Allergnedigister herr, die trungende euserste nott, darin ich mich wegen noch stätter außbleibung des höchstnottwendigen, verordtneten wexelbrieff befunde, zwingt mich e. Mt. nicht allein mit underschiedlich allergehorsambisten schreiben wie biß dato beschehen, sondern auch mit gegenwertig eignen currier zu behelligen, dan geschweigendt, das ich mich alberaith weit uber die acht monath, auf welche ich mein underhaltung empfangen, auf diser reiß befunde und hiesiger ortten ungewöhnlicher teurung taglich dermassen zuenimbt, das man nur zum exempl das pfund fleisch, so man zu meiner hieher khunfft umb zwölf aßberl bezalt, anjezo umb 30 erkhauffen mueß, welcher proportion nach alle andere sachen gestiegen, so tragen sich täglich, ja stündtlich durch unverhoffte veränderung der officier solche nothwendige gelegenheiten, praesent und schenckhungen außzutheillen, zudem ich einmal nicht weiß, wo ich ein oder auß solt.

Wie dan gantz unverhofft gestriges tags der obrist vezier, Ali bassa, auß bevelch des türggischen khaysers stranguliert und an sein statt ein anderer obrist vezier gemacht worden. Und weilen derselbe in kürze mit der soldatescha fortziehen soll, alß ist beinebens ein caimekam oder statthalter, welcher in seinem abwesen alhie residiern solle, verordtnet worden. Disen zweien müessen alle hie anwesende bottschaffter den alten brauch nach mit ansehentlichen praesenten gratuliern, dan welcher solches underliesse, allerley schimpff und vervolgungen zu gewartten hette. Waß ich nun hierzu für mittel habe, das weiß Gott der allmechtig. Der verzeihe es dem ienigen, so daran ursach seindt, das mir der wexelbrieff nicht zue rechter zeit zukhomben, dan ich durch mittel desselben unzweiffentlich mein expedition von hinnen ehunder, alß die Türckhen wegen ihr Mt. kriegs praeparatorien in suspicion gerathen werden, wolte bekhomben haben, dardurch dan nit allein dise, sondern vilmehr andere ungelegenhaiten, deren ich stündtlich alhie bey so unversehner mutation der ministern zu gewartten, weren verhindert worden.

Weilen dan, allergnädigster khayser und herr, die sachen oberzelter massen und also beschaffen, das ich ohne ellenden wolergäbigen gelt succurs dise meine legation zu e. Mt. ehren, nutz und reputation nit allein nit wol füehren, sondern in vermanglung desselben mir nichts gewisser alß allerhandt spott und ungelegenheit imaginiern khan, welches dan e. Mt. und gemeinen wesen zu verschimpffung und nachtheil gerathen wurde, alß hab ich khein besser mittel gewüst alß deroselben durch diesen aignen currier die grosse noth in underthenigkheit for augen zu stellen, allergehorsambist bittendt, weilen die erfharung mit grossen schaden zu erkhennen geben, das sich auf die kauffleüth und iere wexel brieff nichts zu verlassen, sy geruhen disen gegewerttigen currier noch ain andere vertraute, wolerfharne persohn allergnedigist zuzugeben und ihnen beeden in höchster gehaimb, damit sie nit verkundtschafft werden, ain summa gelts in golt, sovil sie werden fortbringen kündten, anhendigen zu lassen, damit ich durch diß mittel wenigist aines guetten thailß des mier wolverordneten succurs für dißmal möge fähig werden. Hoff allerunderthenigist, e. Mt. werden deroselben, in ansehung der grossen noth und vermanglung aineß bessern, dises mittel allergnädigst gefallen lassen, und weilen sonsten die gelt expeditiones zu zeitten etwaß langsamb hergehen, auf einen solchen weeg ob summum more periculum gedacht sein, damit diser currier im wenigisten nit aufgehalten werde, sondern die gebettene expedition ohne allen verzug und anstandt beschehe. Geraicht alles einig und allein zu e. Mt. dienst befüerderung und zu verhüettung villerley calumnien, so die feindt zum fall mir auß gelt mangl ein gelegenheit alhie zuestehen tette, zu spargiern nit underlassen wurden.