Nachdem e. Mt. etc. unnsere grieß, welche sich e. Mt. etc. khaiserlichen person gezimen und e. Mt. etc. auch der ehrlichen, wolgeachten freundtschafft und nachtparschafft, so zwischen uns ist, wierdig, presentiert und angebotten sein, sey e. Mt. freundtlich zuwissen, waßmassen e. Mt. etc. in irem freundtlichen schreiben, so unns dise täg zuekhomen, uns bericht und zuversteen geben hatt, das e. Mt. etc. nichts, so wider den willen dises glickhseligen khaisers der vier thaill der welt wär, thuen oder fürnemben, auch nichts dem zwischen unns bestätten friden und rueh widerwärttiges erweckhen oder ursachen, noch ainich khriegshör wider Sibenbürgen und Polln anziehen lassen woltten, sonder e. Mt. etc. hetten wol in acht, den gueten frid und rueh, wie sich gebiret, zuehren und zuerhalten, so wolten e. Mt. etc. auch in khürz die versprochen verehrung der freundtschafft herein schickhen.

In warhait so hat man sich zu eur ksl. Mt. niemallß so etwas dergleichen widerwärttiges versehen und ist eur ksl. Mt. wol bewist, das das land Sibenbürgen, welliches mit dem gewalt und macht der vorfordern unnsers glickhseligen khaisers ist erobert worden, also auch die völckher des raichs Polln noch bisheer under seinem schatten und schuz in rueh und vor iren feinden, sicher sein, und darumben, das sy so wol versehen und bewahrt sein, ist das land wol bewont, auch die fürnemben und edlen desselben sein an der Porten dises unnsers khaisers der welt in dem ansehen wie die andern seine undergebne beegen und herrn. Derwegen ist es gewiß, das sein hochhait ubl zufriden ist, wan solliches land von aussen beschwört, und belestiget wierdet. So haben e. Mt. etc. auch in irem schreiben vermeldt, das auf eur Mt. etc. thaill niemalls ainiche inconvenienz oder khriegs entfürung gewest. Was ist aber die ursach, das an den gränizen seiner hochait gebietts volckh ist versamblet worden, hierauf wellen e. Mt. etc. wissen, nachdem unns fürbracht worden, das das teütsch hör sich erhöbt, so hatt man aus zweifl, das es nit etwo Sübenbürgen uberzüge und darein fielle, zuverhiettung und fürkhumung deren schäden, so hierauß ervolgen möchten, und zubeschüzung des lanndts gleichsfalls ein hör zuversamblen bevelchen gehabt. Wie wir aber hernach glaubwirdigen bericht empfangen, das von e. Mt. etc. thaill sichs nichts unfridliches erzaige, ehe das von e. Mt. etc. schreiben khomen, so ist dem wezier Mustapha Bassa, verweser zu Ofen, dem beegler beeg von Temeschwar und dem Ferhad Sansiak Beeg in Bossen, auch allen andern beegen an derselben gräniz bevolchen worden, ir versamblet volckh wider von einander zu trenen und abziehen zu lassen, sein auch zu mererm grundt des gueten fridens und rueh und beständiger der freundtschafft erhaltung ernstlich erindert, verwarnt, inen auch absonderliche außdrückhliche ksl. bevelch zuegeschickht und aufferlegt worden, alleweil von des römischen khaisers thaill nichts fridwiderwerttiges sich zuetrage oder erwaxe, das sy sich gleichsfalls, wie sich gebürt, hietten, sollen, damit hergegen ires thaills auch nichts dem frid zuwider beschehe.

Derwegen so lang von e. Mt. etc. thaill die conditionen und articl des fridens und verhaissung volzogen, so sollen sy auch von unnserm thaill (das ist crefftig und gewiß) mit allem vleiß und sorg gehaltten werden. Nichts destoweniger aber, so wierdt von eurer seiten die maiste zeit wider den fridts pact gehandlt. Under andren die khriegs leüth des casstells Zeng, welliches an der gräniz Clissa gelegen ist, bleiben nie mit frid, die ublthäter, so dort herumb sein, khomen hin geen Zeng und finden aldort underschlaiffung, alß dan ziehen sy auß, verwiesten und verderben alles, fahrn und fieren weckh die underthonen aus den dörffern, die in unsers khaisers gebiett an der gräniz zu Clissa sein. Sonderlich aber etliche aus unnsers khaisers underthonen, wellicher der Venediger gefangne auf dem Möhr gewest, nachdem sy ir schäzung erlegt, von iren herrn ledig gelassen worden sein, auch von Venedig weckh und widerumb zu wasser und landt in unnser gebiett ziehen wollen, sein alspald von denen von denen von Zeng, wie sy nahend zum castell khomen, widerumben gefangen und sy, die sich erst erledigt gehabt, daselbst von neuem geschäzt worden.

Dergleichen sclaven nun sein on zall, die da khomen sein und sich sollicher unbild und muettwillen, so die von Zeng inen bewisen, bekhlagt haben. Wie dan auch erst diser zeit ein sollicher Musulman in den khayserlichen divan khomen ist, wellicher alls er bey Zeng für¬ übergeschüfft, hat e. Mt. etc. haubtman aldort ir etlich hinauß geschickht, die denselben Musulman gefangen und hernach in ein ander e. Mt. etc. casstell, Canissa genant, verschickht haben. Alls im aber alda ein grosse schazung aufgelegt worden, hat er gesagt, zu Venedig wären türckhische khauffleüth, die in kheneten und die schazung an seiner stat erlegen wurden. Darüber ist er geen Venedig gefiert worden und alls er hin khomen, hat er den herzogen alda bericht, wie in die von Zeng auf dem möhr gefangen hetten, darauf in der herzog frey und ledig ziechen lassen. Lestlich ist er hieheer geen Constantinopl, und in den divan khomen, und nachdem er sich alda beschwärt und den ganzen handl erzelt gehabt, ist er zu e. Mt. etc. podtschafft, welliche hie residiert, geschickht worden und sy ausfierlich aller der händl, die e. Mt. etc. haubtman desselben casstells Zeng wider den friden treibt, verstendigen lassen, darauf die podtschafft geantwort, wie sy solliches e. Mt. etc. zueschreiben wolte.

Die schäden und ubl, auch muetwillen, so derselb e. Mt. haubtman zu Zeng wider den friden den musulmanischen underthonen zuefüegt und thuet, sein zuvil und uber die maß, welliches man nun hinfüran in khainen weeg mer leiden khan. Das ist von nötten, im fall e. Mt. etc. anderst khrefftigen bestendigen frid und rueh begern, das aintweder dasselb castell Zeng zerstört, oder diser ubertretter, so iezt haubtman darin ist, gestrafft werde, und das e. Mt. etc. sollich casstell ainer aufrichtigen getreuen person, wellche des fridts und guetter rueh wol wahr neme, eingeben, sonst werden sy die von Zeng, des fridens und sicherhait verwirrung, auch entlich, des casstells Zeng gewisser zerstörung die ersten ursacher sein.

Derwegen so thue e. Mt. etc. das, was e. Mt. etc. selbs auch guettem frid und rueh gezimblich und wierdig ist, verlieren auch die wenigiste zeit nit, die articl des fridts und sicherhait zuhalten, zuehren und die versprochen verehrung zu rechter zeit herein zuschickhen.