Item nimb Trockenwurtz oder gelb Gilgen wurtz die da wachsen In den weihern die Rot an der wurtz seind vnd schoell sy schon das kain schwartz daran bleib vnd schneid sy dann vber zwerch als dinn als ein kreutzer vnd thue dann die geschnitten wurtz In ein messin pfannen vnd das die wurtz drey vierdung Ratlich hab vnnd geuss ein mass gutten Roten wein daran nach dem boesten vnd lass sie sieden als lanng biss der wein gar einseudt vnd thue sy dann aus der pfannen In ein morser vnnd stoss sie nit zuklain vnd nimb In die drey vierdung wurtz zwu mass klerten zucker das ist vier pfund rohen zucker Ehe man klert vnd thue die drey vierdung wurtz In den klerten zucker vnnd seud sie aneinander ein halben viertel stund lang vnd nimb ein vierdung den boesten Imber der gesechelt sey vnd schneid den auff das aller dinnest so du kanst Item mer nimb 1 lot gutten zimerrorlach 3 quint parisskorner 3 quint langenpfeffer 3 quint galgant quint muscatnuss 3 quint Muscatpluet 3 quint negelen 3 quint Cardamomi 3 quint kobeblach die stoss alle klain zu puluer die obgemelten gewurtz allen thue vnder den klerten zucker vnnd vnder die wurtz vnd ruer es wol vndereinander lass sieden als lang ein hoert bar Ayr vnd thue es In ein glasierts geschirr so ist es gemacht