etc. Nehmett das wiltprett oder fleisch was es sey vndt seudt es erstlich in wasser geus den dieselben Suppen herab vndt mache eine Andere daran nim eine feiste Rindtfleisch bruhe ein Messlein wein vndt ein glass gueten Essigk hacke den ein guett theill Epffell oder zwiebell welches mann Am liebsten hadt Brenne ein wenigk schoen mehl in heissen schmalz thue es daran vndt lass sieden vnndt treibs darnach durch thue dan Kleine oder grosse Rosinen daran Auch zucker ziemet gantze musscaten bluett Ingber Pfeffer vnndt Saffran Lege das wiltpret darein vndt Lass noch eine weile sieden Richts darnach An vnndt streuhe ziemett daruber etc. Will mann es Aber haben So weiche eine Kelle voll Kirschmuess oder Kirschsafft in wein treibe es damit durch einen durchschlag oder Sieblein wurtze es mitt ziemett zucker Ingber Pfeffer vnndt Neglein geuss noch ein glasslein wein darein lege das wilpret oder fleisch darein vndt lass es ein wenigk mit der Bruhe sieden thue dan geschnittene mandeln vndt Kleine Rosinlein daran So wirdt es Recht vndt gutt etc. So mann es will haben So nim die farbe oder das bluett vonn wiltpredt oder Andern fleisch treibe es mitt Essigk oder wein durch ein Sieblein oder tuch Roeste Klein gehackte zwibel in einer Butter vnndt thue sie dran Auch ein wenigk gerieben Rocken brodt wurtze es wohl mitt Ingber viel Pfeffer Neglein ziemett vnndt zucker Lege das gekochte wiltpret oder fleisch in die Bruhe Laß miteinander Sieden mann muss aber Achtung drauff geben das es nicht Anbrenne noch die Suppen zue dicke wirdt mann magk Auch wohl An Stadt des zuckers honig oder Syrop gebrauchen So wirdt es Auch Recht vnndt Guett etc.