Das in e. ksl. Mt. etc. lauttern unnd freundlichen Schreiben, so noch hievor alher gebracht, die ursach unnd ursprung, warumben euhr ksl. Mt. etc. verehrung nit zu ihrer rechten zeitt an die erhöbt unnd fürtrefflich Porten gelüfert, angezaigt, auch diß vermeldist worden, wie man die begen unnd das annder sighaffte gräniz hör mit nichte bezäme, sonnder sy immerdar zu e. Mt. etc. reich unnd gebiedt einfallen unnd darinnen schaden unnd ubelß zu thuen nie nicht aufhören.

Gleichsfals haben e. Mt. etc. in gedachtem ihrem freundlichen hergethonen schreiben bericht, das sy bey dem geehrten unnd gethreuen unnder den edlen deß christlichen gesaz Ulrichen von Künigsperg, erzherzog Ernnsten e. Mt. etc. brueders obristem silbercamerer, ihr praesent zu der hohen Porten, ursprung aller glückhseligkhait, herein abgefertigt unnd geschickht, unnd das man von e. Mt. etc. seidten wider den friden unnd guette rueh niemalß in dem gebiedt seiner ksl. hochait ainichen uberlast oder verdruß geüebet oder gethon hab, sonnder in dem e. Mt. etc. thailß die conditionen unnd articl deß fridens unnd guetten rueh zu aller zeitt gehallten werden, da straiffen hergegen die soldaten deß sighafften hörs seiner hohait thailß ohne unnderlaß in e. Mt. etc. lannd unnd gebiedt, es seyen auch ettliche dörfffer, welliche von alters her biß auf dise zeidt den musulmannischen khriegsleuthen khainen tribut bezallt, yezo aber nemen sy den tribut mit gewalt von ihnen, unnd welliche dörffer deß tributs sich waigern, die verbrennen unnd verhören sy unnd bringen die unterthonen umb, item e. Mt. etc. schlösser nehmen sy mit gewalt unnd betrug ein.

Uber das hat auch euhr ksl. Mt. etc. an disem seiner hochait mechtigen unnd sighafften hof residierende pottschafft ain lannges scriptum ubergeben unnd zu dem er alles obstehende widerholet, hatt er daneben auch alle biß daheer fürgangne schäden unnd unbilden bey einem puncten eingeführt, also das alles das jhenige, so in e. ksl. Mt. etc. schreiben, so woll in gedachter euhr pottschafft schrifften angeregt unnd erzehlt, ist aigentlichen translatiert unnd verdolmätscht worden, welliches wier auch in besster form ausführlich vor dem khünigkhlichen thron unnsers glückhseiligen khaysers, dessen victori Gott erhallten unnd sein macht ihme mehren welle, fürgebracht und hatt sein ksl. hochait es alles woll angehört unnd verstannden.

Derwegen dann aus seiner hochait verordnung ain ksl. brief geschriben unnd e. Mt. etc. zuegeschickt worden, weil denn nun hierinnen sein ksl. hochait nachvolgen unnd hallten will, das heylige wort oder spruch unnßers heyligen propheten, herrens der menschlichen nation, die heylige barmherzigkhait unnd göttliches hayl sey ob ihm, da er also sagt: der frid sey ain herrscher unnd gehe allen anndern dingen unnd urtln für.

So hatt hierauf sein hochait auch verlanngen, nach dem frid, sicherhait stille unnd rueh der unterthonen unnd lannds inwohner, unnd läst ihme die frid unnd guette rueh antreffende sachen, wie sich gezimbt, mit guetter sorg unnd vleys woll angelegen sein. Es seyn auch dem beylerbey von Ofen unnd den anndern begen hin unnd wider an den gränizen, in sonnderhait aber den sansiackbegen in Bossen, Clissa unnd Herzeckh, ainem ieden derselben mit frid zu bleiben, noch in e. Mt. etc. lannd unnd gebiedt wider den friden unnd guette rueh einzufallen, dasselbe zu molestiern, zu blündern, noch darynnen ainiche schäden oder unbilligkhaiten zu treyben unnd zu üben, seine ksl. scharffe bevelch zuegeschriben, ihnen durch verstenndige zauschen uberschickht, auch von sollichem allem sich zu enthallten, mit dem ernstlichisten unnd willen verbotten, bedrohungen unnd warnungen auferleget unnd bevolhen worden.

Also das es gewiß ist, ain yeder werde nach dem willen deß allmechtigen Gottes nottwendigkhlich seinen ksl. hochait hohem bevelch gehorsamen, dann wann sy zu wider dem ksl. Mandat in e. Mt. etc. gebiedt straiffeten, raubten unnd schaden thetten, so werde derselbe, wer der auch wehre, in khainem weg ainiche verzeihung oder gnad, oder das man ihm als ain sein besoldung nähm unnd sonst gehen ließ, nicht erlanngen, sonnder gewißlich examiniert, gepeiniget, unnd mit häfftigen straffen gestraffet werden.

Ist demnach, wann e. ksl. Mt. etc. diß unnser freundlich unnd lautter schreiben zu hannden gelang, vonnötten, das von ihrer rainen aufrichtigen seidten, der gebür nach, e. Mt. etc. gräniz heubtern eingebunden unnd auferlegt werde, damit ein yeder seine undergeben khriegsleuth ernstlich im zäub hallte unnd deren geschwader oder rotten seiner hochait gebiedt zu berauben, zu beschädigen unnd darynnen die Musulmannen zu fahrn unnd niderzuhauen nicht ausfallen lasse.

Die prorogation unnd bestanndigkhait deß frids unnd guetten ruhe bestehet an dem, das zu beeden thailen die articl unnd conditionen der pacten unnd verhayssung deß frids gehalten werden. Wann aber e. Mt. etc. soldaten nit mit rueh bleiben, sonnder immerdar boß- unnd schalckhafftigkhaiten begehen unnd üben, so dann khünnen die musulmannischen soldaten, ihrem eüfer unnd inbrünstigkhait nach auch nit also zuesehen, sonnder weill an der sachen gelegen, begegnen sy mit allem vleys unnd sorgfeltigkhait denselben schäden unnd ublthaten.

Diß gezimbt sich, das alles deß, was geschehen oder nit geschehen, auch deren schäden unnd unbilligkhaiten, die bißer fürgangen unnd volbracht worden sein, von beeden thaillen hinfüro nicht mehr gedacht, sonnder das ienig, so sich verner zuetragen möchte, beeder seidts zu wissen gethon, unnd dasselbe mit rechtmässiger ehrlicher weiß, sovill müglich auf bayden thaillen accommodiert unnd volgendts observiert werde.

Sonst sein auch unterthonen ettlicher gewisser dörffer, welliche herwarts seiner hochait gränizen, hinnen in ihrem ksl. gebiedt ligen, die haben ihren tribut völlig auf disen thaill bezallt. Weill aber e. Mt. etc. leuth wider die pacta unnd verhaissung des fridens auch ein tribut von ihnen haben wellen unnd die unterthonen, die sollicher massen bedrangt werden, so vill beschwärungen ye nicht ertragen khünnen, würdet dises ein ursach ihres verderbens unnd zersträung sein, welliches nun auch nicht recht ist. Aber e. Mt. etc. wende allen guetten embsigen vleys an, damit solliches den yhenigen boßhafftigen, so dergestalt der armen unterthonen zersträung verursachen, verwehrt unnd eingestöllt, so würdet nach dem willen deß allerhöchsten auch von disem thail, vermüg der alten pacten unnd verhayssung deß fridens alles gehallten werden, unnd ainiche frids widerwertigkhait sich weidter nicht erzaigen.