtnuß nicht geben / noch zuestellen / vil weniger einer Parthey ihre Handlungen wider die andere führen / auch von den Partheyen keine Bestallung annehmen / vnd in solchem allen nicht ansehen / weder Müeht / Gab / Schanckung / Gunst / Freundtschafft / Feindtschafft / noch jechtes anders in keinerley weiß / sondern daß alles handlen / soll vnd will / daß einem getrewen Diener vnd Secretario zustehet / vnd von alters herkommen ist / ohne arglist vnd gefähr / Als mir Gott helff / vnd sein heiliges Euangelium.

Ob aber ein Landtman Weltliches Standts, selbst oder ein Freundt dem andern sein notturfft in Rechten reden wolte das solle mennigklichen der Ordnung nach vergunt seyn.

Brächt einer einen frembden Redner zu dem Rechten / der sol nit gehört werden, er habe dann ehe wie die andern geschworen / vnd alsdann mag er seiner Parthey reden wie die andern.

Ob man aber geschworne Redner nicht möchte gehaben, vnd ime doch einer sein notturfft selbst nicht fürbringen / auch seiner Freundt keinen darzu erbitten kundte / so soll ihme der Herr Landtshauptman oder Herr Landtsverweser / einen auß dem Ring verschaffen / vnd derselb mit deme es also verschafft würde / soll sich der sach keineswegs setzen oder widern / sondern den grundt der sachen / mit dem kürtzisten fürbringen / vnd zu recht setzen / wie obstehet.

Wer von einer Geistlichen Person / Jungkfrawen oder Wittib / Klag oder Antwort / am Gerichtsstab vbernimbt / dem soll kein Stewrer mit recht erkennt noch zugelassen werden / sondern allein der / so die Sachen also vbernehme / wer es auch ein Geistliche Person / so mag er auch einen Stewrer haben / wie von alters herkommen ist.

Es soll auch sonst niemandt Stewrer haben / es werde ihme dann mit Recht erkennt / aber der Hauptsacher mag wol allein neben seinem Redner oder Vbernehmer stehen / vnd den vnterweisen / ob sich aber sonst einer wider den andern zustewren vnterstunde / vnd das / so es ihme vom Herrn Landtshauptman oder Herrn Verweser / auff der wider Parthey anruffen / verbotten wurde / nicht vnterließ / solle derselb Stewrer / dem / darwider er also stewert / was er der Sachen schaden nehme / ablegen vnd bezahlen.

Wo aber jemandt von ainiger parthey / zu einem Stewrer begehrt / sich aber derselb dessen auß billichen rechtmässigen vrsachen / waigern / oder derwegen strittig wurden / so soll auch solche waigerung vnd fürgefallner stritt / ob sie genuegsamb oder nicht / jederzeit bey deß Gerichts erkandtnuß stehen / vnd darüber die gebür gehandlet werden.

Wiewol in der alten Ordnung / die Sollicitatorn vnd Gewalttrager vmb gewisser vrsachen willen / gäntzlichen abgeschafft vnd verbotten worden / mögen jedoch vngefähr souil Sollicitatores allhier gehalten werden / souil Procuratores zu halten / oben geordnet worden / doch daß zu solchen Sollicitatorn Erbare Vnverleimbde vnd zu solchem Ampt / taugliche Leuth angenommen werden / vnd ein jeder so sich dises Diensts zu vnterwinden begehrt / sich zuuor bey dem Herrn Landtshauptman anmelde / von demselben auff vorgangnen Bericht / seines thun vnd lassens / qualiteten vnd tauglichheit zugelassen / auch mit der hierunder gesetzten Aidtspflicht beladen / ohne solche approbation vnd Beaydigung aber / keinem das Sollicitiren / weder inner: noch ausser Gericht zugelassen werden.

Ich N: gelob vnd schwöre / daß ich dem Allerdurchleuchtigisten Großmächtigisten vnd Vnüberwindtlichisten Fürsten vnd Herrn / Herrn Ferdinanden dem Andern / erwöhlten Römischen Kaysers / auch zu Hungern vnd Böhaimb Königs / Ertzhertzogen zu Oesterreich / vnd Hertzogen zu Steyr / etc. Meinem allergenedigisten Herrn vnd Landtsfürsten / vn[d] an statt Ihrer Kays: Mayest: dem Herrn Landtshauptman / vnd Herrn Landtsverweser in Steyr / oder hernach einem jeden künfftigen Herrn Landtshauptman / so zur zeit sein würdet / gewärtig vnd gehorsamb sein / sein ordnung / geschäfft / vnd gebott halten / auch wider einer Ersamen Landtschafft Freyheiten / Landtshandvest / Gerichtsordnung vnd Landtsbrauch / wissentlich nicht handlen / die Partheyen vnd Sachen/ so ich annimb oder mir befohlen werden / mit gantzen vnd rechten trewen / mainen / vnterweisen / ihr Gerechtigkeit / nach meinem besten fleiß vnd verstandt / fürbringen / rahten vnd handlen / darinnen wissentlich keinen falsch / vnrecht / oder verlängerung gebrauchen / noch suchen / mit denen Partheyen keinerley Vorwort / oder fürgeding / vmb ainigen thail / wenig oder viel / an den Sachen / machen / haben / oder gewarten / die haimlichen Räht vnd Behelff / meinen Partheyen zuschaden / niemandts öffnen / das Gericht vnd GerichtsPersonen / allzeit ehren vnd fürdern / auch vor ihnen Erbarkeit gebrauchen / die lästerung / bey Peen / vnd ermässigung deß Gerichts / vermeyden / die Partheyen mit vnzimblichen Belohn: vnd Bestallungen nicht beschwären / der Sachen so ich angenommen / oder mir befohlen worden / ohne redliche vrsachen / vnd deß Richters erlaubnuß / mich nicht entschlagen / sondern biß zum end deß Rechtens außwarten / vnd sonst alles anders handlen / thun vnd lassen will / was sich von Rechts vnd deß Landes Gewohnheit wegen / gebürt / Trewlich vnd Vngefährlich. Als war mir Gott helff / vnd das heilig Evangelium.

Der geschworne Weißbott / vnd sein Adjunct / sollen ihrem Ambt fleissig außwarten / vnd im Rechten niemandts / als ihnen selbst reden / damit sie auff die / so wider dise Ordnung theten / desto besser sehen mögen / wie dann solches ihr nachfolgende Amtspflicht vermag.

Ich N: gelob vnd schwör / dem Herrn Landtshauptman in Steyr / an statt deß Allerdurchleuchtigisten Großmächtigisten vnd Vnüberwindtlichisten Fürsten vnd Herrns / Herrn Ferdinanden deß Andern / erwöhlten Römischen Kaysers / auch zu Hungern vnd Böhaimb Königen / Ertzhertzogens zu Oesterreich / Hertzogens zu Burgund vnd Steyr / etc. Vnsers allergenedigisten Herrn vnd Landtsfürstens / Daß ich das mir befohlne / vnd aufferlegte WeißbottenAmpt / jederzeitt trewlich vnd gehorsamlichen / wie von alters herkommen / verrichten dem wolernenten meinem genedigen Herrn Landtshauptman / oder einem jeden Herrn Landtshauptman / vnd Herrn Landtsverweser / auch Verwaltern der Landtshauptmanschafft / so der zeit sein würdet / auch den Herrn Beysitzern / deß Landts: vnd Hoffrechtens / auch sonst dem Herrn Marschalchen in Landtägen / dann denen Herrn Verordenten / in Namen einer Ersamen Landtschafft / in allen sachen / jederzeit gewärtig / vnd gehorsamb seyn. Darzu einer Ersamen Landtschafft / oder der Herrn vnd Landtleuth Rahtschläg / vnd Gehaimbnussen / nicht offenbahren / sondern verschweigen / biß in mein Gruben bey mir erhalten / im Rechten niemandts / allein mir selbst reden / mit denen Rechtenden Partheyen / von ainigem thail / oder gnueß / an den hangenden Rechtssachen / ainig geding / oder vergleich machen / noch die sachen durch Vbergab / Kauff / Tausch / Geschenck / fürgewendte verlag der handlung / noch ainige andere weiß / gar / oder zum thail an mich erhandlen / oder bringen / Item die Ansätz / vnd alles das / so mir mit Vrthel oder erkandtnuß der Herrn vnd Landtleuth / von offt vnd wolernenten meinen genedigen Herrn / wird aufferlegt / auffs fleissigist vnd trewlichist / vnabsaumblich verrichten / auch in solchem allem nicht ansehen / weder Müeht / Gab / Schancknuß / Gunst / Forcht / Freundtschafft / Feindtschafft / noch jechtes anders / in gar keinerley weiß / sondern das alles handlen / soll vnd will / was einem getrewen Diener vnd Weißbotten / gewonheit vnd altem herkommen nach / zustehet vnd gebürt / ohne arglist vnd gefähr. Als war mir Gott helff / vnd das heilig Evangelium.

Vnd nach dem in examinierung / der Zeugen / so von den Partheyen / in ihren geführten weisungen fürgestellt / sonderlich aber mit den Commissarien / so etwo zu examinierung der Zeugen / benänt worden / man sie aber darzu nicht bewegen / oder bringen mögen / vnd dardurch maniche Parthey / mit der weisung lange zeit auffgezogen / vnd in ihrem Rechten verhindert worden / auch dahero allerley vnordnung vnd gefährliche auffzüg vnd verlengerung erschienen / derohalben / zu verhütung derselben / vnnd damit mänigklich zu fürderlichem vnd schleinigem Rechten geholffen / auch in sonderlicher erwögung / das nicht allein den Partheyen / an fleissiger notturfftiger examinierung vnd verhörung der Zeugen / sondern auch dem Gericht selbst / damit dasselb mit erkandtnuß vnd Vrthel / desto gewisser vnd gründtlicher verfahren möge / zum höchsten vnd gar viel daran gelegen / so sollen nun hinfüro / drey erfahrne vnd taugliche geschworne ZeugsCommissarien / von Landleuth / oder wo die darzu nicht zu bewögen / sonst andere Erbare / darzu geschickte personen / bestellt / vnd mit gebürlicher Besoldung / einer allhier zu Grätz / der ander in der obern Steyrmarck / vnd der dritte in der Graffschafft Cilli / vnterhalten werden / welche ZeugsCommissarien / nicht allein bey diser Landtschrannen / sondern allen andern gerichten / zu behörung der Zeugen / auff der Partheyen anrüeffen vnd begehrn / vmb ihr gebürliche belohnung / daruon hernacher Meldung gethan werden solle / gebraucht / deme als offt / zu examinierung der Zeugen / zween Landtleuth / oder andere Erbare / zu diser Sachen taugliche Personen / welche die Partheyen nach ihrem gefallen / darzu zubenennen haben / zugeordnet mögen werden / welchen Commissarien / jedem zu Jährlicher Besoldung / ainhundert Pfundt Pfenning / von einer Ersamen Landtschafft geraicht / vnd dann von jedem Zeugen insonderheit / den sie behören / 1. ß. vnd dann von einem ordenlichen Plat der Zeugen außsag / 3. kreutzer / durch ein jede Parthey / so die Zeugen zubehören fürstellt / bezalt werden.

Vnd da sie aber / von Grätz auß / vnd andern ihren ordinari Mallstatten / an andere Ort / sonderlichen da die Zeugen / auff den Augenschein geführt werden müssen / gefordert werden / so soll jedem für ein Zehrung vnd bemühung / einen jeden Tag / den er fünff oder sechs Meil Reitten würdet / als lang er außbleibet / vnd wider anhaimbs kombt / 12. ß geraicht / vnd bezahlt werden.

Gemeldte Commissarien / sollen also auff der Partheyen anrüeffen / vnd deß Herrn Landtshauptmans / oder Herrn Landtsverwesers befelch / mänigklich hierinn zugehorsamen / auch dieselben mitbehörung der Zeugen / souil müglich / damit sie daran nicht verabsaumbt / zubefürdern / schuldig seyn: vnd damit sie solchem ihrem Ambt / souil desto stattlicher außwarten mügen / solle mit befehlung anderer Sachen / von der mehrern Obrigkeit / ihrer / souil müglich / verschont werden.

Ich N: gelob vnd schwöre / Dem Allerdurchleuchtigisten Großmächtigisten vnd Vnüberwindtlichisten Fürsten vnd Herrn / Herrn Ferdinanden dem Andern / erwöhlten Römischen Kayser / auch zu Hungern vnd Böhaimb Königen / Ertzhertzogen zu Oesterreich / hertzogen zu Steyr / etc. Vnserm allergenedigisten Herrn vnd Landtsfürsten / vnd einer löblichen Landtschafft deß Fürstenthumbs Steyr / auch an statt Ihrer Kays: Mayest: dem Herrn Landtshauptman / vnd herrn Landtsverweser / getrew / gehorsam / vnd gewärtig zusein / das ZeugsCommissari Ambt meines thails / trewlich vnd auffrichtig zuversehen / die fürgestellten Zeugen so mir zuverhören / befohlen werden / auff die eingebrachten WeißArtickel / auch Fragstück / auff vorgehunde Beaydigung / mit allem fleiß zubefragen / ihr Außsag fleissig vnd ordenlich / mit allen zu der sachen dienstlichen vnd nohtwendigen vmbständen / zubeschreiben / vnd dieselben niemandt vor der Zeit zueröffnen / sondern in der gehaimb zuerhalten / keiner Parthey mehr / als der andern / wider die gebür zuzulegen oder anhengig zusein / vnd in dem allem / weder Müeht / Gab / Freundtschafft / Feindtschafft / Forcht / noch jechtes anders anzusehen / sondern gemainigklich / alles das zu thun / was einem auffrichtigen getrewen Diener gebürt. Als war mir Gott helff vnd sein heiliges Evangelium.

Vnd nachdem bißhero das Landt: vnd Hoffrecht / zugleich mit / vnnd durcheinander / wie etwo die Partheyen fürkommen / gesessen vnnd abgehandlet worden / darauß dann allerley vnordnungen erwachsen / so soll man nun hinfüro / als offt ein Tag vmb den andern vnterschidlich / die Landts: vn[d] Hoffrechtshandlungen / sitzen vnd abhandlen / damit dardurch die Partheyen / so in einem oder dem andern Rechten zuthun / vmb souil desto fürderlicher expedirt, auch eine für die ander nicht auffgezogen werde.

Vnd dieweil dann von den erkandtnussen im Hoffrechten / kein appellation zugelassen würdet / so soll der Herr Landtshauptman oder Herr Landtsverweser darneben / darauff bedacht seyn / die HoffrechtsSachen / sonderlich im anfang deß Rechtens / da mehrer anzahl der Herrn vnd Landtleuth beyeinander versamblet / abzuhandlen / vnd zu befürdern / auch den Ring vber die ordinari anzahl der Beysitzer / nottürfftigklich zuersetzen / vnd die Herrn vnd Landleuth / als viel deren vor der Schrannen beyeinander / bey hieuor auffgesetzter straff zuerfordern / damit also die erkandtnussen / desto stattlicher nottürfftigklich erwogen / vnd berahtschlagt werden mögen.

In gleichem solle auch der Landtshauptman / in Gewaltsachen die Verhören / in guter anzahl der Landträht vnd Landtleuth abhandlen / weil in denselbigen Gewaltsachen / die Appellationes gleichsfals hinfüro nicht sollen gestattet werden.

Der Herr Landtshauptman / oder Herr Landtsverweser / sollen mit fleiß verhüten / daß auff die / so dem Gerichtstab nicht vnderworffen seyn / kein Ladung außgehe / sondern allein vmb Sachen / die nach altem herkommen in dem Landtrechten zurechtfertigen gebüren: deßgleichen sollen sie vmb Sachen die in das Landtrecht nicht gehören / auch kein Ladung außgehen lassen / Wo aber einer solche ihre Ladung erlangt / so sollen doch dieselben Sachen / allweg auff der wider Parthey anruffen / an die Ort / dahin sie zu rechtfertigen gebüren / gewisen werden / darauff dann sonderlich den Procuratorn ihr fleissige achtung zu haben / vnd in disem fall ihre Partheyen notturfftigklich zu vnterrichten / vnnd zu weisen / ernstlich aufferlegt seyn soll.

Vnd soll keinem Bawersman / oder Vnterthan / so ein Grundtherrschafft hat / zugelassen sein / jemanden vor disen Rechten zubeklagen / weil ein jeder Herr vnnd Landtman / seinen Vnterthan / zu dem jenigen / dessen er fueg vnd recht hat / gütlich oder Rechtlich zuverhelffen / schuldig ist / aber vmb Grundt vnd Boden die einem aigenthumblich zugehören / mag ein jeder für sich selbst rechtlichen klagen / oder verantworten.

Die Herrn vnd Landtleuht / sollen bey ihren Dienern vnd Knaben / mit allem ernst darob sein / daß sie / dieweil man das Recht sitzt / vor der Thür bleiben / vnnd kein Vnzucht / Geschray / rauffen vnnd dergleichen vngebürliche Handlungen / am Landthauß / wie bißhero zu etlich mahlen beschehen / anfahen / sondern still seyn / Deßgleichen sollen auch alle andere / so im Rechten nichts zuthun haben / in der Schrannen niemandt mit iren Reden irren / welche aber vor der Schrannen sein / sie seynd Herrn vnd Landtleuht / Inwohner oder Außländer / was Würden oder Standts sie wöllen / sie haben allda zu Rechten oder nit / die sollen stillschweigen / vnnd ihre Händel allda nit außtragen / oder disputirn, allein was im Rechten mit Ordnung beschicht / sonderlich aber / zu erhaltung deß Gerichts / gebürlichen Reputation, vnd daß sie nit irr gemacht werden / soll das auff: vnnd niderspatzieren / in der Rechtstuben / bey mänigklich durchauß abgestelt seyn / sonder welcher bey dem der Rechten zuthun / oder sonsten gern darbey sein will / der soll vor der Schrannen still / vnd mit ruhe stehen / oder sich nidersetzen / Dann welcher darwider thet / dem / soll Herr Landtshauptman oder Herr Landtsverweser / alsbald durch den Weißbotten stillzuschweigen oder nider zusitzen aufferlegen / vnd wo jemandts darinn vngehorsamb sein wurde / der / oder dieselben / sollen nach erkandtnuß der Herrn vnd Landtleuht / so allda gegenwertig seyn / von stundan gestrafft werden.

Es soll auch ein jeder so klagt / oder sein verantwortung thut / ausserhalb deß Rings stehen / doch soll einem jeden Landman / so an dem Ring sitzt / zugeben sein / daß er vor der Schrannen / neben vnd vor seinem Procurator vnnd Gewaltstrager / stehen / sein notturfft fürbringen lassen / oder selbst thun / vnd alsdann sich wider nider setzen möge.

Der Weißbott soll auch in allweg / sein achtung darauff geben / daß der gemaine Mann / Diener oder Buben / so vor der Schrannen selbst nit zu handlen haben / bey dem Ofen vnd neben der Thür / sich enthalten / vnd nicht zuvorderst vnder die Landtleuht / ohne allen scheuch setzen / noch zu der Schrannen dringen / dardurch die Landtleuht vnnd andere Partheyen / in ihren Handlungen verhindert / daß sie zu der Schrannen nit kommen / noch mit ihren Procuratoren / von wegen der vmbstehenden / ihr notturfft reden: noch Bericht geben können.

Zu deme sollen auch die Procuratores oder ihre Diener vnnd Buben / vnter den Rechten / nit alle Tisch / zu ihrem schreiben in der Stuben / wie bißhero beschehen / einnemmen / sondern ihr Schreiberey dahaimb verrichten / auff das die Landtleuht vnd Partheyen / da sie dieselben zu dem vnterreden / vnnd anderer ihrer notturfft gebrauchen wöllen / daran durch sie nit verhindert werden.

Vnd nach dem sich auch bißhero / allerley vnordnungen vnd Confusionen, mit herauß nehmung der Partheyen Acta, vor Gericht zugetragen / also daß der partheyen vnnd Procuratorn Diener / in die Schrannen geloffen / vnd dieselben selbst herauß genommen / auch offt einer andern Parthey Sachen / mitgetragen / aber billich hierinnen ein mehrere ordnung vnd auffsehen zuhaben / vonnöhten / so soll hinfüro kein Parthey ihre Acta nicht selbst / sondern durch den geschwornen Weißbotten / zu Gericht einlegen / vnnd wider herauß nehmen / wo aber je der Weißbott nit zugleich verhanden / alsdann mag sie selbst solche mit aller beschaidenheit einlegen / vnd vom Schrannenschreiber herauß nehmen. Vnd soll hinfüro nit jederman / sonderlich den Knaben / gleichfals auch den Gewaltstragern / mit ihren seyten Wöhren / in die Schrannen zugehen / keines wegs gestattet werden.

Nachdem auch bißhero allerley vnordnung / mit dem fürkommen bey Gericht erschinen / so soll der Herr Landtshauptman / oder Herr Landtsverweser / sampt denen Herren vnnd Beysitzern / in allweg dahin bedacht seyn / das ein gleichheit hierinn gehalten / vnd nicht einer für den andern / auß Gunst fürgezogen / sonderlich aber / daß die Armen / Geistlichen / Wittfrawen / Jungkfrawen / vnnd Pupillen / auch Außländer / vnnd so weit von dannen / vnnd auff schwären Vnkosten vnnd Zehrung allhie ligen müssen / vor den Reichen / auch so nahend allhier gesessen / bedacht vnd befürdert werden / wie sie dann hierinn die beste beschaidenheit / gegen mänigklich / fürnemblich aber / nach gelegenheit eines jeden fürfallenden vnd obligenden ehehafften / zuhalten wissen werden.

Es soll auch künfftig niemandt / wie bißher beschehen / dem Schrannenschreiber / daß er diser oder jener Parthey Sachen / lesen soll / zuzuschreyen gestattet werden / sondern die Partheyen sollen ihre Acta einlegen / vnd alßdann der Herr Landtshauptman / oder Herr Landtsverweser / sambt den Herrn Beysitzern / was zuverlesen sey / befehlen.

Dieweil bißhero bey denen Gerichten / im Brauch erhalten worden / daß ein jeder Klager den Beklagten / vor der Klag / gütlich ersuchen: vnd abtrag der klagten Sachen / in der güte begeren müssen / welches dann an ihme selbst billich ist / damit dardurch die muhtwilligen Klagen vnter den Landtleuthen / souil möglich ist / verhütet vnd abgestellt werden.

Demnach soll es hinfüro noch also gehalten werden / nemblich / daß ein jeder Klager / den Beklagten / es sey vmb Erbschafft / Gewalt / oder andere dergleichen fürfallende Sachen / vor der Klag vmb abtrag oder vergleichung der begehrten anforderung / oder empfangnen schadens / es sey nun Mündt: oder Schrifftlich / kurtz / vnd ohne sondere grosse außführung / weiln es vnter andern / fürnemblich zuerhaltung guter ainigkeit beschicht / ersuche: ausser solcher ersuchung / mag der Antworter dem Klager die Täg benemmen / oder ihn der antwort entbrechen.

Da aber einer auff gütlich ersuchen / es betreffe gleich Gründt / Böden / Brieff / Sigl / Gewalt / Entwehrungen / oder andere Sachen / wie dasselbige etwo begehrt vnd gefordert werden möchte / zulaisten nicht schuldig zusein vermaint / sonder sich dahin gegen dem ersuchenden thail erbeut vnd erklärt / zwischen dem Rechten / mit ihme gütlich / Es seye gleich verbündt: oder vnverbündtlich / auß der Sachen reden vnd handlen zulassen / so solle der ersuchende thail / solch erbietten anzunehmen / vnd darauff der ersuchte / dasselb in einer kurtzen bestimpten zeit / vnd in allweg vor angehung solches Rechtens / ins werck zurichten / schuldig sein / damit der ersuchende thail / nit muhtwillig auffgezogen werde / sonder wo die güte nit statt hette / sein ersten Tag in negsthaltenden Rechten klagen möchte / wo aber der Klagende thail / solcher vom Beklagten angesetzter güttlicher handlung nit statt thun / sondern deren vnerwartet mit der Klag fortzufahren / sich vnterstehen wurde / so sollen dem selben auff deß gegenthails anruffen / nach gestalt der Sachen / entweders die Täg abgenommen werden / oder der Beklagte / für dasselbigmal / der Klag entbrochen sein.

Im fall aber einer / obgesetzter massen / ainist gütlich ersucht oder erinnert worden / vnd darauff kein Antwort gibt / oder sich der gütlichen handlung erbeut / aber hernacher dasselbige nit ins werck richtet / oder auch die einmal angestelte gütligkeit / vnuerfänglichen zerschlüge / so mag der ersuchende thail so dann / ausser ferrern ersuchen / wol klagen.

Dieweil in den Geltschuldtbrieffen gemainiglich / der gewohnliche Landtschadenbund / begriffen ist / darinn sich ein jeder mit sein selbst Gerichten verbünden thut / so mag ein jeglicher so dergleichen Schuldtbrieff hat / darinnen der Schadenbund nach lengs vergriffen ist / oder aber auffs kürtzist angezogen / für den Herrn Landtshauptman / oder Herrn Landtsverweser kommen / sich seiner Schulden / mit fürbringen deß Schuldtbrieffs beklagen. Darauff soll nun er Herr Landtshauptman / oder Herr Landtsverweser / dem Schuldner zuschreiben / vnnd befehlen / den Klager zwischen derselben Zeit / vnd deß nechstkom[m]enden Rechtens / vermög seines gegebnen Schuldbrieffs zubezahlen / vnd wo er das nit thete / soll alsdann der Glaubiger zum nechsten Rechten / nach vermögen deß Anlehens / der Hauptsumma / Interesse / vnnd genombner schäden / als viel er deren glaubwürdig beybringen mag / zufriden gestelt vnd nach Rath der Herrn vnnd Landtleuht / vermög vnd inhalt seines Schuldtbrieffs / vernüegt werden.

Gleichermassen soll es mit allen andern Geltschuldtverschreibungen / Verträg vnnd dergleichen Contract, sie haben ihren Vrsprung woher sie wöllen / da sie anderst liquidirte richtige Schulden worden / vnd der Schadenbundt darinn begriffen / gehalten / vnnd damit allerdings wie oben verstanden / verfahren werden.

Im fall aber dieselbige noch nit zu richtigen liquidirten Schulden worden / oder sie gleichwol richtig währen / vnd der Gegenthail wider ein solche Schuldtverschreibung oder Vertrag / so beym Landtschadenbundt auffgericht / gegründe einreden fürzubringen hette / dardurch er der bezahlung / oder vollziehung desselben / Rechtlichen entgehen vnnd enthäbt werden möchte / auch denselben Schuldtbrieff / Vertrag oder Contract zulehen / billich nit schuldig zusein vermainte / so mag er solches alsdann zu dem vorangezognen Landtrechten für Gericht bringen / darüber auch das Gericht zuerkennen schuldig sein. Aber frembde einträg / so den Schuldtbrieff / Vertrag oder Contract,nit angehen / noch demselben anhengig seyn / sondern nur andere ansprachen betreffen theten / die sollen allda mit nichten einzubringen gestattet / noch darauff gerichtet werden.

Vnnd soll dem Beklagten / ainige Appelation nicht zugelassen / noch auch der Klager von der mehrern Obrigkeit weder mit Schüben / noch in anderweg / zu verlengerung deß Rechtens / auffgezogen werden. Es wäre dann sach / das jemandt von gemainen Vatterlandts nutzen wegen / gebraucht wär / vnnd derohalben seinen Rechten weder Persönlich / noch durch einen Gewalthaber abwarten köndte / alsdann der Obrigkeit beuor stehen solle / nach billichen Dingen / einem solchen hilff zuerzaigen.

Aber der Klager da er will / mag er für mehrere Obrigkeit Appelliren, in ansehung er sich seines Rechtens nit / sonder allein der beklagte in seiner Verschreibung durch den Schadenbundt / begeben.

Was dann die jenigen Geltschuldtbrieff / oder andere Verschreibungen / so über Contract vnd dergleichen auffgericht worden / darinn der Landtschadenbundt / nit stünde / anbelangt / die sollen nach dem gemainen Landtsbrauch / im Landtrechten / zu Tägen geklagt werden.

Da jemandt seiner Gründt / Böden oder anderer Erb / Haab vnd Güter / mit Gewalt entsetzt / oder entwehrt würdt / so solle auff deß entwehrten anrueffen / nach laut der Landtshandvest / wie von alters herkommen / fürderlich nach Hoffrechts Recht / gehandlet / vnd so aber dieselben ein Jahr lang / vnbeklagt anstehen bliben / sollen die nachmals im Landtrechten klagt / vnd Gerechtfertiget werden.

Doch wann einer der Entwehrung / erst hernach erinnert / vnd dazwischen gleich die Jahrsfrist verstrichen / so solle ihm / als einem vnwissenden von der Zeit an / derselben beschechnen erinderung / innerhalb Jahrsfrist / im Hoffrechten / darumben klagen vnbenommen sein / aber mit der maß / daß derselb darzu thue / wie recht ist / daß er nemblich solcher entwehrung / erst nach verscheinung Jahr vnnd Tags erinnert worden.

Im fall aber / einem sein Klag / da er anders vor verscheinung Jahr vnnd Tags / ordenlich einkommen / vmb einiger vnordnung oder vbersehens willen / gefelt wurde / so stehet demselben beuor / widerumben von newen mit solcher Klag / wo schon Jahr vnd Tag fürüber gangen / im Hoffrechten zuverfahren / vnnd zuklagen / darauff dann was Hoffrechts Recht ist / erkennt vnnd gehandlet werden soll.

Alle die Gewält / so von den Landtgütern herrüren / es seyen klagende oder beklagte Beysitzer / solcher Landtgüter / Landtleuht oder nit / sollen anderst nit / als im Hoffrechten klagt / die Persönlichen Sprüch aber / vor eines jedwedern ordenlicher Instanz zu klagen obseruirt, vnd der Herrn Landtleuht Diener vnnd Vnterthanen / wegen gemainer fräuel vnnd Iniurien, oder anderer Personal Händel / nicht ins Hoffrecht gezogen / auch einer Ersamen Landtschafft Officier,da jemandts ihrer Personen / wegen begangner Frävelung vnnd Iniurien, auch Ambtsverrichtung halber / zu ihnen zusprechen hat / bey denen Herren Verordenten / sonsten aber / wann sie schulden / oder anderer vrsachen angesprochen werden / so wol als andere bey ihren Instanzen, beklagt werden.

Da aber ein Gewalt durch einen Pfleger / Diener / oder Vnterthan / beschicht / vnnd sich sein Herr auff das beschechne gütlich ersuchen / dahin erklärt / das solcher Gewalt / nit auß seinem befelch geschehen / sich auch an demselbigen Grundt / oder Ort / keines Iuris oder Gerechtigkeit anmast / so soll alsdann derselb / solchen seinen Diener / Pfleger oder Vnterthan / auff sein ferrer ansuchen / von stundan / vnd auffs lengist innerhalb vier Wochen / zu gebürlichem abtrag vnnd vergleichung / deß erwißnen Gewalts halber / halten / wo aber solches durch ine nit beschehe / sondern die Sach lenger auffziehen wolte / so mag alsdann der belaidigte ihne den Principaln selbst / vmb den ernenten Gewalt im Hoffrechten klagen / vnnd ob schon in mitler Zeit durch deß gegenthails auffzug / Jahr vnd Tag verstriche / soll ihme doch solches vnnachthaillig / vnnd dannoch im Hoffrecht zuklagen / zugelassen werden.

Weil aber bißhero auch / wegen der Gewält / so durch die Diener oder Vnterthanen beschehen / sehr viel vnd billiche beschwärungen fürkommen / in deme maniche Herrn vnnd Landtleuht / Geist: vnd Weltliche / mit den gestellten Dienern vnnd Vnterthanen / einen hohen vnd beschwärlichen Excess begehen / daß sie die jenigen / so von ihren Herren / zu erhaltung guter Nachtbarschafft / auff beschechnes ersuchen / gestellt werden / auch offtmals ehrliche Leuht / in vnleidenliche Gefängknuß werffen / mit speiß vnnd tranck vbel halten / vnd ehunder nit ledig lassen / sie vergleichen sich dann / nach ihrem gefallen / daß sie dann manichmahlen einen geringen Gewalt / so auß keinem vorsetzlichem muhtwillen beschehen / allzuhoch auffmutzen vnnd anziehen / vnd eben so hoch aestimirn / als gegen einem Herrn vnnd Landtman selbst: also das maniches gantzes vermögen / allein / gar Vnnachtbarlich / sondern auch Vnchristlich / vnd vnbillich ist.

Disem fürzukommen / ist für rathsamb geacht / wann ein Herr vnd Landtman seinem Pfleger / Diener oder Vnterthan / so einen Gewalt geübt hat / auff deß andern begehren stellen thut / soll es hinfüro bey desselben willen nit stehen / wie er den gestellten Diener oder Vnterthan / straffen / vnnd den Gewalt aestimirn wolle / sondern soll verbunden sein / (es sey dann sach daß es gütlich / ohne eines oder deß andern thails / sonderbare beschwärung / vertragen wurde / ) andere Herrn vnd Landtleuth / oder doch ehrliche Bidermänner / so nahendt alldort gesessen / doch daß dieselben Vnpartheyisch / vnd vnuerdächtig seyen / zuberuffen vnd erkennen zulassen / was der Verbrecher zu straff verfallen sey. Was dann durch solche Mittelsleuth erkennt würdet / bey deme soll es ohne alles appellieren, dingen / oder weiter fürbringen / verbleiben / vnnd der Verbrecher der erkandtnuß nachzukommen schuldig sein / jedoch da ein solcher dem belaidigten / zum abtrag gestellter Diener oder Vnterthan / sich alsbald gütlich / der gebür nach / zuvergleichen / anerbieten vnnd einstellen wurde / der belaidigte aber / solch sein erbieten nicht annemmen / sondern / sein begehrn garzu hoch spannen wolte / vnd auff solchen weg / nicht der Diener / sonder der / deme der Gewalt beschehen / zu ersetzung deß Vnpartheyischen Gerichts / vnnd desselben Vnkosten vrsach gebe / so solle es alsdann bey denen Vnpartheyischen Richtern stehen / vnd ihrer discretion vnd erkantnuß haimb gesetzt werden / welcher thail vnter den litiganten billich in angezognen Vnkosten / vnd in die Expens zuerkennen / oder ledig dauon zusprechen sey.

Es sollen auch dergleichen Gewält / weiln sie offt vnuerhofft / vnd nicht souil fürsetzlich / als auß nicht genuegsamb habenden bericht von denen Dienern oder Vnterthanen beschehen / nicht so hoch als gegen den Landtleuthen aestimirt, sondern nach billichen Dingen / vnd in erwögung aller vmbstände / vermittelt werden. Wie dann auch kein Ehrlicher Mann / als Burger / Schaffer / Pfleger / oder andere Diener / es seyen dann die Verbrechen so groß / daß sie auch solcher straff billichen währt wären / sollen Carcerirt oder in Gefängknuß geworffen / sondern inn allweg respectusPersonarum obseruirt werden.

Wann aber / durch einen Bestandtman / jemanden ein Gewalt erwisen würdet / so soll derselbe Bestandtman / darumben gütlichen dahin ersucht werden / innerhalb vierzehen Tagen / sich zuerklären / ob er für sich selbst / oder aber der Aigenthumber / deß bestandtguts / solchen Gewalt zuuersprechen habe / beschicht nun solche erklärung / auff deß Bestandtsmans aigne Person / so solle derselbe bey seiner ordenlichen instantz darumben klagt / im widrigen / vnnd da er sich entschuldiget / vnnd das solchen Gewalt der Aigenthumber zuversprechen habe / sich erklärt / so solle alsdann derselbe darumben gütlich ersucht / auch darnach beklagt werden. Im fall aber der Bestandtman / auff berürtes gütlich ersuchen / in den bestimbten vierzehen Tagen / gar nit antworten / noch sich erklären wurde / solle es alsdann dahin verstanden werden / daß er für sein Person wegen deß Gewalts red / vnd antwort zugeben / vnd zurecht zustehen schuldig seye.

Damit aber die vnbefuegten / vnnd vnbillichen Gewält vnnd Entwehrungen / welche sich je lenger je mehr / vnter den Landtleuthen / vnd andern Partheyen / zutragen / vnd einreissen wöllen / vmb souil desto mehr verhüet / gewehrt / vnd abgestelt / auch souil müglich / gute ruhe / fried / vnnd ainigkeit erhalten / vnd aller vnrath / haß vnd schwirigkeit / so darauß erwachsen / vermitten werde / demnach soll gegen einem jeden Herrn vnnd Landtman / welcher seines geübten Gewalts vnbefuegt befunden / vnd mit erkandtnuß der Herrn vnd Landtleuht / dem Beklagten in abtrag erkennt würdet / durchs Gericht mit der Tax / ernstlich vnd nottürfftigklich / ohne alle verschonung / verfahren werden / also daß er nit allein / dem belaidigten / vmb solchen erwißnen Gewalt / nach gelegenheit desselben / ernstlich vnd andern zum Exempel / daß dann zu billicher vnd vernünfftiger erkandtnuß der Herrn vnd Landtleuht / stehen solle / nemblichen den wenigsten vmb 50. fl. 100. fl. vnd mehr / alles nach gelegenheit deß Gewalts / sonder auch die aufferloffen Expens vnd Vnkosten / nach Gerichtsmässigung / zubezahlen schuldig sein solle.

Vnd zu noch mehrer abstellung / solcher vnbefuegten Gewält vnnd Pfandtungen / ist insonderheit bedacht worden / woferr das Gericht befindet / daß jemandt ein wissentlichen fräventlichen Gewalt vnd Pfandtung begangen / daß derselb noch vber alle hieobangezaigte Taxierung deß Gewalts vnd eingelegten Vnkostens / welcher der erhaltenden Parthey eingehet / noch darzu nach gelegenheit deß erwißnen Gwalts / mit erkandtnuß der Herrn vnnd Landtleuht / auff das geringist per 100. Ducaten gestrafft / vnnd solche straff zum gemainen wesen / als den Landtgebäwen / mit deß Herrn vnd Landtsfürsten vorwissen / angelegt sollen werden. Welcher aber die erkandte straff / auß vnuermügen nit zuerlegen hat / der solle ein zeitlang auff der Hauptmanschafft / in der straff enthalten werden.

Gleichermassen / soll es gegen denjenigen / so mit vnnohtwendiger vnbefuegter Klage befunden vnd vberwunden / gehalten / vnd derselben inn Taxierung der Expens, gleich so wenig verschont / sonder ernstlich verfahren werden / damit solch muhtwillig Klagen / auch souil müglich verhüet / vnnd das Recht dardurch abgekürtzt werde.

Nachdem aber bißhero / zu mehrmahlen fürkommen / dass die Procuratores im Hoffrechten / neben den Gewälten vnd Entwehrungen in den Klagen / das Aigenthumb eingemengt / welches doch dem Hoffrechten vnd altem herkommen zuwider / so sollen nun hinfüro die Partheyen / vnnd deroselben Procuratores dahin bedacht seyn / daß sie in stellung ihrer Klagen / im Hoffrechten / das Aigenthumb / oder andere handlungen / so kein Gewaltssachen / oder Posseß betrifft / vnnd daher zu rechtfertigen nicht gebüren / mit nichten einmengen / sondern allein was dem klagten Gewalt vnd Entwehrung anhengig / darinnen anziehen / vnnd also das Hoffrecht / von Landtsrechten / so uil müglich / vnterschaiden.

Vnd welcher im Hoffrechten / durch erkandtnuß / ein Behöbnuß erlangt / vnd dieselb Klag vnd Behöbnuß / ein Entwehrung eines ligenden Guts betrifft / so soll dem Klager / oder desselben Gewaltstrager / auff sein anrueffen / alsbaldt in denselben wehrenden Hoffrechten / darinn solche behöbnuß erkennt worden / der Weißbott verschafft werden / jhme dasselb entwehrte ligende Stuck oder Gut / als weit sich die Behöbnuß erstreckt / durch den Ansatz widerumb in sein Posseß vnnd Gewehr einzuantworten / alsdann soll Klager zu den nechsten Rechten / sein Expens vnd was er für schaden / deß entwehrten Guts halber genommen / specificirt einlegen / darüber dann die Tax durch das Gericht / nach Schrannengebrauch / vnd alten herkommen / fürgenommen / vnnd die bezahlung / wie in dem Artickel der Expens halber / angezogen / verschafft werden.

Welche Behöbnuß aber / nicht Entwehrung / oder Entsetzung ligender Gründ vnd Güter / sonder fräuentliche Eingriff vnd Gewält / die einem Landtman auff seinen Gründen / vermessenlich zugefüegt werden / oder daß einer dem andern / etwas ab seinen Gründen gewaltigklich hinwegk nimbt / oder nehmen last / belangen / darüber / vnd in denselben Fällen / soll es hinfüro also gehalten werden / nemblichen / wann ein Klager zu einer solchen Behöbnuß kommen ist / so soll er zum nächsten darnach folgenden Rechten / dieselb Behöbnuß / sambt seiner Expens vnd aestimation, was er vmb abtrag vnd schaden begehrt / vnterschidlich verzeichnet fürbringen / darauff dann die Taxierung / wie obvermeldt / durch das Gericht fürgenommen / vnnd darüber was Hoffrechts Recht ist / gehandlet werden soll.

Doch solle dem Beklagten beuor stehen / wann jemandts im Hoffrechten ein Behöbnuß wider ihne erlangt / ob er alsbaldt inn selben wehrenden Rechten / in die Taxierung der Expens, zu verhüetung mehrers Vnkostens / verwilligen wölle / darauff dann der Klager auff die Expens zuuerfahren schuldig sein solle.

Da sich aber der Beklagte erbeut / die Taxierte Expens von stundan zu Gericht zuerlegen / oder aber dem Klager stracks zubezahlen / so soll er sich derselben keines wegs verwidern / sondern sie anzunemmen schuldig sein.

Die Berüff / so der ordnung nach / ergangen / sollen im nächsten Rechtstag darnach / an welchem man sitzt / vor allen dingen nacheinander gerechtfertiget werden / Es soll auch in einer Action vber ein Berueff zugehen / nicht gestatt / sondern beyde thail einer so wol als der ander / darmit gebunden sein / also da der jenig / so den Berueff ergehen lassen / nach endung desselben / vor Gericht nicht erschine / so mag der ander / wider den derselb Berueff ergangen / eben so wol denselbigen rechtfertigen / vnd vmb Behöbnuß oder Entbröchung auff sein aussen bleiben / bey Gericht anruffen / damit alle verlengerliche auffzüg / souil müglich verhütet / vnd abgestelt werden.

Nachdem auch vor Gericht Mißbrauch / zu mehrmahlen erschinen / da baide Thail Klager vnd Antworter vor Gericht gewest / vnd ein thail etwo fürkommen wöllen / auch sein notturfft vor Gericht verlesen lassen / daß alsdann der Gegenthail / da es ihme fürzukommen nicht gelegen / zu der Thür hinaußgegangen / vnnd den Berueff wider ihne fürsetzlich gehen lassen / vnd aber solches nit allein ein Pur lautterer auffzug / sondern auch ein verschimpffung deß Gerichts ist / So soll solches nun hinfüro auch gäntzlichen abgestelt / vnnd da baide Thail vor Gericht zugegen / so seyn sie auff eines oder deß andern thails anruffen fürzukommen schuldig / vnnd soll keinem thail also vor Gericht zu der Thür hinauß zugehen / vnd das Gericht dardurch zuuerschimpffen gestatt / jedoch wo einer nicht gefast wäre / vnd desthalben die vrsach fürzubringen hette / soll es zu entschaidung deß Gerichts gestelt werden.

So einer vmb Recht anruefft / im Landt vnd Hoffrechten / vnd der Antworter nit entgegen ist / so soll auff desselben begehrn / dem Antworter / durch den Geschwornen Weißbotten / zu dreymahlen geruffen werden / daß er komb vnd verantworte die Klag / vnd nach gethanem berueff / soll ein jeder warten denselbigen Tag / vnnd den andern halben Tag darnach / so man zu Gericht sitzt / wo aber ein Feyertag oder mehr darzwischen wären / soll doch nur der Tag daran man Gericht sitzt / darfür verstanden werden / vnnd weil zuuor beym 18. Artickel geordnet / daß man einen Tag vmb den andern Hoff: vnd Landtsrecht Sachen handlen soll / so soll der beschechne Berueff / da es im Hoffrechten / biß auff nächsten HoffRechtstag / vnd also auch in LandtrechtsSachen / verstanden werden. Darnach mag ein jeder / so ferr der Antworter nit kombt inn antwort / vmb behöbnuß anruffen / die soll ihme auch mit Recht erthailt werden / wo aber ein Berueff ergieng / vnd das Recht / ehe derselb die obgemelt Zeit erraicht hette / außgesessen wolt werden / so soll einem jeden zugeben sein / ehe solch Recht außgesessen würdet / denselben Berueff zu rechtfertigen / vnd vmb die Behöbnuß oder Entbrechung anzurueffen / die soll ihme auch mit Recht erfolgen. Doch soll das Gericht dahin bedacht sein / wann das Recht nahendt am Ort / vnd schier außgesessen wolt werden / daß man die Berüeff / auff der Partheyen anrueffen / da sie ihr endtschafft obgehörter massen / vor außsitzung deß Rechten / nicht erraichen möchten / nur dahin stelle / daß der / deme geruffen wirdt / weil das Gericht sitzt / vor Gericht erscheine. Gleichermassen soll es mit den Entbröchungen also gehalten werden / wo der Klager nit verhanden ist / allein daß die Wort / so auff die behöbnuß oder Antworter gestelt / auff die Entbröchung gewendt / vnd für dem Antworter dem Klager / sein Klag zuuolführen / geruffen soll werden.

Vnd solle der im nechsten Artickel / berürte Gewalt oder Constitution eines Procuratorn / gleich im anfang deß Kriegs: oder Rechtstritts / neben der Ladungs Copy / oder ersten Antwortschrifft / Gerichtlichen fürbracht / wie auch ein jeder Gewalt bey Gericht / für genuegsamb angenommen werden / wann derselb mit formblichen vnd gebräuchigen Clausuln / Inmassen die Gewalt seyn sollen / gestelt / vnnd mit deß Principaln aigner Hand vnd Sigl / oder da dern eines manglete / mit einer Zeugsfertigung / oder aber da derjenige so den Gewalt gibt / selbst nit schreiben kan / oder kein Pettschafft hat / mit zweyer darzu erbettner fertigung / fürgesehen ist.

Im fall aber der Gewalt / zum thail gebröchlich erfunden wurde / doch ein Schein eines Gewalts / als wann in einer Missiff / oder dergleichen / vngenuegsamer / oder gar kein Gewalt fürkäme / so solle der Procurator bestandt vnd vergreiffung thun / vnnd de rato Cauiren vnnd darmit zugelassen werden. Also daß er auff ein gewisse Zeit zunechst angehenden Landtsrechten genuegsamen Gewalt fürbringen wölle / vnd solle.

Auff daß aber die vnnottürfftigen verlengerlichen disputationen, so Gewält halber vielmahlen zwischen den Partheyen entstehen / verhütet / vnd zu männigklichs besserer nachrichtung ein vngefährliche vnnd vnuergreiffliche Formb eines Gewaltsambs fürgeschrieben seye / So ist für thuenlich ermessen worden / die hienachstehende Form / disem Artickel anzuhengen vnd einzuverleiben / nach deren man sich in Außfertigung der Gewält / beyleuffig richten möge.

Ich N: bekenne offentlich mit disem Brieff / vnnd thue khundt allermenniglich / dem er fürkombt / Nachdem sich vor N: Gericht / zwischen mir als Klagern (oder Beklagten) aines / vnd N: Klagern (oder Beklagten) anders thails / vnnd Sachen halber / (hie ist die Substantz der Sachen / wie auch das Ort vnd der Richter / vor deme die Rechtsübung schwebt / kürtzlich zuerzehlen vnd zu benennen) Rechtfertigung erhalten / ich aber anderer meiner Geschäfft vnd redlicher vrsachen halber / in aigner Person nicht erscheinen / oder solcher außwarten mag oder kan / also habe ich N: N: in der allerbesten formb / maß / weiß vnnd gestalt / so es nach ordnung der Rechten / nach gewohnheit vnnd gebrauch bemeltes Gerichts (oder dises Fürstenthumbs Steyr) am maisten Krafft haben soll vnd mag / zu meinem rechten vollmächtigen Anwalden vnd Gewaltstragern / gesetz vnd geordnet / vnd thue solches in: vnd mit Krafft dits Brieffs / solche Sachen vnnd Rechtsfertigung / in meinem Namen vnd von meinet wegen / zuhandlen vnnd zuführen / Klag vnd Antwort / Ein: vnd Widerred zuthun / zuhören / vnd fürzuwenden / den KriegRechtens zubefestigen / vom Gegenthail solches gleichfals zugeschehen zubegehren / auch mich vnnd meine Sachen / vnd Gerechtigkeit zum besten zuvertretten vnd zuhandlen / vnd einem jeden zimblichen / vnnd der Landtsordnung gemässen Aidt / vnd was ihme von meinet wegen im Rechten aufferlegt wirdt / in mein Seel / auch sonsten vom Widerthail begehren zuschwären / die Aidt zu deferiren, vnd zu referiren, Artickel zuübergeben / dieselben ob noth sein wirdt / mit Zeugen vnd andern Vrkunden zubeweisen / auch wider seine geführte Zeugen / Personen vnnd Aussag zu excipiren, Probation vnd impugnationSchrifft zuübergeben / auch sonsten alle notturfft vnd gegenwehr / in welcher gestalt die genandt werden mag / zuüben vnd außzuführen / im Recht zubeschliessen / bey: vnnd endt Vrthel zubitten / die anzuhören / anzunehmen / Execution, Ansätz / Weißbotten / Gerichtszeug: vnnd Schermbrieff Zubegehren / oder von ergangner Vrthel zudingen / vnd zu Appeliren, Apostolos zufordern / solche Appellation auffzurichten / an die mehrer Obrigkeit zubringen / wie sich gebürt / zuuolführen / Expens vnd Interesse / sambt andern GerichtsKosten / einzulegen / vnd zu Taxiren zubitten / die Taxierten mit dem Aidt da das vonnöthen / in meine Seel zu betewern / auch da er der Sachen nit selbst abwarten köndte / einen oder mehr affter Anwalt / an seine statt / zu substituiren vnnd zusetzen / den gegebnen Gewalt / gar oder zum thail / auff ihn oder sie zuwenden / dieselben nachgesetzten Anwält zu reuociren, vnd solchen Gewalt widerumb an sich zunem[m]en / so offt es die notturfft erfordert / vnd ihne gut bedunckt / auch sonsten alles vnd jedes in diser Sachen zuhandlen / zuthun vnd fürzunehmen / daß sich nach gestalt der Sachen / vnd im Rechten gebürt / vnd ich selbsten / so ich zu jederzeit zugegen wäre / thun solte / könde oder möchte vnd was diser obgemelte mein Gewaltstrager / oder sein vnd derselben substituirte Anwält / hierinnen thun / handlen vnnd fürnemmen / das alles soll sein / vnd ist mein guter Will vnnd angenehme Mainung / Gerede vnd verspriche auch bey meinem trawen vnd glauben / solches alles / stät / vest / vnd vnuerbrüchlich zuhalten / vnd sonderlichen deß Lasts / so man nennet zu Latein de satisdando, & judicio sisti, judicatum solui zuenthöben / Wie recht vnnd gewohnheit ist / vnd ob es Sach wäre / daß der vielgemelte mein Gewaltstrager / oder seine substituirte Anwälte / ainigen weitern oder mehrern Gewalt / dann hierinnen begriffen / nottürfftig sein wurden / wie vollkommen der sein solle / den will ich jetzt / alsdann / vnnd alsdann an jetzo / als ob der mit besonder außgetruckten Worten / Puncten vnd Clauseln / hierinnen begriffen wäre / hiemit auch vollkommenlich zugestelt vnd gegeben haben / alles zu gewinn vnnd verlust / vnd allen Rechten / sonder alle gefährde / auch bey verbindung deß gemainen LandtschadenBundts in Steyr / als ob derselbig von Wort zu Wort hierinn geschrieben stünde. Deß zu Vrkundt / hab ich mein Innsigl / (Pettschafft) getruckt auff disen Brieff / vnd mit aigner Handt vnterschriben / der geben ist / etc.

Nachdeme sich auch je zu Zeiten / vnangesessene Personen / vnd muthwillige Klager befinden / welche etwann einen andern mit Recht vnbillich fürnemmen / vnnd wann sie hernacher im Rechten verlüstiget werden / der Antworter sein Vnkosten / versaumbnuß / mühe vn[d] arbeit / in deme daß er muthwilliger gefährlicher weiß vmbgesprengt worden / muß verlohren haben / auß vrsachen / daß er dieselben bey dem Klager nit bekommen / oder dessen habhafft werden mag / So würdet hiemit geordnet / daß hinfüro ein jeder Klager so im Landt nit angesessen / oder desselben Iurisdiction nit vnterworffen ist / auff anruffen deß Antworters / gebürlichen Bestandt vnd Caution, es seye nun mit Bürgschafft / oder genuegsamen Vnterpfandt / zum Rechten / zuthun schuldig sein / daß er nit allein alles / so ihme das Recht nehmen oder geben würdet / vollziehen / sondern auch da er verlustiget werden solte / dem Antworter / Kosten / vnd Schaden / nach mässigung deß Gerichts / bezahlen vnd ablegen wölle.

Wo aber einer mit dergleichen Bürgschafft oder Pfandt / nit ankommen köndte / so soll er zum Bestandt / mit seinem Aidt gelassen werden / also daß er schwere / daß er mit solcher Bürgschafft oder Pfande vber angewendten müglichen fleiß nit auffkommen können / vnd daß er allem dem nachgeleben / vnnd ein genüegen laisten wölle / was ihme auff den fall verlusts / mit Vrthel vnnd Recht zuthun vnd zulaisten / würdet aufferlegt werden / Alles trewlich vnnd vngefährlich.

Hinwider vnd in gleichem / mag auch der Klager / an den Beklagten oder seinen Anwalt begehren / daß er ihme Cautionem Iudicio sisti vnnd Iudicatum solui, das ist Bestandt thun solle / dem Rechten außzuwarten / vnd dasjenige so erkennt würdet / außzurichten / welches auch also auff deß Klagers anruffen / der Beklagte zuthun schuldig / vnd dißfals die obgesetzte form Iuramenti, mutatis mutandis, so wol mit Bürgschafft oder Vnterpfandt / als mit dem Aidtschwur / von ihme dem Klager zulaisten / gebraucht / vnnd derselben allein noch ferrer diß inserirt werden soll /daß der Beklagte / fals er Bürgschafft oder Pfandt nit auffkommen köndte / seine Haab vnd Güter vnter wehrenden Rechten gefährlicher weise / nit vereussern noch vergeben wölle.

Ob der Klager / Antworter / oder sie baide / oder aber der Principaln Vberhaber / in hangenden Rechten / mit Todt / abgangen / mag dannoch die eine Parthey / so noch im Leben blibe oder ihre Erben / gegen deß abgestorbnen Erben / auff die vor außgangne GerichtsZeugbrieff vnnd Abschidt / im Rechten verfahren / es seyen die Täg klagt / HauptVrthel / oder erkandtnuß gangen / oder nit / doch das solches deß abgestorbnen Erben / zuuor von gericht auß zugeschrieben vnd verkündet werde / wie von alters herkommen / Zum fall aber deß abgeleibten Klagers / oder beklagtens hinderlassne vnwidersprechliche Erben / im wehrenden Rechten alsbaldt in die ferrere verfahrung / ohne vorangedeute verkündigung / im Fußstapffen deß Rechtens einstehen oder fürkommen wolten / solle man dieselben alsbaldt Gerichtlichen anzuhören / vnd in Sachen was Recht ist / zuerkennen schuldig sein.

Vnd nachdem sich aber offt begibt / daß sich der abgestorbnen Parthey / Erben / oder Guts / niemandt ainiger versprechung oder Begerhabung annehmen will / deßgleichen die Begerhabung der Pupillen immer offt langsamb verordnet würdet / dardurch dann maniche Parthey / mit ihrem Rechten / mercklich auffgezogen vnnd verhindert würdet / So soll hinfüro die LandtsObrigkeit / dahin bedacht sein / daß sie hierinn mit verordnung tauglicher Gerhaben / oder Versprecher deß verstorbnen Erben vnd Guets / auffs fürderlichist fürgehe / vnd alles was zu fürderlichen Rechten dienstlich / fürnemme / damit niemandt wider die gebür in seinen Rechten verkürtzt oder auffgezogen werde / wo aber die LandtsObrigkeit damit verzügig sein wurde / so stehet den Partheyen bey ihro derowegen anzuhalten / beuor.

Da sie aber vber solches noch ferrer saumig seyn / so mögen die Partheyen den Herrn vnnd Landtsfürsten / oder dessen I: O: Regierung / vmb fürderliche einsehung ersuchen.

Damit aber dits Orts / die hinderlaßnen Pupillen oder Erben / welche bißweilen wegen ihrer abgestorbnen Eltern vnd Befreundten / Rechtssachen / vnnd auch verlassenschafft / nicht vmbständig / oder genuegsames wissen haben / nicht vbereylt werden / solle hiemit dises statuirt seyn / daß vngeachtet der Weißbott im Rechten allberait verschafft / aber nit würcklich geführt worden / dannoch mit würcklicher führung solcher erkennten execution auff ein Jar lang / (von Zeit an deß geleibten / wider welchen dieselbe erkent worden) ein stillstandt solle gehalten werden / in bedencken daß die Gerhaben oder Erben / zu Verhütung ferrer Expens, sich vielleicht ohne führung deß Ansatzes gegen dem Klager / zum vergleich oder würcklicher bahrer bezahlung dessen / was Vrthel vnd Recht / mit sich gebracht / schicken möchten.

Nachdeme auch bey den Schermsverkündigung: vnd verantwortungen / da sich jemandt auff sein Scherm gewaigert / nit wenig Mißbräuch vnd Auffzüg verspürt worden / denselben nun ins künfftig fürzukommen / wirdt hiemit gesetzt vnd geordnet / daß wo sich hinfüro jemandt auff sein Schermber / so im Landt gesessen / waigert / demselben zum erstenmal geschrieben / vnd vor Gericht zuerscheinen / vnd zuschermen aufferlegt werde / kombt er solchem nit nach / so soll ime alsdann von stundan zum andernmal bey einem Peenfal peremptoriè zuerscheinen / geschrieben werden.

Da aber jemandt so ausser Landts gesessen / zu einem Schermb fürgewendt wurde / deme soll erst zum drittenmal bey doppeltem Peenfall peremptoriè zum Rechten zuerscheinen / aufferlegt werden / wie dann der Herr Landtshauptmann / vnd Herr Landtsverweser / in alweg auff die verwürchte Peenfäll fleissig achtung haben / dieselben abfordern / vnnd mit nichten anstehen lassen / oder jemanden derwegen ansehen oder verschonen sollen / damit dardurch bey Gericht mehrer Gehorsamb erhalten / auch die Partheyen vmb souil desto fürderlicher zu ihren Rechten kommen mögen / welche verwürchte Peenfäll / den Armen Leuthen ins Spittal oder Lasareht gegeben werden sollen.

Da nun der Schermber auff das Peremptorische Schreiben erscheinet / vnnd sich der Schermbung verwidert / solche verwiderung auch durch das Gericht (bey dessen Erkandtnuß es stehen solle) für genuegsamb erkennt würdet / oder er der Schermber gar nit erschine / sonder Vngehorsamb außblibe / so soll doch hierdurch die Hauptsachen mit nichten eingestelt / sonder der Beklagte / gegen dem Klager auff sein anruffen zuverfahren / vnd sich selbsten zuschermen / Entgegen aber / ihme sein nit erscheinender Schermber allen den Schaden vnd Vnkosten / so er diser Sachen halber genommen vnd erlitten / abzutragen / vnd zubezahlen schuldig vnnd verbunden sein.

Vnd im fall da der Klager / gegen dem Beklagten / vmb dero vrsach willen / daß ihm sein fürgewendter Schermber nit geschirmbt / oder aber die zu der Sachen nottürfftige Brieffliche Vrkunden vnd Schermbrieff / damit er sich / da ers beyhanden gehabt / billich:vnd rechtmässiger weiß schermen / vnd von der Klag enthöben hette mögen / auff sein ersuchen nit bekommen mögen / auff solchen Peremptorischen Rechtstag die behöbnuß erlangt / vnd hernach vber kurtz oder lang / (zuverstehen vor der verjährung) solche Schermbrieff zuhanden brächte / alsdann stehet demselben beuor / den Klager vmb solch Gut widerumb fürzunemmen / vnnd sein Recht darauf zuersuchen / darwider ihme dann sein hieuor erlangte Behöbnuß / gar nicht fürtragen / oder behelffen / sonder hierüber in allweg die billichkeit / vnd was rechtist / neben abtrag deß aufferloffnen Vnkostens gehandlet werden solle / Gleichsfals soll es auch mit dem Gegenscherm verstanden vnd gehalten werden.

Da aber jemandt von ainiger Parthey vnbillicher vnd vnrechtmäßiger weiß zuschermen fürgewendet würdet / So soll ihme dieselbige Parthey die hierüber auffgeloffne Expens vnnd Vnkosten / nach Gerichtsmässigung anzulegen / vnd zubezahlen schuldig seyn.

Wann auch ein Parthey bey der Schrannen / auff den Landtsfürstlichen Cammer Procurator Schermbs waigern wurde / soll ihro solche Schermbs waigerung nit abgeschnitten / sonder sie ohne mittel darzu gelassen / vnd sambt dem Gegenthail mit der Sachen / an beruertes Cammer Procurators ordenliche Instantz gewisen werden.

Nachdem auch bißhero in führung der Weisungen / allerley beschwerliche auffzüg / vnnd verlengerung deß Rechtens / zu mehrmahlen fürkommen / So sollen nun hinfüro die Weiß: vnd Gegenweisungen miteinander geführt werden / Nemblichen wann jemanden ein Weisung zuführen / aufferlegt würdet / so soll derselb von stundan / noch in wehrenden Rechten / da das Vrthel oder Erkandtnuß ergangen / seine Weiß Artickel stracks stellen / dieselben dem Gericht / vnd dann dem Gegenthail einhendigen / auff daß derselb volgendts auch darauff seine Gegenweiß Artickel / noch in denselben Rechten / dem ergangnen Vrthel oder Erkandtnuß gemäß / verfassen / vnd dauon auch dem gericht vnnd Gegenthail ein Abschrifft in gleichem laut vberantworten möge / vnd alsdann soll darauff die behörung der Zeugen / auff baider Thail eingelegte WeißArtickel / vnnd eingebrachte Zeugen vnd Zeugnuß / durch die geordente Geschworne Commissarien allhier / oder anderer Orthen / zu der Partheyen gelegenheit vnd gefallen / mit einander / doch vnterschidlich / auff jedes eingelegte WeißArtickel beschehen / Doch wo der Gegenthail dermassen erhöbliche vrsachen fürbrächte / daß er in disen wehrunden Rechten / mit seiner Gegenweisung / kürtze der Zeit / oder sonst anderer fürfallenden Ehehafften halber / nicht nottürfftiglich auffkommen möchte / so soll er / wo anders dieselben vrsachen für genuegsamb vnd erhöblich befunden / alsdann inn folgenden Rechten / mit solcher seiner Gegenweisung einzukommen / zugelassen werden.

Da aber einer oder der andern Parthey / zu ersparung deß vbrigen Vnkostens / so die Zeugen etwo gar weit von dannen gesessen / vnnd auff den Augenschein geführt werden müssen / die Geschworne Commissarien nit darzu gebrauchen / gelegen seyn wolte / daß stehet zu jeder Parthey gelegenheit vnnd gefallen / so sollen etliche / auffs wenigist drey Landtleuht / oder sonst andere Erbare taugliche Personen / deren sich die Partheyen miteinander vergleichen / vnnd namhafft machen sollen / so nahendt beyeinander gesessen / vnd der Sach am besten / stattlichisten vnd fürderlichisten beywohnen / vnd darzu zubewegen seyn mögen / darzu geordnet / vnd ihnen aufferlegt werden / solche behörung der Zeugen / auff der Partheyen Vnkosten / fürderlich zuverrichten / die auch darinn gebürlichen Gehorsamb zulaisten / schuldig seyn sollen. Weillen aber zu mehrmahlen bey Gericht fürkommen / daß maniche Parthey mit den Commissarien in behörung ihrer Zeugen / darumben daß sie dieselben nit zusamen bringen mögen / lange Zeit auffgezogen worden / vnnd sich wol auch zugetragen / daß der Gegenthail etwo mit sonderm fleis / allein zuverlengerung der Sachen / seines thails einen Commissarien / so derselben Orten weit entsessen / oder sonst auß verhinderung seiner Ehehafften / derselben Commission füeglich nit beywohnen können / benennt / damit nur solche Commission vmb souil desto lenger auffgezogen wurde / So soll demnach das Gericht dahin bedacht seyn / hierinnen keinem Thail solch vnd dergleichen muhtwilligen auffzug vnd verlengerung / zugestatten / sondern daß sich die Partheyen der Commissarien so sie je darauff gehen wollen / welche der Sachen am besten vn[d] fürderlichisten / wie obvermelt / beywohnen mögen / auch nahend beyeinander gesessen / vergleichen / auch daneben bey den selben Commissarien daran vnd darob seyn / daß sie hierinnen gebürlichen Gehorsamb laisten / vnd ohne sonder hochbewegliche Ehehafften vnd vrsachen sich der Sachen mit nichten verwidern / oder sich entschuldigen / die verhörung der benennten Zeugen / mit nichten auffziehen / sondern souil müglich / auff deß Zeugenführers Vnkosten / befürdern sollen.

Es soll auch keinem Commissario so von den Partheyen vor Gericht benennt / andere Personen an sein statt / da er selbst nit darbey sein können / zu behörung der Zeugen / zu substituiren oder zuverordnen / zugelassen werden / es sey dann das kein thail darwider eingeredt / sonder wilkürlich darein verwilligt hett.

Vnd nachdem bißhero / durch weitschweiffige vnnothwendige außführung vnd vbrige anzahl der Zeugen / vnnd WeißArtickel / das Gericht nicht wenig beschwärdt worden / Demnach sollen sich / die Partheyen vnd Procuratores / alles vberflüssigen vndienstlichen einführens in den WeißArtickeln / zuvermeydung ihrer selbst / vnd deß Gerichts vnnottürfftigen Behölligungen / gäntzlichen enthalten / auch sonderlich darauff bedacht seyn / damit das Gericht / mit vnnohtwendiger vbriger menig vnnd anzahl der Zeugen / fürnemblich der einfältigen Bawren Personen / so etwo die Sachen nit verstehen / auch wol vmb den Handel nicht wissen / (dardurch dann nur der Namen Gottes / vmb souil destomehr leichtfertig mißgebraucht / ) verschonnt / sondern die Sachen souil müglich / mit dem aller engisten eingezogen werde.

Wo aber jemandt etwas mehrers / vnnd dem ergangnen Vrthel vnd Erkandtnuß zuwider / in seine WeißArtickel einbrächte / so soll doch darauff nicht gerichtet / sondern für ein nullitet im Gericht geachtet werden.

Es sollen aber die Partheyen der Weiß: vnd Gegenweiß Artickel auch Zeugen Personen halber / sich vor der abführung / der Weiß: vnd Gegenweisungen zuvergleichen / vnnd dieselb dem Gericht fürzubringen / oder da sie sich selbst vergleichen können / darüber alsbaldt erkennen zulassen schuldig seyn / damit die prob: vnnd impugnation Schrifften / nit so weittleüffig dispudirt, die zur Hauptsachen vndienstliche WeißArtickel außgestelt / die Zeugen nicht vergeblich beaidiget / das Gericht dardurch Confundirt, vnd wegen der Procuratorn vnnothwendigen disputirens von der Hauptsach / vnd denen darzu gehörigen notwendigen Artickeln abgeführt / Inmassen auch auff die von dem Herrn vnnd Landtsfürsten / oder der I:O: Regierung erlangte Schüb vnd Erstreckung / davon dem Gegenthail außgeführt wurde / daß per malè narrata, oder mit dergleichen vngegründten fürgeben / solcher Schub oder Erstreckung geworben / vnnd erlangt wäre worden / Darüber was billich vnd Recht / auff bemeltes Gegenthails verfechtung / gehan[d]let vnd erkennt werden solle.

Wann es dann zubehörung der Zeugen kombt / soll durch den verordenten Zeugs Commissarium / einem jeden fürgestelten Zeugen / so Aidts von den Partheyen nit erlassen / die hienach geschribne Aidtspflicht oder Formb / vor verhörung vleissig vnnd notturfftigklich fürgehalten / eingebildet / vnnd nachgelegenheit seiner Person vnd Wesens / desselben / wie auch deß Mainaidts gebürlichen vermahnet vnd erinnert werden / was er nemblichen ihme selbst vnd andern / so er die Warheit anzaigt / gutes vnnd nutzliches schaffe / Entgegen aber / vnd wann er den grundt deß jenigen / darumben er befragt würdet / gefährlichen verschweiget / vnd erzehlet / mit derselben seiner falschen vngerechten Außsag den Richter vnnd Beysitzer zu einem vngerechten Vrthel bewege vnd verbinde / die Partheyen / mit Vngerechtigkeit betriege / vnd zuvorderist Gott den Allmechtigen damit schwärlichen belaidige / vnd erzürne / auch sein Gewissen vnd Seelen Seligkeit beschwere / vnnd in gefahr setze / wie nit weniger gegen der Welt verleimbt vnd vndüchtig mache / vnnd zu dem allen als ein Mainaidiger am Leib gestrafft werde / wie sich dann die ZeugsCommissarien / in dem / vnnd andern / als getrewe vnd geschworne Diener / gebürlichen vnd vnverweißlichen / vermög gelaisten Aidtspflicht / zuuerhalten wissen werden.

Nachdeme aber / bißhero in Examinierung der Zeugen / allerhandt vnordnungen / sonderlich in deme verspürt worden / daß dieselbige gemainigklichen nur per Pausch / vnd nit auff / jede vmbständ der Geschicht / der verfasten WeißArtickel oder Fragstücken / noch auch vber die vrsachen ihres wissens / absonderlich / vnnd wie sichs gebürt / befragt werden / solchem nach / solle hiemit den ZeugsCommissarien alles ernsts aufferlegt seyn / die Gezeugen alles vleis vnd vmbständigklich auff die bey Gericht einkommne / vnd ihme Commissario angehendigte WeißArtickel / vmb ihr wahres wissen / vnd vnwissenheit der fürgehaltnen Fragstuck / oder WeißArtickel zubesprachen / dasselbig kürtzlichen mit Ja oder Nein beantworten zulassen / vnd sollen so dann von den Zeugen die vrsachen ihres wissens / mit denen gezimenden vnd zu der Sachen dienstlichen oder nothwendigen vmbständen / doch ohne ainige betroung oder verweiß / erforschen / Item da ein Artickel oder Fragstuck were / so vnterschidliche Geschichten vnd Vmbstände in sich begriffe / mit gutem vnterricht deß Verstandts desselben / deutlichen befragen / auch die darauff gegebne Antwort vnnd Außsag / souil immer müglich / mit eben den Worten die der Zeug selbst geredt / beschreiben / vnd dieselbige in kein weeg ferrner in Pausch vnd Vberhaupt einbringen / auch endtlichen allen fleis fürkehren / so die Representierung deß hoch Richterlichen Ambts / welches die Commissari diß Orts vertretten vnd verwalten / zu sambt der Sachen wichtigkeit vnd die grosse verantwortung / so sie ihnen auffladen / erfordern thut.

Souil dann die WeißArtickel anbelangt / solle den Partheyen oder denselben Advocaten / hiemit aufferlegt seyn / sich inn allweg dahin zubefleissen / damit sie ihre Artickel auffs kürtzist / als müglich / vnd Weisungsmateri leyden mag / verfassen / vnd verhüeten / daß der Verstandt derselben / weder mit vnterschidlichen Sachen / vnd Geschichten / noch in ander weeg / verlengert oder verdunckelt / sondern fein kurtz / klar / rundt / deutlich vnnd verständigklich / auch auff ein jedes fürnehmes factum oder vmbstandt / ein besonderer Artickel gestelt werde / dabey nit hindern solle / daß etwann in einer Sachen viel Artickel (vngeacht man solches bißhero nit zugeben wollen) gemacht vnd vbergeben werden / sonder dasselbig Niemanden (da sie allein nit Impertinentes vnnd zur Sachen vndienstlich seyen) verbotten seyn.

Wie dann innsonderheit dahin zusehen ist / daß die gedachte WeißArtickel pertinentes, das ist / auß der Narration vnd substantz deß Klaglibels / auff die Geschicht / vnd nit auff das Recht affirmatiue / auff Ja / vnd nit auff Nein / außgesagt / vnd zur Sachen vnnd Beweißmateri dienstlich seyen / vnd im widrigen fall nach außweisung gemainer Rechten / als vnzulässig vnd Impertinentes außgestelt / vnd verworffen werden.

Vnd wann nun ein Zeug auff die WeißArtickel der notturfft nach / Examinirt worden / vnd sein Außsag geendet hat / solle demselben / vom Zeugs Commissario / ein gebürliches stillschweigen vnnd gehaim halten / deßjenigen so er befragt worden / vnd er darüber bekundtschafft hat / bey dem gelaisten Aidt / aufferlegt werden.

Die Gezeugen / welche durch die Partheyen fürgestelt / sollen durch den ZeugsCommissari mit dem hinnach folgenden Aidt beladen werden.

Ich N: gelob vnd schwör / das ich in der Sachen / darinnen ich zu einem Zeugen fürgestellt worden / auff die Fragstück vnd WeißArtickel wie mir die fürgehalten werden / die Pur lauttere vnd gründtliche Warheit sagen will / was mir kundt vnd wissent ist / vnnd dieselb nit verhalten noch verschweigen / oder ainige Vnwarheit einmischen / weder von Müht / Gab / Freundt: oder Feindtschafft wegen / noch auß keiner andern vrsach / sondern mein Kundtschafft hierinnen geben / wie einem Gerechten Warhafftigen Zeugen gebürt / vnnd ich solches gegen Gott dem Allmechtigen /vor dem Jüngsten Gericht verantworten will / Als war mir Gott helff vnd sein heiliges Euangelium.

Wann auch zu Zeiten / Zeugen zu ewiger Gedächtnuß / zuuerhören / begert würdet / solle dieselbige verhörung / ohne sondere bewegliche genuegsame vrsach / darüber im Rechten / erkennt worden / nit beschehen / noch zugelassen werden / Als nemblichen wo es sich begebe / daß ein Zeug so gar alt vnnd schwach / daß seines Ableibens zubesorgen / oder aber an Kriegs: vnnd Sterbens Läuffen / sorglichen Orten / oder sonsten einem weit entlegnen Ort / wonhafft / oder auch sich auff ein weite Raiß / also daß er schwärlichen zubekommen wäre / begeben wolte / sambt andern dergleichen vrsachen / dardurch ein Parthey inn gefahr ihrer Weisung gestelt / vnd gedeyen möchte / sonderlich solle auch die obberürte der Zeugen Verhörung statt haben / vnnd von Gericht bewilligt werden / wo spürlichen befunden / daß der Beklagte die Sachen durch vngebührliche Exceptionen vnd Außflücht / auff daß der klagende Thail zu der Weisung vnd Hauptsach lang nit kommen solle / in die harr ziehen wolte / aber dem beklagten Thail mag jederzeit / vnd beuorab wann der Klager mit seiner Klag saumig erschine / vnnd die Sach selbst auffzuge / die verhörung der Zeugen / zu künfftiger Gedächtnuß / ohne vnterschid vnnd vngeacht / ob gleich der hieuor erzehlten vrsachen keine verhanden / gestattet werden / doch solle zu solcher verhörung der Zeugen / dem Gegenthail jederzeit ordenlich / wie recht ist / verkündet werden.

Vnd wann nun dergleichen Weisungen ad perpetuam rei memoriam auffgenommen / sollen die Kundtschafften durch die Zeugs verhör / in die Cantzley verschlossen / zu der ordenlichen Registratur gebracht / vnd daselbst vneröffnet / vntz die Partheyen mit Erkandtnuß darzu gelassen / behalten werden.

Vnd wellen auch von der Zeugen Herrschafften / mit verschaffung ihrer Vnterthanen vnnd Diener / zu mehrmahlen allerley verlengerung vnd vngehorsamb erschinen / also daß sie dieselben auff die außgangne Compasschreiben / zu thueung ihrer Außsagen / nicht verschafft / sondern ihnen zum andern: offt dritten: vnnd mehrmahlen derwegen geschrieben müssen werden / So soll nun hinfüro ein jeder Herr vnnd Landtmann / oder Obrigkeit / seine Vnterthanen vnnd Diener / auff deß Herrn Landtshauptmans / oder Herrn Landtsverwesers / vnd anderer Gericht / außgangne Compasschreiben / vnnd der Commissarien erforderung / ohne alle waigerung / auff deß Zeugenführers Vnkosten / darzu zuerscheinen verschaffen / vnd mit nichten hinderstellig machen.

Wo aber jemandt seine Vnterthanen vnnd Diener / auff deß Herrn Landtshauptmans vnd Herrn Landtsverwesers / oder anderer Gericht / außgangne Compasschreiben vnd erforderung / zu thueung ihrer Außsag / nit verschaffen / sondern die Sachen / dem Zeugenführer zu gefahr / vnd erlengerung seines Rechtens / muhtwillig auffziehen wurde / so soll ihme solches zum andern mahl bey einem Peenfahl aufferlegt werden / dieselben benennten Zeugs Personen / auff sein aignen Vnkosten / für die Geschworne Zeugs: oder sonst andere fürgenommne Commissarien / ohne ferrern auffzug / zuverschaffen / vnd wo nun ein Sach deß Zeugen Herrn selbst berürte / so soll er seine Vnterthanen vnd Diener / so zu Zeugen benennt / der Glübd vnd Pflicht / damit sie ihme zugethan / biß sie ihr Außsag gethan / bemüssigen / wann aber solches durch ihne nicht beschehe / sollen die Commissarien die bemüssigung der Glübd selbst zuthun / macht vnd gewalt haben.

Da auch etwo ein: oder der ander Zeug / auff ordenliche erforderung / auch verschaffung seiner fürgesetzten Obrigkeit / zu thueung seiner Außsag nit erscheinen / oder gehorsamb laisten wolte / daß derselbig durch Gerichtsmittel / mit verschaffung seiner Person / darzu gehalten / er sich auch selbst in solcher verwahrung / weiln er darzu durch seinen Vngehorsamb vrsach gegeben / zu vnterhalten schuldig sein solle / Da aber dessen vnvermögen also wissent / solle der producent, die ätzung dargeben / vnd da auch dieselbe / Armuth halber / solches nicht vermöchte / so dann gar das Gericht / solchen ex officio, interim vnd biß zu außtrag der Sachen / zuraichen schuldig seyn / nachmals aber sich durch das jenige was Rechtliche entschaidung gibt / selbst zahlhafft machen.

Dieweil aber dem Gericht / mit der Partheyen / Mündtlichen Verfechtungen vnd Einreden / auff solche abgeführte Weisung vnnd Gegenweisung vil Zeit vnd Weil genommen / mercklich auffgezogen / Demnach so sollen nun hinfüran baide Thail / nach solcher eröffnung bemelter Weisungen / darüber ihre Verfechtungen vnnd Einreden / wie sie dieselben / jeder auff deß andern abgeführte Weisung vnd Zeugs Personen / Mündtlich vor Gericht thun mögen / fürderlich / wo nicht im selben / doch gewiß in folgenden Rechten / jeder mit einer Schrifft / doch auff das aller kürtzist stellen / vnnd zu Gericht einlegen / Alsdann soll darüber was recht ist / erkennt / vnnd also keinem Thail hierüber ainiger vnbefuegter auffzug / bey verlierung seiner Weisung / mit nichten gestattet werden.

Es soll auch jedem Thail seine Zeugen vnnd Zeugnuß / zweymal nacheinander / das ist in zweyen Rechten / im gericht zubenennen vnd einzubringen beuor stehen / doch wo jemandt dermassen genuegsamb erhöbliche vrsachen fürbrächte / daß er mit benennung seiner Zeugen in den zweyen Rechten nicht auff kommen / oder aber dieselben Zeugs Personen / oder Zeugnuß in mitler Zeit nit er fragen möchte / welche vrsachen / ob sie genuegsamb oder erhöblich seyn / bey deß Gerichts Erkandtnuß stehen solle / so soll ihme in dem dritt volgenden Recht dieselben einzubringen zugelassen / vnnd darüber ferrer keinem Thail / ainiger Auffzug oder Termin / da sie anderst in bemelten dreyen Rechten / mit ihren notturfften wol fürkommen hetten mögen / vnd dieselben außgesessen worden / gestattet / sondern auff das / so im Gericht fürkommen / gehandlet vnd erkennt werden / Da aber dieselben drey Recht nicht außgesessen / vnnd sie mit ihrer notturfft nicht fürkommen wären / soll solches jedem Thail ohne Schaden seyn.

Die Appellationen seyn auß natürlichen billichen vrsachen / zu erhaltung der Gerechtigkeit / durch die Recht erfunden vnnd geordnet / damit da ainige Parthey vom ersten Richter beschwerdt zu seyn vermainte / sich dieselbige ihrer Rechten vnd Gerechtigkeiten / durch hilff vnd vermittelst der Appellation / widerumb erholen könne / woferr dann ein Parthey bey disem Gericht mit einem Vrthel / Beschaidt oder Rahtschlag / beschwerdt zuseyn vermaint / deren sie ohne berueffung an die höhere Obrigkeit nit kan entlediget werden / mag dieselbige Parthey für die höhere Obrigkeit Dingen vnd Appelliren / vnd solle solche Dignus auß beeder Redner Mundt auffgerichtet werden / vnd den Procuratoren hiemit aufferlegt seyn / daß sie in auffrichtung der AppellationSchrifften / mehrers nit / als im Gericht fürkommen / einbringen / vnd sich aller newerung gäntzlichen enthalten.

Nachdeme auch bißhero in auffrichtung vnd vergleichung der Appellation Schrifften / bey den Partheyen allerley gefähr vnnd verlängerliche auffzüg / sonderlich aber / mit den Gedenckherrn erschinen / Darauff sie sich ihrer strittigkeit halben gewaigert / in deme daß dieselbige immer auß vrsachen / daß ihnen die Sachen auß der Gedächtnuß gefallen / gar keinen Bericht / vil weniger ainige Erklärung zugeben gewust / vnnd je zu Zeiten gar abgestorben / dardurch dann maniche Parthey in ihrem Rechten zu mercklichem ihrem Nachthail vnd Schaden / lange Jahr auffgezogen / vnnd verhindert worden / So solle nun hinfüro dise Ordnung mit auffrichtung der Appellation gehalten werden / Nemblichen da etwo ainige Irrung in auffrichtung der Appellation zwischen den Partheyen fürfiele / also daß sie sich derselben miteinander nit vergleichen köndten / so sollen dieselben Partheyen / solche ihre schwebende Irrungen / für ihre Gedenckherrn / die sie ihnen von stundan / nach dem ergangnen Vrthel oder Beschaidt / auß der Verordenten Beysitzern / jedes seines thails erwöhlen vnnd benennen mögen / zu nechstkommenden Rechten fürbringen / welche dann dieselben Irrungen vnd AppellationSchrifften / gegen deß Schrannenschreibers Protocoll / auch der Beysitzer Verzaichnussen vnd der Procuratorn VerzaichnußBüchlein (welche sie dann jederzeit bey Gericht haben vnd ihre Fürträg gegen einander fleissig vnnd ordenlich vermercken sollen) ersehen / vnd müglichen fleiß fürwenden / die Partheyen derselben ihrer strittigkeiten / mit außstellung deß Vberfluß / vnd dessen so nit im Gericht fürkommen / oder aber da ein Thail jechtes inn sein Appellation eingebracht / vnd der Gegenthail dasselbig nit verantwortet / daß ihme solches noch zubeantworten beuor stünde / oder wie es statt bey ihnen haben kan / zuvergleichen / wo sie es aber je nicht vergleichen möchten / sollen die Partheyen solche ihre strittigkeiten stracks vnnd von stundan / noch in demselben wehrenden Rechten / dem Gericht zur Entschaidung fürbringen. Darüber dann alsbald die gebür vnd billichkeit erkennt werden solle.

Vnd da nun hierinnen / bey einem oder dem andern / ainige spürliche vnbilliche gefahr vnnd auffzug befunden wurde / solle derselb nemblich der Procurator / so ferr es an ihme erwunden gewest / mit allem ernst / vnd dann der Landtmann oder Parthey / nach Erkandtnuß der Herrn vnd Landtleuht vmb ein Summa Gelts / den armen Leuthen ins Spittal zugeben / vnnachläßlich gestrafft werden.

Im fall aber / auß den gemelten zwayen Gedenckherrn / einer oder bayd / bey solchen Rechten nicht zugegen / oder gar abgestorben wären / solle dennoch die Sachen mit der vergleichung von ihretwegen / mit nichten auffgezogen werden / sonder bayden Thailen zugelassen seyn / zween andere Beysitzer / so bey demselben Handel gesessen / an statt der abwesenden Gedenckherrn / darzu zunemmen / die dann die vergleichung obgehörter massen ins werck richten sollen.

Dieweil auch / mit den Beyurtheln da dieselben gedingt / ehe die Appellation auffgericht / verglichen / vnd von der I:O: Regierung erlediget werden / maniche Parthey inn der Hauptsach lange Zeit auffgezogen würdet / so haben Ihr Kayserl: Mayest: genedigist geordnet / daß die Dignussen der Beyurtheln / auffs fürderlichist als müglich / bey gedachter Regierung erledigt werden sollen damit Männigklich vmb souil desto schleuniger zu fürderlichem außtrag seines Rechtens kommen möge / auff daß auch diser Ordnung desto vnfählbarlichen nachgegangen werde / vnd man bey der Regierung in fürnemmung solcher Processen / sich darnach zurichten wisse / So soll jederzeit den Appellation Brieffen außtrucklich einverleibt / oder an denselben vberschrieben werden / ob von einem Bey: oder Endurthel gedingt worden.

Damit aber die vnnohtwendige vberflüssige Dignussen / so offt mehr nur zum auffzug vnd verlengerung der Partheyen / auch behölligung deß Gerichts / dann auß notturfft / durch die Partheyen fürgenommen vnnd gebraucht / abgestelt / so solle einer jeden Partheyen / so dingen will / den Landtleuthen bey ihren trawen vnd glauben / vnnd den gemainen Partheyen / an Aidts statt fürgehalten werden / Nemblichen daß er die Appellation diser Rechtsachen nit auß gefahr vnnd zu verlengerung derselben / sondern allein vmb bessers Rechtens willen / führen thue / alsdann sollen die Procuratores solche Dignuß Schrifften / bey ihren Pflichten / von dato deß ergangnen Vrthels oder Beschaidts / biß zu dem nechstkommenden Rechtn ohne lengern auffzug auffzurichten / vnnd zu dem Geschwornen Schrannenschreiber zuerlegen / vnnd mit einander zuvergleichen / schuldig seyn.

Wo aber einer oder der ander Thail / mit seiner Appellation saumig erscheinen wolte / soll auff anruffen deß gehorsamen Thails / durch den Herrn Landtshauptmann / oder Herrn Landtsverweser / dem Gegenthail / durch ernstliche Rahtschläg vnd befelch aufferlegt werden / daß er vor gehaltnen Rechten / seines thails Appellation auffrichtt / vnd sich mit deß Gegenthails Procuratoren derenthalben vergleiche / wo aber solches nit beschehe / vnnd bey dem Appellanten diß Orts der saumbsal erschine / soll alsdann die Appellation desert vnd gefallen seyn / Da aber der Appellat seines thails darinnen saumig wäre / solle der Appellant wann er Klager gewesen / alsdann sein Spruch gegen ihme dem Appellanten behabt / vnd erstanden haben / Da er aber Beklagter gewesen / so dann von der angestelten / Klag / ledig vnd müssig erkennt werden.

Wiewol auch bißhero bey disem Gericht / im veblichen gebrauch gewesen / daß wann vnter den Rechtenden Partheyen nur die eine Appelliert / man für den Thail der nit Appelliert / nichts erkennt hat / vngeacht man befunden / daß demselben ein mehrers dann die Appellierte Vrthel oder Erkandtnuß vermag / hette zu erkennt werden sollen / vnd derohalben vonnöthen gewest / daß auch der ander Thail / vnd also bayde Partheyen zugleich Appellieren müssen / da sie anderst gewölt / daß einem so wol als dem andern geholffen werde / Seitemahlen aber das beneficium Appellationis gemain / vnd einen so wol als den andern Thail berürt / vnd derohalben / nach gestalten Sachen bey der höhern Stell oder obern Tribunal fürträglichen seyn solle / So ist hiemit geordnet / daß hinfüro die von dem einen Thail / das ist vom Klager oder Beklagten Interponirte Appellation / einem vnd dem andern / das ist / so wol dem Appellaten / als dem Appellanten zu gutem kommen / vnd baiden Partheyen zugleich zudingen / nit vonnöthen seye / auch die Regierung inn ihren declarationVrtheln / den stylum darnach richten vnd führen solle.

Im fall aber / einer oder der ander / dermassen genuegsame Ehehafften vnnd verhinderungen fürzubringen hette / daß er sein Appellation Schrifften / nit auffrichten können / so solle ihme solches / da anderst seine eingewendte vrsachen / vnnd verhinderungen bey Gericht für genuegsamb vnnd erhöblich befunden / ohne allen Schaden seyn / vnd alsdann den baiden Thailen mit Rechten aufferlegt werden / daß sie dieselbige ohne lengern auffzug vor auffhöbung / oder aber nach auffhöbung desselbigen Rechtens / inn einem kurtz bestimbten Termin bey vermeydung der hieoben angedeuten Straffen / vor dem Schrannenschreiber nochmahlen miteinander auffrichten / vnd vergleichen sollen.

Die Procuratores sollen auch / bey ihren Pflichten verbunden seyn / obgemelter Ordnung / mit auffrichtung der Appellation Schrifften / gäntzlichen zugeleben / vnd souil möglich zubefürdern / auch in allweg dahin bedacht seyn / daß sie in die Appellation Schrifften / wie oben geordnet / mehrers nicht / dann was vor Gericht fürkommen / einbringen / damit die vnnohtwendige Irrungen vnd incidentstritt so sich derowegen zutragen / mögen vmb souil desto mehr verhüetet werden / Wo sich aber glaubwürdig befinden wurde / daß sie die Procuratores darwider handlen / vnd durch jren vnfleis / einem oder den andern Thail / mit auffrichtung der AppellationSchrifften / oder in anderweg verhinderten / derselb Procurator an deme es also erwindet / solle nicht allein den Nachthail vnd Schaden / welchen etwo ainige Parthey derohalben leyden müssen / zu bezahlen vnnd zuerstatten schuldig sein / sonder auch noch darzu durch den Herrn Landtshauptmann / oder Herrn Landtsverwesern / mit erkandtnuß der Herrn vnd Landtleuht / ohne entgelt der Partheyen / ernstlichen vnnachlässig gestrafft werden.

Gleichermassen soll auch dißfals mit den Appellationen / die Ordnung bey der Landtshauptmanschafft / vnd allen andern Gerichten / wie oben nachlengs vermelt / gehalten vnnd dahin verstanden werden.

Damit aber das vnnohtwendige Appelliren / vmb souil desto mehr abgestelt / vnd abgestrafft werde / so soll die I:O: Regierung / da sie in erseh: vnd erwögung der Acten vnd Appellation Schrifften / ein scheinbarlichen Muhtwillen verspüren wurde / nach gestaltsambe desselben / auch deß Schadens / darein der Appellat von solcher verursachter Sperr wegen / gerathen wäre / beschaffenheit / gegen dem Appellanten / mit vnnachlässiger Straff verfahren.

Nachdem sich auch vilmahlen zutregt / daß die Partheyen durch Gerichtliche Erkandtnussen / Abschied / Decreta, Beschaid vnd Rahtschläg / Item auffgerichte Verträg / Contract, Verschreibungen / Instrumenta vnd dergleichen / laedirt vnd beschwärdt zuseyn vermainen / solchen beschwärden aber / weder durch Appellation / noch Reuision, noch andere Rechtliche mittel / ohne vorgehende Restitution in Integrum abgeholffen werden kan / vnd derhalben bey dem Herrn vnd Landtsfürsten / vmb das beneficium Restitutionis in Integrum einkommen / darbey aber vermerckt würdet / daß jeweilen ein gefahr mit vnterlaufft / vnnd solche Restitution mehr auß Muhtwillen / vnnd die Gegenpart gefährlicher weiß auffzuziehen vnd vmb zutreiben / dann auß noht vnd billichmässiger beschwärung gesucht würdet / So haben Ihr Kayserl: Mayest: dergleichen argelist vnnd gefährlichem beginnen der Partheyen / zubegegnen / hierinn die hernach stehende Ordnung auffrichten / vnnd derselbigen hinfürter zugeleben genedigist verfüegen wollen.

Erstlich da jemandt vmb Restitution einzukommen gedencket / solle er dasselbig / inner einem halben Jahr nach empfangnem Vrthel / Erkandtnuß / Abschied / Decret oder Rathschlag / (welches er mit beylegung deß gefertigten Abschiedts bescheinen solle / ) Item auffgerichtem Vertrag / bekom[m]ner Instrumenten vnd dergleichen / ins werck richten / da er aber disen angesetzten Termin verstreichen liesse / solle er weiters nit gehört / sondern dasjenige / darwider er sich zu Restituiren begehren wollen / inn sein Krafft / Würckung / auch vollkommne vollziehung / kommen / vnd gerichtet werden.

Damit aber zum andern / dißfals alle gefährliche verlängerung abgeschnitten werde / soll ein jede Parthey so vmb Restitution einkommen / vnnd zu Hof ein Decret an die Regierung erlangt haben würdet / dasselbig decret alsbald erhöben vnnd vberantworten / auch volgendts so wol bey der Regierung als andern Gerichten vnd Stellen / dahin die Sachen vmb Bericht gelangen möchte / seines thails also treiben / daß die abgeforderte Bericht vnd gutbeduncken / innerhalb drey Monaten / so gewißlichen vnd vnfählbarlich bey der Regierung einkommen / als im widrigen die Restitution gefallen sein solle.

Nachdeme aber / dise Restitutions Sachen / jeweilen dahero in etwas verlengerung gezogen / vnd der lauff der Iusticien verhindert würdet / daß die von den wenigern Stellen abgeforderte Bericht / anderst nit / dann in geseßnen Rechten erlediget vnd außgefertiget worden / So würdet zu abschneidung dessen / hiemit geordnet / daß ob gleichwol hinfüro / ein Parthey / die Landtsfürstliche oder der I:O: Regierung Decreta vmb Bericht inn Restitutions Sachen / ausser der geseßnen Rechten vberantworten wurde / jedoch die erledigung oder vollziehung deß Decrets, nit biß zu den geseßnen Rechten / verschoben / vnnd auffgehalten werde / sonder der Herr Landtshauptmann / Herr Landtsverweser / Richter oder Magistrat / von deme der Bericht abgefordert worden / mit zu sich ziehung zweyer oder dreyen / der anwesenden Herrn Landtleuht / Assessorn, Gerichts oder Rechtsverwandten / den begehrten Bericht verfassen vnd außfertigen / vnd an sein gehöriges Ort vbergeben lassen / vnd diß Orts auff ordenliche besitzung der Rechten / Gerichts oder Rahts nit warten solle.

Fürs dritte / solle keinem / der Verus contumax, das ist / welcher aigen: vnd muhtwilliger: oder auch fahrlässiger weiß / im Rechten / nit / wie sichs gebürt erschinen / sonder wider sich erkennen lassen / noch sein Contumatiam nit mit erhöblichen / denen Rechten zugelaßnen / vnnd in der Geschicht warhafften / auch genuegsamb bescheinten vrsachen / Purgiren vn[d] Justificiren köndte / die Ristitution vergönt oder verwilliget / sondern da hernacher in cognitione causae der gebettnen Restitution / so hierüber de plano angestelt würdet / sein muhtwilliges vnd gefährliches suchen vnd begehrn vermerckt wurde / nach grösse vnd beschaffenheit desselben / gestrafft werden.

Damit auch zum vierdten / den Rechtenden Partheyen / der vbereylung im Rechten sich zu beklagen / vnnd ihr suchende Restitution darauff zu gründten / oder damit zubeschönen / die vrsach vnd anlaß abgeschnitten werde / so sollen die Gericht ohne vorhergangne Citation, vnd dero genuegsamb erwißne Execution, auch vor geschechnes ruffen / (bey welchen Gerichten dasselbig herkommen) wider niemanden erkennen / sonder vilmehr dilation vnd schub / biß zu einem andern Rechtstag / oder würcklichen / doch kurtzen Termin erthailen / nichts desto weniger aber / dem erscheinenden Thail / beuor stehen / die Schäden / so er durch seines Vngehorsamen Gegenthails verlengerung vnnd Vngehorsamb / gelitten hette / in der Expens einzubringen / vnnd das Gericht darüber nach billichen Dingen zuerkennen schuldig seyn.

So ferr auch für das fünffte / jemandt sein suchende Restitution auff new erfundene Instrumenta vnd Brieffliche / zur Sachen nohtwendige vnd dienstliche Vrkunden / behelff vnd Documenten stellen wurde / derselbe solle solche Instrumenta vnd Documenta seinem Suppliciren pro restitutione, als gleich / beylegen / vnd darneben entweder mit seinem leiblichen Aidt / oder andern genuegsamen Beweißthumben darthuen / daß er dieselben erst hernach erfunden / vnd vorhero vber allen angewendten fleis nit haben köndten / vnd im fall gemelte sein angebne Instrumenta vnd behelff / nit in seinen / sondern eines andern Handen / verwahrung vnd gewalt wären / also daß er sie nicht gleich zuhanden bringen köndte / soll er doch von deme / bey welchem die Instrumenta ligen / oder doch von der Obrigkeit / vnter deren derselbige gesessen / genuegsamen Schein vnd Kundtschafft / neben vnnd mit seinem Suppliciren einbringen vnd fürweisen.

Welcher aber zum sechsten / vmb die Restitution mit fürgebung laesionis vltra dimidium Iusti praecij, metus, doli oder betrieglichen vberführung / Item Vngeschickligkeit / oder fahrlässigkeit seines Procurators / Gewalttragers oder Gerhabens / vnnd dergleichen vrsachen / darwider in den gemainen / oder auch diß Landts sonderbaren Rechten / Gewohnheiten vnd Freyheiten / andere vnnd ordinaria remedia fürgesehen / zugelassen oder geordnet seyen / einkommen wurde / dessen begehren solle nit statt haben / seitemahl ihme durch angeregte remedia ordinaria kan geholffen werden / vnnd dieselbige zugebrauchen beuor stehet / Es wäre dann sach / daß einer beweißlichen darthun köndte / daß ihme die berürte ordinari mittel zugebrauchen vnd fürzukern / auß erhöblichen warhafften verhinderungen benommen vnd vnmüglich seye.

Auff das aber / für das sibendte / solche Restitutions Sachen / mit guter Ordnung erlediget / vnnd dißfals die liebe Iustitia nit geschwecht werde / so sollen sie anderst nit / dann auff genuegsame vernemmung deß Gegenthails / auch deß Gerichts oder Magistrats / von welchen die Erkandtnussen / Decreta vnnd Rahtschläg / außgangen / oder wem sonsten der Handel / Hauptsächlichen berüren möchte / bewilligt werden.

Souil aber Schließlichen die Execution vnd Vollziehung der Abschieden / Erkandtnuß vnd Befelchen / auch Documenten, Instrumenten vnd dergleichen / darwider die Restitution gesucht würdet / belangt / weiln die Casus Indiuidui, vnnd sonderbare Fäll / vngleich / vnnd vnterschidliche vmbstände haben / So behalten Ihr Kayserl: Mayest: Ihr gnedigist beuor / solche Execution nach befundnen Dingen / gar / oder auff ein gewisse Zeit / zu suspendiren / oder der Execution ihren vngehinderten lauff zulassen.

Wo ferr aber ein Execution allberait vollständig verrichtet wäre / soll es gleichwol dabey verbleiben / doch alle alienationes, veränderung : vnd verkhümerungen der exequirten Güter / nach erlangter Restitution, ipso Iure verbotten / ja auch diß zugelassen seyn / daß im fall die exequirende Parthey / etwo auß genuegsamen vrsachen / dergestalt verdächtig wäre / daß der Gegenthail / wider welchen die Execution ergangen / hernacher deß seinigen / so ihme das weiter Recht geben möchte / nit habhafft / oder die Güter verthon / oder vnwührtlichen gehalten werden / vnnd was dergleichen erhöbliche bedencken mehr verhanden seyn möchten / auff solchen Fall mag vmb Arrest oder Sequestration der Exequirten Güter angehalten / vnnd dieselbe auff genuegsame bescheinung vnd erörterung / erlangt / vnd mitgethailt werden.

Es mag ein jeder so Behöbt / oder Entbricht / es sey in Landts: oder Hoffrechten / das nechst volgende Recht darnach in der Klag / in dern er Behabt / oder Entbrochen / seine Expens vnd Schäden / allein sie wären durch das Gericht in der Erkandtnuß oder Vrthel / auß beweglichen vrsachen auffgehöbt / ordenlich vnd particular weiß / in Schrifft doppelt einlegen / eines dem Gericht / daß ander dem Gegenthail / damit er darüber sein Einred / desto stattlicher thuen köndte / vberantworten / So sollen die / nach bayder Thail gethanen Einreden / durch das Gericht gemässiget / vnnd innerhalb sechs Wochen vnd dreyen Tagen dem Gegenthail zubezahlen verschafft werden / Da sich aber dieselb Parthey erbeut / dieselbige Taxirte Expens von stundan zu Gericht zuerlegen / oder aber dem Gegenthail stracks zubezahlen / so soll er sich derselben keines wegs verwidern / sondern anzunehmen schuldig seyn.

Wo aber ein Recht außgesessen würdet / vnd der / so die Expens erhalten / damit inn denselben Rechten / vor Gericht nit fürkombt / vnd zu Taxiren anrufft / so ist dieselb gefallen / krafftloß vnd nichtig worden / vnd es soll auch das Gericht in allweg dahin bedacht seyn / daß die Expensen fürderlich im Rechten abgehandlet / vnnd also keinem Thail / den andern muhtwilliger weiß / damit auffzuziehen / vnd in noch mehrern Vnkosten zuführen / gestattet werden.

Zu abkürtzung nun / deß langwürigen Rechtens / vnd abschneidung mehrern aufflauffenden Vnkostens / ist dises statuiert worden / daß auff die im Gericht vber Behöbnuß vnd Entbrechung Taxierte Expens / alsbald der Weißbott volgender gestalt erkennt / vnnd ihme die vollziehung anbefohlen / auch in dem Vrthel oder Erkantnuß / einverleibt werden solle / zum fall die aufferlegte bezahlung in denen benannten sechs Wochen vnd dreyen Tägen / nicht beschicht / daß alsdann der Weißbott vmb die schuldige Summa (welche im Vrthel auff Pfundt Gelts anzuschlagen) mit dem Ansatz würcklich fürgehe / Durch welches mittel / so wol die verlängerliche auffzüg / als die Super Expenß abgeschnitten würdet / Inmassen dann alle vnnothwendige Exceptiones auch ditsfals allerdings sollen abgestelt werden.

In Taxierungen der Expensen solle hinfüro / für Roß vnnd Mann deß Tags / sechs Schilling / einem Ertzbischoffen auff zehen Pferdt / vnd einem Bischoffen fünff Pferdt / einem Praelaten vnnd Herrn auff drey Pferdt / einem Ritter oder Edelman vnd Doctorn / auff zwey Pferdt / einem Pfarrern oder Priester / oder Burgern / auff ein Pferdt / vnnd einem gemainen Mann zu Fueß / deß Tags / 24. Kreutzer / vnd darzu was einer dem Schrannenschreiber vmb die Gerichtshändel / auch dem Weißbotten vnd Procuratorn / nach laut ihrer Taxordnung / geben / auff Bottenlohn vnd sonst andere wissentliche nottürfftige außgaben / gethan hette / Taxiert werden.

Gleichermassen soll es dißfals mit den Frawen vnnd Junckfrawen jeder nach ihrem Standt / mit den Pferdten inn der Taxierung / wie obstehet / gehalten werden.

Wie auch die Taxierung so wol im Hoff: als Landtsrechten / vnd also dißfals / weder zwischen den Gerichten noch Sachen / kein vnterschied gemacht vnd gebraucht werden.

Was aber die Schäden / sonderlichen in den Gewälten vnnd Entwehrungen / deßgleichen andere außgaben / schaden vnd saumbnussen / so auch etwo in die Expens Zettel im Landts: vnd Hofrechten eingebracht möchten werden / belangt / das soll jederzeit bey deß Gerichts beschaidenheit / vnd bewegnussen stehen / dieselben nach gelegenheit der Klag vnd Handels / sonderlich da jemandt vnbillich im Rechten vmbgesprengt / auch in wissentlichen Schaden / Nachthail vn[d] versaumbnuß vom Gegenthail gelaitet würdet / doch ohne allen vberfluß / zu Taxieren. Ob einer / er sey hoch: oder nidern Standts Klag oder Antworten vbergebe / alsdann soll der Schaden allein auff die Person deß wenigern Standts / so die Sach vbergeb / oder vbernemb / nach jetzt obermelter Taxierung gerait / vnnd bezahlt werden.

Nachdem aber etlich / so im Rechten zuklagen / oder zuantworten haben / ausser Landts vnd ferrnen weeg hieher zum Rechten zuraisen haben / vnd den Schaden groß achten / oder raiten möchten / ist allweg einem für ein Tag fünff Mail zuraiten / vnd in Expensen zu passieren.

Wo jemandt einen Ansatz bey Gericht erlangt / so soll der Weißbott denselben so weit vnd vil mit Recht vnnd Vrthel erkennt worden / auff die Güter / darauff er durch den / so den Ansatz erworbe[n] / oder seinen Gewaltstrager geführt würdet / jedoch nit inn wehrenden Rechten folgender massen ansetzen / Nemblichen für 50. fl behabte Summa / ein Pfundt Gelt / Herrn Gült / es sey Drucken Gelt / Wein oder Traidtgülten / oder Kuchelrecht / zuhanden deß Ansetzers einziehen / dieselben Gült vnnd Güter / mit ihren Diensten vnd Gefällen / fleissig beschreiben / vnd alsdann ihme ein ordenliche Execution vnd Vrkundt / vnter seiner Handtschrifft vnd Pettschafft / zustellen / Da aber dergleichen nit mehr verhandeln / folgents erst auff andere Haab vnnd Güter / als Weingärten / Mayrhoffs Gründt vnd Acker / Wisen / Haalten / Wälder / oder Höltzer / Vischwässer / Teicht / Gejayder / vnd andere Herrligkeiten vnnd Schlösser / dann auff Wein / Viech vnd andere Fahrnuß / vnd letzlichen wie von alters herkommen / gar auff ihre Verdienst / Besoldung / vnd in den Satel ansetzen / vnnd dem Klager / biß zu völliger billicher / doch vnübermässiger erstattung deß erkennten Ansatzes einantworten / hierunter aber für sich selbst / ohne erkandtnuß deß Gerichts nichts fürnemmen / vnd soll ihme zur Besoldung von einem jeden Ansatz / als offt von einer Meil / den Weeg hindan 2. ß. vnnd von einem Tag / als lang er die auffweisung führet oder verrichtet / in die Zehrung 4. ß. von Hauß auß / vnd wider zu Hauß gegeben / auch von einem gemainen Berueff / 2. ß.vnd vmb ein Lehen Berueff / ein Gulden Reinisch / vnd von der Ansatz Vrkundt / auch ein Gulden Reinisch / geraicht werden.

Nach deme aber bißhero / mit führung der Ansätz / allerley vnd nit vnbilliche beschwerden fürkommen / in deme dieselbige allein inn deß Weißbottens willkür / wie vnnd zu was Zeiten er solche führen wöllen / gestanden / dardurch dann ein arme Parthey / die würckliche befürderung / bey ihme Weißbotten etwann nit erlangen mögen / die Vermögliche aber manichmal nach ihrem gefallen / was sie begehrt erhalten / Deme nun fürzukommen / solle hinfüro dise Ordnung mit den Ansätzen gehalten werden / daß die jenigen Partheyen / deren Verschreibungen / Sprüch vnd Forderungen gleich / vnd keiner für die ander mit Privilegien / verschribner Vnterpfand vnd solchen qualiteten fürgesehen ist / derenthalben die gemaine geschribne Recht den vorzug oder prioritet zuelassen / der Ordnung vnnd Zeit nach / wie sie bey der Landtshauptmanschafft / mit Klag / nach außweisung deß products, ehender fürkommen / (welche alle inn dem Protocoll bey der Landtshauptmannischen Cantzley nacheinander / wie die Supplicationes eingebracht / ordenlich verzaichnet / vnnd dem Herrn Landtsverwesern inn den Rechten ein gefertigte Verzaichnuß oder Lista zu seiner nachrichtung / dauon angehendigt werden sollen) durch den Weißbotten angesetzt werden / vngeacht einer oder der ander / mit seiner Klag im Rechten eher fürkommen wäre / darmit hierdurch der Herr Landtsverweser / alles vnbillichen Verdachts / der befürderung halben entladen / vnnd vberhoben seye / vnd die Armen Partheyen / neben denen Vermöglichen / in einer Gott geliebten gleichheit / miteinander stehen mögen / welche Klager aber / mit ihrer Klag / bey der Landtshauptmanschafft einkommen / darauff auch im selben Rechten den Ansatz erlangt haben / vnnd doch solchen innerhalb zwey Monaten / nach auffhöbung desselben Rechten / nicht prosequiren noch ainige erhöbliche vrsachen / warumben sie solches nicht thuen könden / fürzubringen haben wurde / so sollen die andern / wie sie in der Ordnung hernach begriffen / mit ihren gleichsfals erlangten Rechten vnd Ansätzen / fürzufahren vnverhindert seyn.

Wo aber mehrerley Creditorn vnd Partheyen in einem Rechten behabt / vnnd aber zweiffel fürfiele / ob auch deß Schuldners Vermögen vnnd Güter so weit gelangen / daß alle behabte Glaubiger darauß bezahlt / vnnd deß jenigen / so mit Recht erhalten / vollkommenlich habhafft werden mögen / Vnd derenthalben zwischen den Partheyen / auff ihr im Rechten erlangte Behöbnussen / welcher vnter ihnen den Vorzug haben / vnnd vor dem andern angesetzt werden solle / stritt vnd irrung entstünde / sollen sie solche ihre stritigkeiten vnd deren jedes Behelff / noch in demselben Rechten Summarie fürbringen / das Gericht darüber erkennen / vnnd wie es mit dem ansetzen solle gehalten werden / entschidt / vnd erleuterung geben / auch volgendts derselben Gerichtlichen entschaidung gemäß / dem Weißbotten den Ansatz zuführen / befohlen vnnd obgelegen sein / vnnd ein solches mit nichten in seiner willkür stehen / noch dißfals der Reiche dem Armen vorgezogen werden / Im fall aber solche entschaidung / in denselben wehrenden Rechten / nicht beschehen wurde / sollen so dann berüerte Partheyen nach endung derselben Rechten / mit ihren strittigkeiten bey dem Herrn Landtshauptmann einkommen / vnnd vmb entschaidung anrueffen / welcher dann mit zu sich ziehung etlicher Herrn vnd Landtleuth / fürderlich vnd extra ordinariè darüber erkennen / vnd darauff dem Weißbotten die Vollziehung aufferlegt werden.

Nicht weniger soll ihme Weißbotten / auch dises / bey hoher Straff vnd verlierung seines Diensts / ernstlich iniungirt sein / da er in vermanglung der Pfundtgelts / auff Geschlösser / Mayrhoffs Gründt / Weingarten / Wälder vnnd Hochheiten ansetzen müste / daß er hierinnen keinen vbermässigen Ansatz führe / sondern allemahlen mehrers nicht dann doppelt / souil sich die Schuldt erstreckt / ansetze.

Dieweil sich auch jeweilen begibt / daß wider ein Parthey / welche inn disem Hertzogthumb nicht angesessen / noch begüetet ist / im Rechten behöbt / vnnd die Execution wider dieselbige oder ihre Güter durch Compasschreiben fürgenommen werden muß / vnd derenthalben von Weyland Ertzhertzog Carln Ihrer Kays: Mayest: geliebsten Herrn Vattern Christ: vnnd Löblichisten angedenckens / An. 1590. den 10. Aprilis / zwischen derselben dreyen Fürstenthumben / Steyer / Kärndten vnnd Crain / ein gewisse Resolution außgefertiget worden / so solle es derselben gemäß / hinfüro also gehalten werden / Als nemblichen wann sich begäbe / daß einer in disem Landt Steyer klaget / vmb Schulden / Gült / Güter oder Erbschafften vnd dergleichen / vnd solche sein Klag mit wissentlicher Ordnung Rechtens / vnd nicht sub: oder obreptitiè, oder per dContumatiam so weit gebracht / daß er die Behöbnuß / wider den Beklagten erlangt / vnd dem Beklagten in disem Landt souil Güter ligendt / oder fahrendt / nicht zustünden / daß die erkandte völlige Execution darauff möchte geführt werden / er Beklagte aber in den andern Landen / Kärndten oder Crain mit Gütern begabt wäre / solle der Klager mit nichten schuldig sein / daselbsten newe Actiones wider seinen Gegenthail anzustellen / sonder wann ihme ein gewöhnlich Compasschreiben / darinnen die völlige deß Klagers außständige forderung ordenlich solle namhafft gemacht werden / welches auch vnder dem Gerichtsstab (dauon in gemain alle andere Gericht außgeschlossen seyn) zufertigen / an das Schrannengericht in Kärndten oder Crain / erthailt würdet / solle der Klager bey disem oder dem andern / der andern Lande Schrannengerichten / Persönlich / oder durch Gewaltstrager fürkommen / sein allda inn Steyer behabt: oder auch declariertes Vrthel / mit dem Compasschreiben auffweisen / da sollen deß Klagers Sprüch für liquidiert vnnd als beym Schadenbundt jedes Landts versicherte forderungen angenommen / erkennt / vnd folgendts dise gebürliche schleünige handlung ervolgen / wann der Beklagte zuuor vnangesetzte Gült vnd Güter / in derselben Lande einem / hette / daß er nach gewonheit vnd gebrauch dises oder jenes Landts / auff eingebrachte Klag / auff Geschäfft citirt oder geladen / vnnd da er auff die Ladung im nechsten Rechten hernach erscheint / mit seinen Einreden / wann er ainige rechtmässige hette / fürzuwenden / gehört / darüber auch nach gestalt vnd gelegenheit derselben / erkennt / vnd weiter wie recht vnnd billich / verfahren / erscheint er aber nicht / solle derselb in contumatiam condemniert, vnd dem Klager ausser alles weitern Proceß / zur execution würcklich geholffen werden / Welcher jedoch auch hernacher in allen gemainen Ordnungen vnd Processen / in Kärndten / mit fürtragung der Pfandt / vnnd denen Einreden / auff die Pfandt / in Crain aber / mit Spänn vnd Erdtrich vnd was sonsten die Ordnung vnd gemaine Proceß / biß auff erlangten Schermb requirieren / solle geleben / vnd zuverhütung seiner selbst aignen Gefahr vnd Schadens / sich nach demselben Landtsgebrauch zu regulieren wissen.

Wäre es aber sach / daß gleichwol der beklagte inn Kärndten / oder Crain / Gült vnd Güter hette / die aber schon angesetzt wären / da mag nit weniger der Klager mit seinem behabten Vrthel vnnd Compasschreiben / vor dem andern Land Schrannengericht / welchem der Beklagte vnterworffen / erscheinen / auff die fürgetragne Pfandt ausser newer Klag / seine Einreden thuen / auch selbst Inhalt Landtgebrauchs / zum ersten / ander / dritten vnnd vierdten Rechten / Pfandt fürtragen / vnnd gegen Mennigklich so fürkommen würdet / nach Ordnung zu Recht vmb die prioritet stehen.

Ebnermassen reciprocè zuverstehen / wann einer im Landt Kärndten oder Crain / wider einen daselbst / mit Ordnung deß Rechtens klagt / vnd behabt / die Erkandtnuß aber / mangel der Güterhalb / vollständige Execution im Landt / nit möchte erraichen / vnnd solcher Klager / wer der nun seye / mit einem gerichtlichen Campasschreiben für die Steyerische Landtschrannen / da er noch wäre begüetet / kombt / vnd die Execution wider den Beklagten begehrt / solle ihme der Ansatz / nach vorgehender ordenlicher Citation deß Beklagten (die ihme entweder vor / oder da er zu spatt keme / noch in das wehrende Recht erthailt werden solle) allermassen vnd gestalt / wie obverstanden in Kärndten vnnd Crain / gegen einem Steyrer zuhalten / erkennt werden / doch daß er nach bekommnem Ansatz den Weißbotten / auff solche Gülten vnd Güter führe / die zuuor nicht angesetzt oder gepfändt seyn / vnnd sich darauff mit dem ersten / andern vnd dritten Anbott / auch schätzung der angesetzten Güter / zu dreyen Rechten / biß zum vierdten Recht / darinnen er den Landtschermb erlangt / dises Landts Gerichtlichen Ordnung allerdings gemäß / verhalte.

Dabey Schließlichen auch / wann es in einem andern oder dritten Landt zu solchen Fällen mit den Compasschreiben / vmb würckliche Handtbietung mit Gerichtlicher Execution wurde gedeyen / alle verlengerungen im Rechten abgeschnitten / vnnd ainiger Exception wie auch keinem anruffen vmb erthailung ferrnerer Schüb / nit statt gethan / die Appellationen gar gewaigert / vnd alle gefahr vnd argelist / wie die möchten zuerdencken seyn / abgestelt / vnd verhüetet werden solle.

Vnd solle die obstehunde Ordnung in der Grafschafft Görtz / Triest / vnnd andern ihrer Kayserl: Mayest: deren enden ligenden Hauptmanschafften vnd Gerichten / ebenmässig gehalten werden. Wie dann eben dise Ordnung auch in dem Ertzhertzogthumb Oesterreich Ob: vnd Vnter der Ennß / gegen gedachter Ihrer Kayserl: Mayest: Landen / vnnd vor disen / gegen Oesterreich reciprocè inn vebung gewest.

Vnd dieweiln bißhero diejenigen welche vmb klagter Schulden / gemässigter Expens oder anderer dergleichen Rechtlichen anforderungen wegen / ainigen Ansatz auff jemandts Haab vnd Güter bey Gericht erlangt / vnd darauff durch den Geschwornen Weißbotten nach Ordnung Rechtens / angesetzt worden / daß Anbott / mit fürtragung der Pfandt / bey Gericht / zu dem nachfolgenden Rechten / oder wann es ihnen gelegen gewesen / thuen mögen / welches aber dem Aigenthumber vnnd Beklagten / auch andern Creditoren zu höchsten Schaden darumben geraicht / daß es gleichsamb in berüerter Parthey willkür stehen solle / wann / vnd zu was Zeiten sie das Anbott thuen wolten / dardurch ihnen diser Vorthel eingeraumbt wurde / daß sie zumal diejenigen / welche gute Güter Innhanden / angeregt Anbott wol nimmermehr oder doch vber vil Jahr erst / wurden ergehen lassen / Damit sie der angesetzten Güter / desto lenger zu ihrem Nutz vnnd der andern Schaden / zugeniessen hetten. Disem nun fürzukommen / so solle hinfüro ein jeder Klager / nachdem er die Behöbnuß erlangt / vnnd durch den Weißbotten mit guter Ordnung angesetzt worden / vnd also in würckliche Posseß kommen / schuldig vnd verbunden seyn / die nechsten hernach volgende zwey Recht / nachdem er angesetzt worden / seine zwey Anbott fürzutragen / Da er aber solche Anbott nit nemmen wolte / so können alsdann die Nebengelter oder die Concreditorres / denselben zu solchen Anbotten dringen / vnd durch ernstliche Gerichtliche mittel darzu halten / Darauff solle dem Gegenthail / welchem die angesetzten Güter aigenthumblich zugehörig / zum ersten vnd andernmal / das ist zu zweyen nechst volgenden Rechten nacheinander geschrieben werden / seinem Gut zu hilff zukommen / vnd dasselbig abzuledigen.

Im fall aber derselb solches zwischen hin / vnnd deß andern Rechtens / nicht thete / alsdann soll der so angesetzt worden / vmb verordnung etlicher Commissarien zu berüerten andern Rechten / bey Gericht anhalten / vnnd anrueffen / die sollen auch von Gericht geordnet vnd inen aufferlegt werden / solche angesetzte Güter / nach billichem vnnd getrewem wehrt / darumben sie zur selben Zeit / wol hinzubringen wären / zuschätzen vnnd zubetewern / darauff solche Schätzung bey Gericht zu dem volgenden dritten Rechten verwahrter eingelegt / darüber erkennt / vnnd alsdann vmb den Landtscherm angerueffen / der ihme Klagern auch / von Gericht ervolgen vnd gefertiget werden solle / Doch wo ferr sich befindet / das berüerte angesetzte Güter ein mehrers werth / als sich der erkandte Ansatz erstreckt / auch der Vnkosten / so ihme auff ersuchung der Anbottbrieff / vnd die Commissarien aufferlauffen wurde / der ihme in allweg / doch nach Gerichtsmässigung passiert werden solle / dieselbige vbermaß / hat der / deme die Güter aigenthumblich zugehören / oder seine nächste Erben zuersuchen / auch wo jüngere Schulden oder Ansätz / gegen denselben verhanden / mögen sie darzu ihr ansprechen billichen wol stellen / im fall sich aber der Aigenthumber der Anbott / nach der Behöbnuß oder dem geführten Ansatz / alsbaldt / oder ehunder begeben wolte / so mag die Schätzung vnnd anders / auff obstehenden weeg / alsbaldt auch fürgenommen vnnd gehandlet werden.

Die Lehensherrn so im Lande Steyer / Lehen zuverleihen haben / vnd dieselben leihen wöllen / sollen dem alten herkommen nach / ihre Lehensberueff / vier Rechten nacheinander / darinnen Tag vnd statt der verleihung / wie Lehens Landsrecht vnnd von alter herkommen ist / benennt werden / Persönlich oder durch Gewaltstrager / vor Gericht thun lassen / sie seyn auch schuldig dieselben in aigner Person / oder durch ihre gevollmächtigte LehensPröbst im Landt / zuverleihen / ohne das solle kein Lehen vermant / oder verfallen seyn.

Vnnd ob sich zutrüeg / daß die verleihung auff den Tag / wie die berüefft vnnd angesetzt ist / auß verhinderlichen vrsachen / ihren fortgang nicht gehaben möcht / solle dieselb Ehehafft vor Gericht angezaigt / vnd durch offen Brieff / in etlichen Stätt vnnd Märckten im Landt Steyer / offentlich angeschlagen werden / auff daß die Lehensleuht der erstreckung / ein wissen haben mögen.

Ob dann die Lehensleut / auff bestimbte Zeit / die Lehen nit besuchen vnnd empfahen wurden / sollen die Herrn nicht minder schuldig seyn / dieselben auff der Lehensleut anrueffen / inner Jahrsfrist / nechst nach solcher bestimbter Zeit / deß angesetzten Lehens Tag / zuraiten / zuverleyhen / beschicht das nicht / so mag der Lehensherr die vnersuchte Lehen / als vermant vnnd verfallen / doch zuuor mit Recht / als Lehens Landesrecht ist / einziehen.

Wo zu zeiten die Partheyen obernänter Artickel halber / eines oder mehr / irrig wurden / vnd die einer anderst als der ander / verstehen wolten / darinnen sollen sie von dem Herrn Landtshauptmann / Herrn Landtsverweser / Beysitzern / auch andern anwesenden Herrn vnnd Landtleuthen / doch in allweg zu deß Herrn vnd Landtsfürsten / gnedigister Ratification, erklärung vnd entschidt nemmen / vnnd soll das Gericht in allweg darauff bedacht seyn / ob diser Gerichtsordnung / in allen Puncten vnnd Artickeln / vestigklich zuhalten / vnd darwider zuhandlen / oder anderst wie es der klare lautere Buchstab vnd der erbare Verstandt mit sich bringt vnd vermag / zu deuten vnnd zu glossiren / niemandt gestatten / sonder gegen den Verbrechern / sie seyen hoch: oder nidern Standts / so wider solche Ordnung muhtwillig handlen wurden / die gebührliche Straff vnd Execution fürzunemmen / vngefährlich. Sonst solle das gemelte Landtsrecht in allen andern Artickeln / so oben nicht angezaigt noch erklärt seyn / bleiben / vnd gehalten werden / wie von alters herkommen ist / Auch nach Innhalt vnnd vermög deß Landts Freyheiten / Handtvesten vnd Gulden Bullen / Alles trewlich vnd ohne gefährde.

Vnd was in den anhengigen Rechtsachen / bißhero nach Innhalt der alten Landtsrechts Reformation gehandlet / dabey soll es allerdings bleiben / hinfüro aber / vnnd nach Publicierung diser jetzigen newen Gerichtsordnung / solle jedermännigklich in den allberait angefangnen vnnd Recht anhengigen / auff künfftigen Rechtssachen / in allweg derselben gemäß verfahren / auch darnach geurthailt vnd erkennt werden.