Dez ersten, swer der ist • der einen schedlichen man in die bant bringet
• der sol dem Rihter zehen pfund haller verpuͤrgen • vnd hat er sehs
cristen man zv im mit den mag er in berehten • vnd en sol in allen weder
ban noch ahte noch Keynerlay sache dar an schaden • Ez hat auch der
anclager gewalt das er den schedlichen man mit geschray oder on geschray
fuoͦr mag bringen • vnd der clager sol in bringen von dem buͦtel •
vnd der rihter sol den schedlichen man bestellen • vnd bewaren biz dem
anclager gerihtet wirt.
Wer das ein vzman mit einem burger zetruͤge • vnd chomen die anderen
purger dor zu geloffen dem selben purger ze hilf vnd durch kein ander
veintschaft • die werden niman dar vmbe keyner bezzerung schuldig •
Vmbe die fliͤzzend wnden swer die tuͦt • der wirt zwen vnd
viͤrzig pfennige der haller schuldig dem den er also verwunt hat •
vnd das artzet lon • vnd sin saumsal • vnd die Kost • biz er gehailet
sol er auz rihten nach guͤter gewizzen • des selben oder mit rat der
burger vnd dem Rihter sehtzig pfenninge vnd das wafen mit dem er den
schaden getan •
Swer den andern lemt • dar wirt vmb die minner lem funf pfund haller im
schuldig • vnd umb die groͤzzern lem zehen pfund haller • vnd das
artzet lon • vnd die Kost • vnd die savmsal biz er gehailet • vnd
sehtzig pfennige dem rihter •
Swer den andern beschiltet mit sogetanen worten • das er im sein
christenheit versaget • der wirt im funf pfund haller schuldig • vnd dem
Rihter sehtzig pfenninge •
Beschilt er in mit andern Worten • so wirt er im schuldig sehtzig
pfenninge • vnd dem rihter als vil.
Swer den andern bechuldiget • also das es im an sein er gienge • der
wirt im schuldig sehtzig pfenninge • vnd dem rihter als vil • vnd sol ez
offentlichen ander kantzeln wider ruͦfen • ez sey man oder frawe •
Hat ein purger mit einem auzman zeschaffen • der rihter enmag im an des
purgers wort kain geleit geben •
Die purger von dem rat haben wol gewalt vber flaisch • vber brot • vber
fluͤr • vber das vihe • vber hirten • vber alle ander sach der stat
nuͦtzleiche vnd notduͤrftig • zesezen vnd ze machen swas si
guͦt dunket • vnd das selbe sol auch craft haben • [Seite 184]
Swer den andern ansprichet vmb gelt der sol seyn laugen nemen • er welle
in denne vber komen selb dritte • wil aber iener da wider sten mit siner
bewerung • so en mag er nihtes bezivͤgen •
Kain witwen • noch kain junckfrawen umb kain gelt mag man vber zivgen •
noch kainen gaistleichen man.
Swer geltes auf einem toten man giht • der sol ez selb sibende behaben
vf sinen grabe oder vor gerihte • ob die erben • vnd die die div sache
an gat weͦllen • es sei denn daz er der selben laugen welle nemen.
Swer belivmvͦnt ist swar vmbe das sei • des laugen sol man niht
verslahen • vnd sein reht dar vmbe nemen • alle die weile er vngebunde
vnd vngevangen ist.
Swer ez eyner frawͦn missebiuͦt oder si vbel handelt der wirt
zwivaltiger buͤz schuldig • vnd si herwider • das selbe ob si iemant
vbel handelt • vnd dem rihter mit ainveltiger buͤz.
Swem bruch an ayden wirt • der wirt ie fuͤr den ayt dem rihter funf
pfund haller schuldig • vnd ist der sache dor zv vervallen.
Swer sein wirtin • sein kint • sein ehalten beschiltet oder strafet mit
zeitleicher straf swo das ist • der wirt niemant schuldig dar vmbe.
Kaines mannes wirtin mag sich versprechen vmbe kain purgschafft an irs
mannes wort • ob auch das wer • das si also in gelt verviel • so ist ir
man nihtes schuldig fuͤr si zegeben • danne als verre als ir gebende
zivhet • da mit si an dem mantage ze kirchen vnd ze strazzen gat.
Swer die zwelf lubt an iren ayden • der wirt ir ietleichen sehs pfund
haller schuldig • vnd dem rihter sehtzig pfenninge.
Swenn eyn purger vf den andern leistet • der sol haben vnd nemen • zv
dem tage zwaie mol • ane an vastagen • so sol er nemen nivr eines • vnd
sol ie nach dem mal vertrinken einen pfennig • vnd nit mer • vnd vor dem
mal ainen pfenninge.
Wirt ein gelt erclaget vf einen purger • der nith z gelten noch
zeverpfenden hat • so ist geboten von gerihtes wegen swer in hvset oder
herberget nach den nehsten drein viͤrzehen tagen der sol fuͤr in
gelten • [Seite 185]
Verspilt sich eines purger kint oder kneht oder ein ander sein ehalt •
oder verkugelt er • oder swie er ez verleuset • dem sol man wider geben
alles sin gewant • das er mit der guͤrteln begriffen hat •
Swer purgerreht empfahen wil • der sol verpuͦrgen mit zwain purgern
zehen pfund haller • vnd sol geben dem amman sehs vnd dreizzig pfenninge
• vnd den purgern ain pfund • vnd wil er vz varen inden nehsten drien
iar dar nach so muͤz er geben zehen pfund haller ob er ledig wil
werden • sines aydes • nach den drien iaren so geit er nihtes ob er auz
vert •
Alle affterwet sint abe genomen vnd habent kein craft.
Swem fur geriht geboten wirt • a1s offte er das versavmet frevelleichen
• als offte ist er dem rihter sehtzig pfenninge schuldig •
Der rihter sol auch ze keinem purger versuchen • noch kein clag im
schopfen er hab denne einen clager bi im stan der clage vnd iehe das im
schade wider varn sei •
Von aller ersten haben wir das reht das wir inden vier tagen der vasten
ze nehste vor dem weizzen suntage • von alter gewonhait • den rat
besetzen alle iare • also das man der gemeinde zesammen bringet die dor
zv nuͤtze vnd guͦt ist • so man maist mag • vnd auz den nimt man
zweinzig oder dreizzig • oder als vil man zerat wirt • vnd geit den
gewalt zenemen hintz iren triwen zwene an den rat • vnd die selben zwene
swerent den rat • ze verswigen das man versweigen sol • vnd daz reht
zesagen • on alles geverde • vnd avf den selben ayt nement die selben
zwene • von ersten einen zv in • der swert als die selben zwene • vnd
die drei nement denne aber zwen • vnd also nement si ie zwene biz si
dreizehen gesamen vnd die dreizehen nement denne vz der gemainde erber
lute zv in als vil vnd si guͤt dunchet vnd nuͦtze • Vnd die
besetzzen denne mit ein ander • allev div gesetzet vnd ampt die si des
iares halten wellen • vnd das bestet auch vnd hat craft daz selbe jar •
Vnser gewonhait ist • das vz den dreizehen ie einer froger ist vier
wochen vnd nach den vier wochen so gibt ers ie einem andern vz den
dreizehen swem er wil • Vnd derselbe frager hat gewalt den purgern
zesamen zegebieten • vnd inden rat vnd auz dem rat ze bringen swaz der
stat vnd armen luten not ist •
Swaz guͤtes in vnserr mark gelegen ist • swer das hat ez sei im
gegeben oder verkauft • vnd man es von alter verstivren sol • der sol ez
auch verstivren vnd verdinen indem rehten als ander purger ir gut
verstiuren vnd verdiͤnen •
Wer daz • daz iemant inder mark vf sinem aygen ein selgeret schuͤf •
so muͤgen sein erben das selbe abgelosen • ist ez ain pfund geltes
vmb zehen pfund haller • vnd in dem selben satze ob ez minner oder mer
wer • vnd sol man ez an legen anderswo vzzerhalb der mark • wolten es
aber die erben niht losen • weder heten es zeloͤsenne • so hat die
gemeinde gewalt ze loͤsen indem selben rehten •
Vnserr stat reht ist swer bei vns gesezzen ist inder stat • das er mit
vns stivren vnd dinen sol on den pfarrer • vnd swaz zv seiner widem
gehort • vnd an den ampman • vnd swaz ritter bi vns gesezzen wern der
verstivret niht swaz er vzzerhalb der mark hat •
Swer auch bi vns sitzet • der muoz mit vns wachen on allein der pfarrer
•
Vnser reht ist vnd gewonhait daz man niemant kain inciht beziuͦgen
mag • ez sei denn daz man ez des selben jares gesetzet habe in dem rat •
vnd wirt ez gesetzet • so beziuͦget man einen als den andern mit der
zwelfer einen • er sei rat oder vz dem rat •
Swem der amptman seyn geriht enpfilhet den muͦgent die zwelf an den
rat nemen ob si wellen oder niht •
Swer den andern ansprichet vmb schaden • da ist man keiner beweisunge
vmb schuldich ez sei denne vmb juden schaden • vnd vmb laistung • ez
welle denne iener mit sinem rehten darfuͦr sten • swas andern schaden
ist • so sol der den man ansprichet • vmbe laugen oder jehen •
Swer den andern an clagt vmb gelt ez sei vil oder wenik • ist er im
vnlaugenthaft • so ist er im keines rehten schuldig dar vmb • noch mag
iehen daz er in an dem selben gelt vbernomen habe •
Swer vnzuht tut in vnserm gerihte ez sei mit worten odermit werchen wirt
er begriffen der muͦz bezzern nach der stat reht •
Swelich gast wein bringet zv vns der sol in verchauffen oder fuͤrbas
fuͦren vnd sol in nidert ein legen • wil aber er in verschenken daz
sol vf der achs tuͦn oder an der strazzen •
Swelich vihtreiber vihe samet der sol ez niht lenger haben biͤ vns
denne aht tage • vnd die selben aht tage sol ez mit der purger vihe gan
• oder sol im nach gan niht vor •
Vnser stat ist mit dem rehten vnd mit der gewonhait von alter biz her
kvͦmen • Swelch purger sogetan missetat tuͤt • da mit er den leip
ver worth het • wirt er ander schulde begriffen • so muͦz er mit dem
rihter vnd mit anclager nach gnaden taydingen • ob er des stat an in
vindet • Wirt aber er niht begriffen • so sol man wibe vnd kint da rvmb
niht enterben • vnd sint der missetat niht schuldig zebuͤzzen • si
heten denn schulde rat oder tat dar an gehabt • des si mit einem rehten
niht gelangen moͤhten •
Wer das zwene oder mer vnzuht eynander erbuͤten mit vorten oder mit
werchen • vnd wolt das dem gerihte verhelen vnd versweigen • so hat der
rihter den gewalt daz er sie mit dem rehten benoͦten mag • daz sie
einander beclagen muͤzen • oder si muͦzzen bede swern das si
einander niht getan haben •
Vnd ist das • daz ein purger mit seinem zinsman ze krige wirt vm den
zins • So hat der herr den zins gewalt zehaben vnd der lantses niht •
wil aber der herr so lat er den lantsessen selb da fuͤr den zins
stent •
War daz aber eyn lantses seinem herrn das zins gut aufgeben wolt • daz
des lantsesen herb waͤr vor armuͤt • so ist im der herr niht
gepund auf zenem diͤ weil er pfant dazz im vͤmb seinen zins vinden
mak •
Waͤr daz ein schedlich man in eins purgers haus geflohen kuͤm •
hilft im der purger hin e daz daz geriht koͤm • do ist er nimant nit
schuldig vm • kom aber das geriht die weil der schedleich man dinant
weir • so sol der purger dem geriht auf slizzen sinev sloz vnd sol in
lozen suchen wa er wil • vnd ist dem geriht nit mer gepunden •
Waͤr daz ein man suͦn oder tochter het • laet er in aigen oder
lehen • so herbent siͤs mit eyn ander gleich • .
Swer den andern heimsuchet auf seiner hofrait • der wirt im schuldik dem
dez daz aigen ist funf pfund haller • vnd dem rihter sehtzig pfenninge •
ist aber daz das sich der krieg auf der hofrait erhebt • so ist man
nieman kainer heimsuch schuldig •
Es sol auch kein purger den andern auf andrev geriht laden noch bringen
dann vm geistlich sach •
Waͤr daz ein purger dem andern geltes schuldig war • ist er im an
laugen • so mag er in mit fronboten verpfenden • ist dar vmb niemant
nizz schuldig • wert aber sich der gelter pfanz so wirt er dem rihter
sehzig pfenning schuldig •
Kain purger mag dem andern gelt verbiden •
Swer dem andern verpfenden wil • der sol haimsen swas man treiwen oder
tragen mag • laet er ez vngehaimst • vnd kumt ein andrer hernach dem er
auch schuldig ist • haimst ez der • der ist dem erern nihtz schuldig •
den ob er hith vber blib • swer daz mit dem rehten erachet der ist aber
der naechst •
Swer den andern pfendet an fronwoten swaz pfanz er im nimt daz sol er im
mit der swizpil wider keren •
Es ist ze wissen daz auff heut sanct Philippen vnd sanct Jacobs abent
apostolorum das was am nächsten freytag vor Walpurgis Anno domini Mo CCCCmo Quadragesimo quinto von
jnnerm vnd ausserm Rate hie zu Weissenburg vestigklichen angesehen und
ebigklich zehalten gesetzt ist das fürbas jnebig zeit die Eniclein die
jr vater oder muͤter verlorn habe • an enpfachen jrs anherrlichen
oder anfrälichen erbs gleichen teil nemen söllen mit jrn vettern oder
öhemen der Eniclein sey eins oder mer doch jr wär vil oder lützel So
nemen si doch alliv nur alz vil alz jrn vater oder muter nach rechter
antzal gepurte ob si den erbteil selbs erlebt hätten.
