Die Gesandtschaft des Johann Jakob Kurtz von Senftenau 1623/24

- 62r -

Für den edlen, unsern reichshofrath, cammerern unnd lieben, gethreuen Hannß Jacoben Kurtzen von Senfftenaw freyherrn zu dem durchleichtigisten, großmechtigisten sultan Mustafa han, türggischen, Asien unnd Graecien khaysern, unnserm hochgeehrten nachparn unnd freundt, nach Constantinopl abgeordneten potschaffters.

Nach deme unns sein, deß Khurtzen, treue, geschikhlikhait, beywohnender verstanndt, fleiß unnd dexteritet, auch in sachen erlangte erfahrnheit hochgerüembt wirdt, unnd aus vilen, ihme gnädigst aufgetragnen unnd zu unserm contento volzogenen verrichtungen wol bekhant ist, alß haben wir ihme auß gnädigstem verthrauen, so wir zu seiner persohn tragen, zu solcher ansechlicher potschafft zu dem durchleichtigisten türggischen khayser zu schikhen unnd zu gebrauchen unns allergnädigst resolvirt unnd wirdet also anfangs erindert: Demnach mit höchstseeligen angedenkhens khaysern Rudolpho dem andern unnd Matthia, auch dem andern, der durchleichtigiste - 62v - türggische khayser sultan Ahmet haan nach langwürigem gefürthen offnen, schwären khrieg im jahr [1]606, einen fridens anstandt auf 20 jahr lang mit gewissen, in der aufgerichten capitulation begriffnen articuln geschlossen, das nach inhalt unnd crafft derselben fridens capitulation ihr durchlaucht unnser seits die verehrungen geschikht, hergegen von ihrer durchlaucht die bey seinen potschafftern heraus geschikhte verehrungen empfangen, das also, sovil die schikhung freywilliger verehrungen ain khayser dem andern betreffend geschlossen, bederseits volzogen und der anno 1606 aufgerichte friden hernacher abermahln von hochst seeligen angedenkhens khaysern Matthia und ihrer durchlaucht nit alain becrefftigt, sondern auch darüber auf 20 jahr vom 14. tag monaths Augusti 1616 jahrs anzuraiten verneuert unnd prolongiert worden, alles inhalt unnd vermüg bey eingeschlossener copien deß jüngsten wiennerischen fridensschluß, unnd darauf vom türggischen khayser heraußgeschikhten, gefertigten fridens ratification unnd höchstseeligen angedenkhens khaysern Matthiae confirmation, die er zum wissen sich darinn zu ersechen, und, wo vonnöthen, derselben zur nachrichtung unndter solcher legation zu gebrauchen wüsste, zu empfachen hat.

- 63r -

Bey disem allem ist es enzt hero also verbliben unnd erhalten, darüber beederseiths die potschafften hin und her mit freywilligen verehrungen verschikht, massen von ihrer durchlaucht wegen sich dero alhieige türggische potschaffter Ahmet beeg, so gleichs fahls mit praesenten von der Porten herauß geordnet worden und ein zeitlang alhier aufgehalten hat. Den selben sulthani abgesandten haben wir nun ehrlich abgefertiget, sambt unnd mit demselben soll unnser potschaffter nach Constantinopl fortraisen. Unnd weiln wir unns gnädigst resolvirt, sulthano, auch seinen vezier bassen unnd andern officirn an der Porten zu erweisung unserer kays. mildigkhait unnd bezeugung unnsers guet- unnd wolgenaigten willens gegen allen deß sulthani ministris, die zu des fridens beständiger conservation und erhaltung affectionirt und befürderlich sein, aus khainer obligation oder schuldigkhait, sonder alain aus guetem freyen willen, verehrungen zue schikhen, solle derowegen unnser potschaffter alle, die zu solcher verehrung gehörige sachen, welche ihme von unserer hoff camer nach inhalt ainer gefertigten verzaichnuß sollen angehendigt werden, empfangen, bestes fleiß verwahren und darauf gute achtung geben.

- 63v -

Wan er nun anfangs ghen Comorrn anlangen wirdet, solle er seiner sambt deß sulthani potschaffters mit ihme nacher Comorrn ankhunfft dem vezier bassa zu Ofen alßbaldt parte geben, benebens von ihme begern, weiln er von unns zum potschaffter nach der Porten verordnet, das er seiner sichern hinein- unnd rukhraiß sambt allen beyhabenden, sowol auch, das der fridt der Türggen seits vest stät unnd unverbrüchlich gehalten, und das wenigiste wider denselben undter ainichem praetext fürgenomben weder verstat noch ainichem ihrer kays. May. feindt oder widerwertigen beysprung und hilf weder offentlich noch haimblich gelaistet, auch da sich iemandt fridhässiger dessen undtersthen wolte, dissimuliert und durch die finger gesechen werden solle, zu genüegen assecurirt unnd versichert werden möge, darbey zu vermelden, das er von unns gemessenen bevelch habe, eheunder von Comorrn nit fortzurukhen, biß zuvor die straiffenden Tartarn und Türggen, so undter dem Ibräim bassa sich aufhalten unnd allerhandt zu violirung deß fridens genaigte höchst schödlichiste practikhen treiben, sambt ihme, bassa, gantz abgeschafft werden. Die assecuration, so unnser potchaffter vom vezier empfangen wirdet, soll er unnß eylendts bey tag und nacht herauf schikhen, undter dessen unser gnädigste resolution zu Comorrn erwardtend, alßdan auf ervolgende - 64r - erstegemelte unnser resolution, das er fortzuraisen, soll er alsobalden sein angefangene raiß fortstellen, sich erkhundigen unnd nachfragen, was etwa der sulthanus der Türggen und Tartarn dem Bethlem, wie auch andern rebelln unnd widerwerthigen zur hilfschikhung wegen im sün haben, wie weith sich ditsfahls diß jahr zu befahren oder auf sicherhait zu verlassen sein mechte, und was er ditsfahls in gewisse erfahrung bringen wirdet, unnß dessen von ainer zur andern zeit öffters, sambt iedes mahls seiner zuegesetzten mainung parte geben, sowol auch was vom vezier bassa zu Ofen auf sein begern für richtig unnd verlässliche assecuration und versicherung ihme fürgeschlagen werden und erlangen mechte.

Sintemaln auch wegen deß so unaufhörlichen täglichen straiffens und raubens an den gränitzen, dasselb gar abzuschaffen und mit sicherhait handlen und wandlen zu khünen, man sich vor disem mit dem vezier zu Ofen ainer commission verglichen, dieselbe auch zum öffternmahl ins werkh zu setzen begert hat, die aber bißhero zum effect nit gericht; daher dan deß continuirenden straiffen, raubens, spolierung und niderhauung der leith, täglich gravamina und khlagen einkhomben, dardurch ain thail den andern irritirt und zur rach veruhrsachet, - 64v - alß solle er, unnser potschaffter, mit ihme, vezirn, wegen eheisten volziechung solcher commission, und was er hierzue für persohnen zu schikhen gedenkht, auch an was orth dieselbe anzustöllen sein mehte, zu desto besserer deß fridens erhaltung sich undterreden und einen schluß machen, wollen wir alßdann darzue unnsers thails auch commissarios deputieren und abordnen. Dise tractation mit dem vezier aines thails von Comorn auß schrifftlich und sonst auch zu seiner ankhofft gehn Ofen hinacher durch mündlich conferenz wirdet beschechen und zu werkh gericht werden khünnen.

Weil aber von Comorn aus der Porten zueraisendt er, potschaffter, anfangs gehn Graan khomben wirdet, dem beeg daselbst unser schreiben, so er hiebey zu empfachen, neben vermeldung unser kays. gnadt, das ihme, beegn, verordnete praesent zuestellen unnd ermohnen solle, weil dasselb eüsseriste, ienseits der Thonauw ligendes türggische gränitzhauß ihme von seinem khayser verthraut zu erhaltung aufrichtigen, zwischen unns und seinem khayser geschlossenen fridens guete dienst erzaigen khan, das er seines thails alles, was zu erhaltung beständigen fridens ersprießlich, ihme angelegen sein lassen und unß dardurch gelegenhait machen und uhrsach geben wolle, sein so guetes verhalten, bey seines durchleichtigisten khaysers Porten zu rüemen.

- 65r -

Wan hinnoch unnser potschaffter zu Ofen anlangen wirdet, solle er sich bey dem vezier bassa daselbst anmelden, ihme unnser credenz schreiben überantworten, in unserm namen salutirn, unnsern zu ihm tragenden gnädigen gueten willen unnd zuenaigung anzaigen unnd vermelden, das wir gnädigst gern vernomben, das der sulthanus ihne alß seinen stathaltern zu Ofen wegen seiner fortreflichen gueten qualiteten, verdienst und fridliebenden gemüeths verordnet und das gubernament daselbst verthrauth hat, und winschen von Gott, das er mit gueter gesundhait hievorn zu Ofen lange zeit verbleibe, massen er dan bey unns seines fridliebenden gemüeths so hoch gerüembt worden. Dahero wir unns dan umb sovil mehrers allergnädigst versechen, er werde ihme die erhaltung deß geschlossenen fridens, wie enzthero iederzeit angelegen sein lassen unnd bey dem sulthano und dessen inneristen räthen und andern bassen solche nutzliche dienst laisten unnd bey allen denen von seinem khayser zu gubernirn ihme undtergebenen bassen, beegen, gränitzern und khriegsvolkh ernstlich darob sein, das alles, was zu erhaltung solches hailsamben fridens und nachbarschafft ersprießlich und befürderlich sein mechte in obacht genomben und observirt werde, mit was grossem eyfer - 65v - wir unnß die conservation unnd erhaltung beständigen aufrichtigen fridens iederzeit angelegen und wie allergnädigst wir gegen ihme wegen seines aufrichtigen fridliebenden gemüeths wol affectionirt sein, und das wir alles, was zu Sythwa Thorok und hernacher zu Wien in fridenssachen geschlossen worden unsers thails, wie sich gebürth, zu volziechen bevolchen haben, werde er von dem Ahmet beeg vernemben khünnen; den haben wir ehrlich widerumb zu seinem khayser abgefertiget und was wir zu erweisung unnsers gegen dem sulthano fridliebenden gemüeths und nachbarlichen, gueten freundtschafft, aus freyem willen ihme, unnserm potschaffter, ain verehrung seinem khayser zu praesentiern mitgeben haben. Unnd weil wir resolvirt sein und ihne vergwissen, alles, was die pacta in sich halten, zu observirn und in allem dabey zu verbleiben, soll unser potschaffter an den vezier bassa zu Offen in unserm namen begern, er wolle seinem vilfeltigen erbieten gemäß (massen wir an seinen worten und schreiben niemahln zweifeln) auß der vom sulthano seinem durchleichtigisten khayser habender volmacht unnd authoritet daran und darob sein, das zu deß hailsamben fridens erhaltung denen unruheigen, schödlichen leithen, welche unfridt und unruhe zwischen unns und seinem khayser veruhrsachen und erwökhen, wider unns ungehorsam - 66r - unnd rebellisch erzaigen, khain gehör noch glauben, weder haimblich noch offentlich khain hilf noch undterschlaif hinfüro geben werde, massen wir dan ihne, vezier bassa, zu deß fridens conservation unnd erhaltung wol affectionirt wissen, zu erzaigung unnsers gnedigen willens haben wir ihme ain verehrung verordnet, die solle unser potschaffter vermüg unserer hofcamer verzaichnuß dem bassae praesentiern, benebens vermelden, das er auf khönfftig unserer kays. mildigkhait, und, wie es die zeit und occasion mitbringen mechte, unsers gnädigsten willens desto mehrers zu geniessen haben, ie mehrers wir sein fridliebendes, zu erhaltung deß fridens angelegnen fleiß khonfftig erfahren, das also sein mühe, sorgsamber fleiß, so er hierinnen anwenden, wol angewendt sein wirdet.

Unnd demnach wir unnsern gethreuen lieben Sebastian Lustrier von Liebenstain, unnsern rath alß residenten an die ottomanische Porten auf ein zeitlang zu verbleiben, die fürfallende geschäfft, und was sonsten zu befürderung unserer dienst diß orths sein mechte nach abraisung unsers potschaffters zu sollicitiern und negotiern, alß hat er ihne, Lustrier, welchen wir absonderlich mit credenz schreiben versechen (die er gleichwol ohne unsers potschaffters - 66v - vorwissen und bewilligung nit übergeben solle) dem vezier, auch anderwerths, wo es undterweegens vonnethen, für unsern residenten an der ottomannischen Porthen anzuzaigen und zu inducirn.

Wan dises also bey dem vezier bassa zu Ofen verrichtet, soll unnser potschaffter sich zu Ofen nit lang mehr aufhalten, sonder mit deß bassa guetem willen und genugsamber belaittung sambt deß sulthani potschafft fürderlichist die angefangene raiß fortsetzen, unns auß Ofen seiner dahin khonfft und von danen raisens, unnd der verrichtung daselbsten gnädigst berichten.

Wan unser potschaffter zu Griechisch Weissenburg oder sonsten unndter solcher raiß ainen andern bassa antreffen würde, bey dem er sich anmelden miesste, soll er denselben von unserntwegen, wie die andern veziern unnd bassen davon hinach meldung beschechen wirdt, deß fridens erhaltung wol lassen bevolchen sein, ansprechen und ermahnen, und ihme gleichsfahls die verehrung von unserntwegen zuestellen.

Unnser potschaffter wirdt hiemit erindert, das breüchig, das er mit unnserer reputation zu Constantinopl ehrlich einzieche. Dahero, wan er zwo oder drey tagraiß von Constantinopl sein wirdt, zu dem Joan Paulo Damiani ainen voran schikhen und sein ankhonfft zu wissen - 67r - thuen, der alßdann bey dem caimekam, oder deme, so bey der Porten in abwesen deß obristen veziers der furnembste vezier bassa, unnserer potschafft ankhunfft anzaigen unnd welchen tag er zu Constantinopl einziechen solle, beschaidt nemben, zu seiner hinacher dahin ankhonfft soll er sich fleissigist erkhundigen, dessen er vom Damiano nachrichtung wirdet khünen erlangen, welcher vezier der zeit an der türggischen Porten der fürnembste, bey dem selben er sich antzumelden unnd umb audienz anzuhalten; und wann er fürgelassen wirdet (da ihne der Damiani was in dergleichen bey den Türggen breüchig informirn khan) nach vermeldung gebürlichen grueß, unsern zu ihme tragenden genedigen willen mit solchen worten alß unnserer kays. autoritet und hochait gebürth, erclären, unnser schreiben ihme überantworten und nach inhalt desselben und sonsten auch noch ferrers fürbringen solle, das nach dem er an seines durchleichtigisten khaysers Porten von unns abgefertigt unnd wir ihme bevolchen, sein verthrauen zu ihme, vezier, zu haben und in verrichtung seiner legation und unnserer gschäfft bey seinem durchleichtigisten khayser insonderhait seiner hilff und promotion zu gebrauchen und dabey versichern, das unns die erhaltung gueter freund- und nachbarschafft - 67v - sonders hoch angelegen, und dieselb zu conservirn willig unnd genaigt sein, wan nur sy auch ihres thails gleichsfahls thuen und hinfüro den friden besser alß bißhero beschechen in acht nemben und halten.

Hieher gehörn die beygefüegte gravamina, dardurch der Türkhen nit haltung zu docirn, dem er sich diß oder ein ander mahl nach glegenhait der occasion bey disen unnd andern vezirn der notturfft nach zu gebrauchen und umb wirkhliche remedierung unnd wendung anzuhalten; solle undter ainsten die ihme, vezirio, deputierte verehrung zuestöllen, mit vermelden, solches praesent guetwillig anzunemben, und das er auch inskonfftig seiner, zu beständiger erhaltung deß fridens angewendter bemüeheung halber zu unns nit anderst, dan aller miltreichen ergötzlikhait und erkhentnuß zu versehen habe. Er solle den geschlossenen friden zu conservirn sich bemühen, zumahlen in demselben die erhaltung deß ottomannischen reichs unnd dessen wolstanndt am maisten consistiere, nicht ainem ieden, wie bißhero beschechen, gehör geben, fürlassen unnd vertröstung thuen; es sey ein sehr leichte sach, ainen khrieg zu erwökhen unnd denselben anzufangen, dessen anschlag ungewiß und Got der gerechten sachen alweeg beyzustehen pflege. Die hoche aydt schwur seyen in acht zu nemben und zu halten, was - 68r - man zuesagt, welches bey den Christen also observirt und gehalten wirdet, zu dessen noch ferrern erhaltung ungeacht einkhombenden avisi von denen moliminibus unnd practicis, so wider den geschlossenen friden in vil weeg an der Porten und sonsten gefürth worden, wie dannoch das ienig ansechendt, was wir crafft deß so hoch bethreuten fridens schuldig, unnsern gesandten nach der Porten abgefertigt, der alda dem sultano Mustaffa zu der erhöbung und errection zu der höchsten dignitet unnd throno imperiali congratuliern und glükh zu winschen von uns bevelcht ist.

Nach verrichtung diß soll unnser potschaffter den vezier umb eheiste audienz beym sultano ersuechen, damit er das ienige,was er von unnß im bevelch, selbst gebürlich anbringen unnd die verrichtung praesentirn khünde. Wan er solches beym vezier verrichtet, unnd alß dan bey dem türggischen khayser zur audienz fürgelassen wirdet, solle von ihme, unnserm gesandten, dem sultano unnser schreiben gebürlich übergeben und mit sonderbarer ehrerbietung fürgebracht werden, das er von unnß zu ihrer durchläuchtigsten Porten abgesandt seye, dem sultan Mustaffa zu gratulirn, das er zu diser hochen dignitet deß ottomanischen - 68v - imperii erhöbt sey, und zu winschen, das er mit gueter, ruheiger regierung seiner undterhabenden völkher und nationen langwürig leben müge, und zu declarirung unnsers fridliebenden gemieths gegen ihro durchlaucht unnserm potschaffter zu demselben mit freywilligen verehrungen abgefertiget, benebens vermelden, das wir aus grosser commiseration beederseiths undterthonen, gemainen fridens ruhe und ainigkhait unnß höchst angelegen sein lassen, und alles das ienige, waß sich unnsers thails nach inhalt der geschlossenen fridens capitulation gebürth also aufrichtig halten unnd praestirn, das weder unns, noch unsern khönigreichen, landen und undterthonen ihtwas, so dem friden praeiudicierlich sein und denselben conturbirn mechte, mit billichkhait wirdet beygemessen werden khünen. iedoch wan ihrer durchlaucht seiths, wie es an ihme selbst billich, auch also aufrichtig gemaint, in sich haltet, gegen unnß und all unnsern landen und provintz, so undter dem geschlossenen friden begriffen, observirt wirdet, massen wir dan aigentlich darfür halten, ihr durchlaucht werden was zu beständiger erhaltung der zwischen unns unnd unsern bayderseiths vorfahrern aufgerichter verainigung unnd fridens capitulation, freundschafft und gueter nachbarschafft dienstlich und fürdersamblich sein khan, in allen - 69r - articuln zu erzaigen nit undterlassen. Und weiln wir zur freundschafft bestätigung unnd erzaigung unserer affection unnser potschafft geschikht, also versechen wir unnß, das nit weniger hingegen von ihme angeordnet werden unnd vermüg der geschlossenen fridens capitulation zu rechter zeit beschechen wurde, die freundschafft unnd ainigkhait dardurch zu conservirn und zu vermehren.

Nach diser gehabten audienz bey dem sultano soll unnser potschaffter nach gelegenhait deß ietzigen der Porten brauchs die vezierbassen und den muffti haimbsuechen, unnser credenz schreiben ihnen zuestöllen, unnsern gebürlichen grueß unnd genedigen willen vermelden, unnd die ihnen deputierte praesent anhendigen unnd ermahnen, das sy wegen ihrer, beym sultano habenden ansechen und authoritet gleichsfahls darob sein und verhelffen, damit alles, was ditsfahls zu erhaltung beständigen fridens, gueter freundschafft, nahbarschafft unnd ainigkhait dienstlich sein und zu guetem geraichen khann, threulich wolte befürdern helffen, so wir khonfftig erkhennen - 69v - unnd ihren fleiß unnd bemüeheung belohnen wolten. Und stöllen wir die verehrung der praesenten destwegen in unsers potschaffters discretion, damit wans etwo sach wär, das umb ainiger fürgangenen veränderung oder uhrsach wegen von denen vezir bassen ainer oder der andere diser zeit an der Porten nicht zur stöll oder masul wären, so soll unnser potschaffter, die für dieselben deputierte praesent zurugg halten und in ander weeg, was sonsten von den praesenten übrig verbleiben mechte, nach glegenhait an der Porten in fridens sachen fürfallender occasionen zu unnsern diensten nutzlich angelegt und verraith werden.

Weiln unns unnd unserm hochlöblichen hauß, auch der Christenheit vil daran gelegen, wissenschafft zu haben, was an der türggischen Porten wider unnß und unsere erbkhönigreich und lande von fridhässigen und unns nit wolgewognen offentlich oder haimblich tractirt und practiciert wirdt, massen dan ain zeitlang dem fridenschluß zuwider, dasselb in vil weeg beschechen, soll unser potschaffter dessen aigentliche erkhundigung einzuziechen fleiß brauchen unnd gebürlichen uncossten dasselb gewiß zu erfahren anwenden. Und da er erführe und in erkhantnuß khäme, von wem solche - 70r - böse, schödliche präctikhen an der Porten getriben, solle alßdan fleissige achtung darauf geben und sich bemühen, wie er entweder bey dem sultano selbst, dem caimekam oder andern vezier bassen, so die maiste authoritet bey dem sultano haben, privatam audienziam, wans vonnöthen sein würde, erlangen, unnd solche böse practikhen und schödliche, dem friden zuwiderlauffende handlungen bey denselben ablainen, begründte beschaffenhait berichten und begern mechte, denselben falschen delationibus khain gehör weder glauben zu geben, sonder uns darbey zuekhomben zu lassen, damit ihre durchlaucht unnd die obristen, sambt andern veziern darauf informirt werden khündten, allermassen in der jüngsten türggischen fridens confirmation und prolongation destwegen der 6. articulus formirt, eingebracht worden.

Allermassen auch in yetzt gemelter fridens wiennerischen prolongation die freye navigation undter unnserm vexillo im 10. articl gemelt und der modus solcher navigation anstöllung in gedachtem articl ausgefirth wirdet, so solle wegen diser navigation am bösten und sicheristen anstöllung, alß auch der freyen commerciorum wegen, unser - 70v - gesanter sich an der Porten was etwo daselbst für leith, so hierinn zu gebrauchen und deren sich mit nutzen zu bedienen sein mechte, erkhundigen, mit considerationibus nach glegenhait er den finden würde, sich undterreden und mit eheistem sein guetbedunkhen in diser sach heraußzuschikhen.

Weiln auch in der schitwagerischen tractation, 6. articulus, lauter fürgesechen, quod arces occupare, nec clam, nec palam, nec aliqua practica sit licitum, deme zuwider die Türggen vom Bethlem Lippa, so zue Hungarn gehörig, übernomben, also wirdet unnser gesandte umb die restitution Lippa und darzue gehörigen, zugleich mit Lippa übernombenen alß Arad, Sulymos und anderer örther, nach beschaffenhait der zeit und coniuncturn antzuhalten wissen. Hiemit aber solang innzuhalten, biß der sommer fürüber sein und es sich der winterlichen zeit was zuenachen wirdet, da alßdann auch nach glegenhait der türggischen sachen constitution und beschaffenhait zuvorderist die restitution Waitzen, so neulich durch unnsern gewesten potschaffter, Caesar Gallo fürnemblichen urgiert worden und freylassung der gefangenen Christen starkh begert werden khundte.

- 71r -

Zum fahl aber die Türggen wegen demolierung der palanken meldung thuen solten, so dan unnser potschaffter zu vermelden, das destwegen ain tractation antzustöllen in der wiennerischen fridens capitulation begriffen und wir destwegen tractirn zu lassen, unnsere commissarien zu schikhen willig, iedoch den terminum executionis, so sonsten in der copien begriffen, er khaines weegs zu melden; und da sy sich mit solcher antworth nit wolten contentirn lassen, wegen Lippa, Arad unnd Solimas, auch wegen Waitzen er, potschaffter, die urgierung dahin, seinem beywohnunden verstandt nach, zu stöllen hat, damit ain praetension die ander in suspenso halte.

Zum fahl auch (das wir doch nit darfür halten) der freywilligen verehrung halber meldung beschechen wolte, alß wan man dieselben in gelt abstatten solle, hete sich unnser gesandte generaliter ad articulos in Sithwa Torok conclusos zu referirn, crafft deren bayden thailn freysthet, die verehrungen nach gefahln einander zu schikhen.

Damit wir auch von der Porten desto öffter auf - 71v - Griechisch Weissenburg und Ofen schreiben und relationen haben, wie auch dahinwerths unnsere schreiben mit sicherhait bestöllen khünnen, lassen wir unns gnädigst belieben, das zu Griechischweissenburg und Sophia aigne leith mögen bestölt werden, durch welcher fleiß und zuethuen alle schreiben hin unnd her, fleissig unnd sicher bestölt werden mögen. Doch aber das die besoldung auf bayden örthern sich nit höcher in allem, dann zumaist auf 500 reichstl. erströkhe.

So dan auch die großhertzogin auf anhalten deß ehrwürdigen fratris Antonii Barli etliche gefangne nach der Porten frey, ledig lasst, und dieselben sambt etlichen guldinen stukhen dem sultano verehrt: angeregter Barili aber berichtet im bevelch zu haben, nach unsers potschaffters rath und guethaissen sich ditsfahls zu reguliern, zumahln von unserntwögen solche gefange frey und loß gelassen wurden. Alß soll unnser gesandte alleß fleiß sich erkhundigen, was es ditsfahls für gelegenhait habe und auf wessen begern die freylassung angeregter gefangener ervolgt, und was hierdurch zu erlangen gesuecht sey worden. Und wirdet er dahin sechen und verschaffen, damit unser hochait - 72r - unnd reputation in gebürende obacht genomben, und angeregte gefangene und goltstukh nit in unserm, sonder der großhertzogin namen praesentiert werden.

Es werden sich allermassen auch bey unsern vorigen potschafften zu beschechen pflegt, der venedische bailus und französische, villeicht auch der Hollender und Sibenbürger gesandten und agenten anmelden unnd mit ihme conversirn, die soll er mit allem glimpfen von deme, so er vernemen wurde, das sy wider unnß etwo practiciern täthen, abmohnen, unnd dahin weisen, das sy sich alß christlichen mitglidern gebürth, an der türggischen Porten im werkh erzaigen, durch haimbliche practikhen unnd informationen sultanum wider die Christenhait, unns und unnsere khönigreih und lande nit instigirn solen. Es werden ihme auch credenz schreiben an die engellendische, wie französische potschafft mitgegeben, die er nach gelegenhait und für guet ansechung, wie es zu unserer khays. hochen reputation und befürderung unnserer dienst ersprießlichen sein mechte, ihnen anzuhendigen hat.

So bewilligen wir, das unnser potschaffter alle an uns - 72v - lautende türggische schreiben eröffnen und ihme in der gehaimb khünne verdolmätschen lassen, damit er dessen wissenschafft haben, und mit desto besserem fundamento von der Porten abziechen khünne, die er unnß hernacher nach beschaffenhait der sachen entweder selbst mitbringen oder zu über schikhen hat. Den Damiani und unsern hofcamer canzlei schreiber, den Cramer, welche sich an der Porten aufhalten, soll er seinem guet bedunkhen nach heraus schikhen und haben wir beraith zu abstattung ihrer darinn gemachten schulden, wie auch raiß uncostens heraus, die verlag zu verschaffen, bey unnserer cammer verordnung thon.

Wan er nun sein legation völlig abgelegt und die negotia sovil zeithalber thuelich introducirt haben wirdet, solle er obvermeltem Lustrier vor seinem abzug von Constantinopl alle, zu negocirn restierende sachen hinderlassen, denselben alß unsern residenten an der Porten, wo es vonnöthen, wie bey dem vezier zu Ofen, gemelter massen inducirn.

Seinen abzug von Constantinopl soll er wie unserm potschaffter gebürth nemben, und vom sultano sambt seinem vezier andtworth auf unnsere schreiben erlangen und sich alßdan, wofern wir ihme inmitls nichts anders befelchen wurden, auf welchen fahl wir alßdan ihme die verlag zu seiner undterhaltung gleichmessig verordnen wollen, wider herauß fürdern.

- 73r -

Solches alles, unnd was sonnsten zu erhaltung deß hailsamen fridens nutzlich, auch zu abstöllung böser practikhen wider den friden dienstlich oder solcher legation anhengig sein und sonsten fürkhomen mechte, soll unser potschaffter, wie wir das gnädigste vertrauen zu ihme tragen, threuisten fleisses bedenkhen und zu seiner wider heraußkhonfft seiner verrichtungs relation übergeben. Hierin unnsern gnädigsten willen und mainung gehorsamst volziechen und bleiben ihme im übrigen mit kays. gnaden wolgewogen.

[Instruktion für herrn Kurtz, gesandten] an die ottomanische Portten
- 73v - - 74r - - 74v - den 8 Juli. anno 1623.
Turcica
Instructio für h[errn] Jacob
Kurtz[en] freiherrn