Nahdem eure Mt. unsere freundtlihe grues und diensts erbiedtungen, die sih der wahren laudtern freundtschafft, so zwischen uns ist, gezimen und der selben wierdig sein, presentiert und vermeldt worden, wollen eure Mt. freundtlichen wissen, das dise tag alher an die erhebte glückselige Porten, auch fürtrefflihen hohen unnd mächtigen palast des sultans der erden und der Möhrsprovincien, khaysers, überwinnders der wellt, zueflucht der glückhseligkeit, groß müetigen herrns, triumphierenden khönigs deren reich und mähtigen fürstens, Gott erhallt im sein sig unnd bewahr sein ksl. hochait in glückseligem standt unnd wesen imerdar, euer Mt. schreiben alher gelangt ist, aus wellihem klärlih vernomen worden, das euer Mt. vatter der erwellte unnd geehrte des römischen vollcks, khayser und herscher des Teutsch lanndts und der königreich Behemb, Sclavonia und Croatia, Maxmilian kyral, auf disem gebrechlihenn zergencklihen leben thodts verschiden, und weill im euer Mt. im reich unnd kaiserthumb succediert, haben sy die wahre laudtern freundtschafft, inmassen sy euer Mt. vatter mit diser hohen und weidt berüembten Porten unsers glückseligen khaysers gehabt, gleihß falls zu haben begert, und darüber iro ain neue ksl. fridß confirmation gleich formiger substanz und inhallts wie die haubt confirmation, so euer Mt. vattern geben worden, zufertigen ersuchtt.

Ehe aber sollih euer Mt. schreiben ankhomen, hat David Ungnad, welliher an der glückhseligen Portten alls euer Mt. pottschafft residiert, diß alles zuvor fürbraht und fürgearbait, und wollen eure Mt. wissen, nahdem hievor euer Mt. vatter auß mit leiden, so er gegen den armen unnderthanen getragen, den frid und guete rueh begert, auch denselben durh seine schreiben, die ehr der wegen alher gethonn, ersuchtt, darumben gebetten unnd von unnserm durhleüchtigen kayser zur fluchtt der wellt, seiner pidt nach, den haubt fridens brieff erlanngt gehabt, das doh dessen unangesehenn die articl des frids und sicherhait nit gehalltten worden, dan die weil er seine graniz obristen, haubt leuth unnd solldatten, nitt woll im zaumb gehalltten, haben sich aus seinem gebiedt imerdar allerley übll, zännckh, rumor unnd unwillen zuegetragen.

Sonderlich von dem castell Zeng haben die zeihtigen leuth allda wider den frids anstandt ain straiff in das ksl. gebiedt seiner hochait gethan, wellihe dan weill sy nit aufgehört schäden und muet willen zuüeben, so khombt hierauß die frids verwirrung nur von euerm thaill her. Sollihes ist nun nit rechtt noh erlich. Wann dan unser sighafftes hör dergleichen fürgehen sicht, so erheben sy sich auch, unnd aus irer inen von natur angebornen mannhait, list, klueghait unnd dapferkhait wurde das lanndt nie unmolestiert bleiben. Derwegen so bedennckhen eure Mt. in was zill und grad das landt geratten, unnd was es mit dem standt der armen unnderthanen endtlich für ain außganng gewynnen würde. Wier haben euer Mt. vattern offtmalls vermahnt, ime geratten und freundlih geschriben, das er in den sahen frid unnd guete rueh antreffend, steif und beständig verharren, seine gränizen woll fürsehen und bewahren, unnd sih von allen dem, so den friden disturbiern möcht, endt halltten, auch nichts dergleichen zuegeben solle. Weill er im aber dis schlechtlih unnd schier gar nichts angelegen sein lassen, so sein on unnder lass in dem gebiedt seiner hochait allerlay muetwillen und über lästighaiten beschehen.

Nun aber, seidt das reich unnd die handlungen das kheysertumbts auf euer Mt. khomen unnd eure Mt. sih in obgedachtem irem schreiben ires laudtern gueten gemüets, so sy gegen der glückhseligen Porten unsers khaisers tragt, erklärt, so hab er euer Mt. seinen ksl. friedßprieff bewilligt unnd derselben verlanngen nach die pacta der sicherheit auf die angezogne unnd bestimbte zeitt bestättigt. Es sein auch gleihsfals widerumb den granitz offizialen ksl. bevelch zuegeschickt unnd inen der frid zum häfftigisten von neuem eingebunden unnd auf erlegt worden.

Euer Mt. verehrung aber, die man herain zuschikhen phlegt, unnder deß sy sich so lanng bißher verzogen, sein woll 10 monatt hingangen, diß hatt auch dem frid ein anstoß geben, und ob woll euer Mt. hirige pobschafft die ursach sollihes verzugs angezeigtt und zum besten endtschuldigt hat, so will doch sein hocheit unnsers glückhseligen khaysers nit, das man was solliches thue, sonder das die panndt des fridens und sicherheit recht gehallten unnd hinfüro euer Mr gewohndlihe verehrung zu irer ordenlihen zeit herein geschicktt werden, sonsten da sich sollicher gestaldt die presenten sogar über den termin aufhalltten und saümen, so wurde es, sagt sein hocheit, dem friden ein verwierung gebenn. In der warheit hatt sich euer verehrung, so hievuor herein khomen sollen, aber ir zill ser übergangen, verzogen, unnd also eine euerer presenten nit geschicktt worden, sonder auß bliben, aber den fridspacten und sicherheit nach, neues auch dieselbig in albeg im monatt February herein gefertigt werden, was für sorgfelltigkheit, anhalltung, mueh unnd vleiß wir hievor von unnserm thaill umb die stabilier- unnd befesstigung des gemainen fridens unnd gueten rueh angewenndt und gebraucht, das haben, über das es euer Mt. alhie residierenden, ambasciator woll bewist ist, auch euer Mt. fürnemere leuth, so bey euer Mt. sein, gehört, erfarn, und seines auch durch die schreiben, so zuvor von hinnen hinaußgeschickht, inne worden.

Demnach wan euer ksl. Mt. diß mein freundtlich schreiben zu handen khomen, so welle sy auf disen punct woll bedachtt sein, unnd wie sich gebüert, das present, so in zeit euer Mt. vatters nit geschicktt worden, sonnder auß blieben, weiter nit auf ziehen, sonnder biß auf den ersten des monats Januarii, wellicher Januarius in den ksl. fridßprief, der euer Mt. jez mit zuekhombt, benannt unnd geschriben ist, aufs ehendist herein ordnen, unnd nach dem January, wan eure Mt. die versprochen verehrung wie derselben vatter herein fertiget, wirdet es ain mehrung und zuenembung der wahren freundtschafft, auch alle widerwärtigkeit hin- unnd aufgehebtt sein.

Eure Mt. wellen sih alles des, so den friden betrüeben möchtt, eüssern unnd die conditionen des fridens halltten, auch in das ermeltte casstell Zeng ain betagte unnd guetes lobs person ordnen, die theuglich sey, euer Mt. reputation unnd ehr bewahre, die articl des fridens unnd sicherheit vor augen habe, unnd sollihe alles ime auf das ernstlihist eingebildt, auferlegt unnd eingebunden werde. Eure Mt. well auch den muetwillern an iren gränizen nit zu grossen lizenz geben, wie etwo in zeit ihres vatters beschehen, unnd fleiß für wenden, damit alles das, so dem friden irr- unnd zerridtung ursachen möchte, bey zeidten remediert, niemandts in das ksl. gebiedt seiner hocheit zuschreidten gestatt, sonnder die ubertretter, wie es sich aignet, woll gezäumbt unnd gestrafft werden, unnd also vleisiges aufsehen haben, damit man nichts frid wider wärtigs thuen lassen.

So lang nun nah dem willen Gottes von euer Mt. thaill nichts, daß den articln des fridens zu wider ist, erwaxt noch fürlaufft, also solle auß dem ksl. gebiedt seiner hocheit ichtes dem frider ungleichmässiges zu beschehen, auch nit zuegeben, sonnder das fundament des fridens, deer gebür nah, erhallten werden.