- 17r -

Allergnädigister kayßer und herr

1 Über mein hie beyligende gehorsambiste relation hab ich wegen Sibenburgen allerunderthenigist zue erinnern, daß dießer vesir zue Offen (wie führ gwüß man mich bricht) die restitution mit Caschau unnd den gspanschafften haimblich vill mehr empfindt alß eüsserlichen erscheint, hatt gar beweglich unnd scharff desthalben an die Porten geschriben, umb daß man dieße sach nit so durch gehen lassen solle. In dießem weßen bemühet sich drin zue Constantinopel der bewusste renegat oder ungrische dolmatsch Sulficar Aga, welcher mit hisigem vesir correspondiert unnd von villen jahren hero haimbiche intelligenza helt, mit dem drin by den Sibenbthürmen verhafften Sockhel Moyses. Noch zue meiner zeit, alß ich resident geweßen, haben dieße beede fast alle wochen zway oder drey mahl brieffe (deren ich selber ettliche gesehen) mit ein andren gewächßlt. Zue deme kombt mir verdächtig vor, waß der hisige vesir (wie in meiner relation gemeldt) mir von den Tartarn gesagt. Möchte woll sein, daß der vesir und sein correspondent, der Sulficar Aga, an der Porten gern waß anstifften, dem Söckhel Moyses mit der Tartarn hilff zum fürsten in Sibenbürgen einsezen oder auffs wenigist die statt Caschau unnd die gspanschafften wider an Sibenbürgen bringen wolten. An der Porten will ich schon hier auff fleissig invigilieren und allerunderthenigist brichten, waß ich darvon penetriern würde. Interim aber wehre ohn mein gehorsambists massgeben mein einfaltige mainung, daß gleichwoll in Oberungarn, wo ettwa vor gschwinden ein fall zue besorgen, man bey zeitten guette vorsehung und Caschau mit allen nottürfftigkheiten so versehen thette, daß man desto weniger sich zue beforchten hette. Ich will zwar führ diß mahl wegen der Venediger krieg und der noch nit gar gestillten unruhe an der Porten den solchen - 17v -

einfall sonder bessers verhoffen, doch khan guette anstehlung unnd vorsichtigkheit nit schaden.

2 Führ daß andere, betreffendt den capuggi bassa, den der vesier hinauff schickhen will, hab ich underthenigist zue erinnern, waß gestalts hie von eim andern capuggi bassa dan voriger vesir Mortaza lestes mahl nach Preßburg geschickht meldung beschehen, tails Türkhen wüssen, daß EKM allergnedigist demselben audienz erthailt. Derowegen wehre ohne maßgeben mein gehorsambists erinnern, EKM den iezigen capugi bassa (sonderlich wann present bringe und mit gebührender ehr erbiettung, wie ich hie doch [?] anlaitung geben, umb die audienz anhalten würde) auch in solchen allergnedigist contentieren sollen, dann wann er by EKM nit vorkomen solte, der hisige vesir eß gewüß hoch empfinden, mir an der Porten ein übels spill machen und all mein negotieren perturbiern wurde. EKM doch alles zue deroselben allergnedigist belieben und guett befinden gehorsambist haimb stelle, nebens allergnedigist mich bevelhde

Ofen den 20. Januari anno 1649

EKM

Allerunderthenigist, gehorsambister Johann Rudolff Schmid zum Schwarzenhorn

- 18r -

- 18v -

Herr Johann Rudolph Schmidt de dato Ofen den 20. Januarii 1649

An die röm. ksl., auch zue Hungarn und Bohemb kgl. Mt. ferner allergehorsambistes erinnern über hie bey gelegte underthenigiste relation.