Item welcher die march oder rainstain verkörte oder ausgrueb, den sol man an die stat, da der marchstain gestanden ist, mit dem haubt unz an die gurtl eingraben und die fuess auskern. desgleichen wer ain marchpaumb abschlecht, den soll man mit dem hals auf den stock zwicken.

Item welche zeun oder einfeng zu nachent sezen oder uberrainen, die sein darumb v libra lx denar verfallen, darzue den gethan schaden ablegen.

Item wer dem andern wissentlich zu nahent etzet, so man das viech begreift, das ist damit verfallen.

Item wer dem andern fræventlich fuͤrwart, den soll man darumb an leib und guet straffen.

Item wer dem andern sein holz abschlecht ân urlaub, der ist dem das holz ist als oft für einen stamb v libra lx denar verfallen.

Item wer wildprath oder genistpaumb zu nachent schlecht, der ist darumb v libra lx denar verfallen.

Item es soll auch kain waidman dem andern in seinem bstant und gjaid geen oder er ist dem selben den dienst und demselben unserm lantgericht lxxij denar verfallen.

Item umb geltschuld soll man dem clager inner vierzehen tagen ein benuegen thuen.

Item die mullner in dem lantgericht halten und fueren mit metzen und stuppstaͤfflein nach wissen der nachperschaft ungeverlich; welcher das nit thæte, den soll man darumb an leib und guet straffen, man soll auch mulln jærlichen besichten.

Item es soll ein jeder waag und maasz halten wie von alter ist herkomen. wer das nicht thaͤte, der ist v libra und lx denar verfallen.

Item ain jeder in demselben unserm lantgericht gesessen, soll von den weinen so er an dem zaphen ausschenkt unsern ungeltern so je zu zeiten von uns darzue gesezt werden oder wer unsern ungelt in demselben unserm lantgericht von unsern wegen einnimbt, den ungelt reichen und geben. wer das nicht thæt, der ist demselben unserm ungelter den wein so er schenkt und dem obgemelten unserm lantrichter xx ungrisch gulden zu peen verfallen.

Item welche ir schwein zu rechter zeit nit ringlent, die sein darumb lxxij denar verfallen.

Item wer ainem an seinem hauß und venster lost, den soll man straffen als darzue gehoͤrt.

Item wo einer in sein hausz gejagt wurde, so er under den dachtrophen kumbt, so soll im sein widertail nit nachkumen bei v libra und lx denar.

Item wo sich ein aufruer in einem hauß begibt, wer dann ein fridt rueft von gerichtswegen, was der dem gericht punt darauf sezt, die sollen kraft haben und der fridt gehalten werden. wer das verbricht, der ist den punt vellig.

Item wer unzucht und aufruer macht, der soll gestrafft werden, namblich von ainem schuß mit einem armbst v libra lx denar.

Item von einem schlag mit einem spieß v libra lx denar Item mit einem knütl idem libra lx denar Item von einem stainwurf Doch soll man sich dar innen halten nach gnaden. v libra lx denar Item von ainem maulschlag v libra lx denar Item mit zugethaner hant lxxij denar Item von ainem messer zucken xxiiij denar Item von ainem schwert zucken xxiiij denar Item von verpottnen worten lxxij denar Item von allerlei geschlechten fræveln lxxij denar Item von einer pluetrunst, macht davon zu peen i libra denar

Item von der malefiz und ander grober unzucht wegen soll di straff beschehen nach gelegenheit der sachen mit erkantnuß des rechten, wie hernach begriffen ist.

Von erst was sachen sein, darumb ainer den todt oder ander leibstraff verschuldt hat, wirdet der thæter darumb von jemant so der sachen zu than hat anclagt umb di leibstraff oder aber umb kerung und abtrag, darumb soll unser lantrichter dem clager recht lassen ergeen als von alter herkomen ist und wo di that zu dem beclagten mann darbracht wirdet, soll es mit dem wandl das demselben unserm lantrichter zuegehoͤrt gehalten werden als es von alt her damit gehalten ist worden. wo aber ainer begriffen wirdet der den tod verdint(?) oder ander leibstraff verschuldet hat und von niemants darumben angesprochen wirdet, den soll derselb unser lantrichter von ambtswegen am leib nach gelegenhait seiner verhandlung, es sei mit dem todt oder mit ander leibstraff, mit dem rechten und nit an dem guet, straffen und soll umb solch peen und straff mit recht erkennen lassen. unt so ainer mit dem todt gestrafft wirdet, soll es mit seinem gelassen guet gehalten werden als von alter herkummen ist. wo aber ainer nach gelegenhait seiner verhandlungen umb guet gestrafft wirdt, dem soll dabei gesagt werden, das ehr furan solche mißhandlung meide. wirdt er dann in mißhandlung verrer begriffen, so soll er alsdann am leib und nit an guet gestrafft werden, als di raiszjeger, von den bisher alle jar wandl genamen werden, dardurch si dann in irer ubltath und miszhandlungen beliben sein.

Item was phening, vall und wandl so voran nit gemelt sein, darumben sich unser lantrichter mit dem gewandleten man an den gewondlichen wandlsteten nit verainen mag, das soll zu Irning in der lantschranne mit recht außtragen werden, dar inn in derselb unser lantrichter kain irrung thun soll. zu solchen rechten dann derselb unser lantrichter zwoͤn von Rottenmann, zween von Schladming und von Aussee, auch die trefflichsten ambtleut, und eltisten auch vernunftigisten aus der paurschaft in demselben unserm lantgericht gen Irdning ervordern soll. dieselben die sollen demselben unsern lantrichter umb all vaͤll und wandl erkennen, und was si umb jede ubelthat und mishandlung zu wandlen und vall erkennen, das soll derselb unser lantrichter und nit mer nemen, von den so demselben unserm lantgericht sein vellig worden, das wandl inner xiiij tag nachst darnach koment demselben unserm lantrichter ausrichten und geben. thuet er des nicht, so mag unser lantrichter nach den vierzehen tagen sich seines guets mit wissen der nachperschaft so vill underwinden als das wandl bringt. lost er dann dasselb sein guet mit dem wandl inner vierzehen tag nit, so soll unser lantrichter das phant darnach in negstem landsrahten offentlich austailen und verkaufen dem so am maisten darumb geben will; und so das phant hocher verkauft wirdt dann das wandl bringt, soll er dem gewandlten man di ubermasz hinaus geben. und sollen die so am rechten sizen unserm lantrichter an unser stat all schweren, ainem jeden, dem armen als dem reichen, ain gleichs und rechts recht zu sprechen und niemant dar innen uberhelfen weder von muet, gab, freuntschaft, neid noch hasz wegen. was aber demselben unserm lantrichter in dem bemelten unserm lantgericht ausserhalb peen und wandl zuesteet als von dem, so das sein recht treiben und ander sachen und das von ime emphahen müessen, damit soll gehalten werden als von alter herkomen ist und soll er dar inn wider alts herkomen niemant hocher dringen noch beschwœrn. wo aber derselb unser lantrichter und die partei in den obgemelten articln oder sonst von des alten herkomen wegen in irrung und zwitracht sein, darumb sollen die beisizer zu Irning erkennen und daselbst austragen werden was das alt herkomen ist. und was auf das recht und beisizer zu Irning geen will, soll auf die gerichtsleut daselbs im Ennstall gemainklich geschlagen und von inen bezalt werden. doch soll es darinnen also gehalten werden, das ainer wider den andern in solcher irrung nit beschwœrt werde. und verpieten darauf allen leuten so in dasselb unser lantgericht gehœrn, das si furan kain besamblung haben sollen weder mit weer noch ân weer, si werden dann in sonderhait von unserm lantrichter darzue aufervordert. wurden si aber daruber ainicherlei besamblung haben, darumb soll ein jedlicher so in solch besamblung ist uns als herrn und landsfuersten hundert phunt phennig unablaͤssig verfallen sein. und soll dise unser ordnung und sazung all jar ains zu Irning, ains zu Aich und ains zu sand Lorentzen in demselben unserm lantgericht derzeit ains werden geruckt und verlesen und diser unser brief, so wir unserm lantrichter zu Wolckhenstain erlegt haben, bei unsern getreuen N. dem richter und rat zum Rattenmann erlegt werden, di dann in behaltnuszweisz inner haben, und als oft es den leuten in demselben unserm lantgericht not beschiecht, hœren lassen und widerumben zu irn handen von unsern wegen nemen sollen. doch behalten wir uns unsern erben und nachkomen in obberuerter unser ordnung und sazung bevor, die zu mern und zu mindern zu verændern und genzlich abzethun und zu widerrufen wie uns das gefellt ungeverlich. mit urkunt des brives geben zu Graz am sonntag vor liechtmesse im vierzehen hundert acht und sibenzigistem, unsers kaisertumbs in sechs und zwainzigisten und des romischen im acht und dreiszigisten und des hungrischen im neunzehenden jaren.

(Commissio domini imperatoris in consilio).