Wildu machen geprestew milch So nim zwei tail milch vnd daz trit tail ayer vnd klopf es vnder eyn ander vnd salcz ez len vnd sewd si an eynem hafen vnd daz der selb hafen In eynem andern hafen sote da wasserer In sein oder In eynem kessel oder gewe ein heizz smalcz vnd ruer es durch ein ander alz eyn vogel speis dar nach du sy In ein duch vnd press sey etc.
Wiltu machen ein pachnew milch So nim der presten milich vnd die sneid ze sniczen vnd mach eyn strawben taig vnd pack sey vnd gibs dann In ein ziseindel oder In eyn pfeffer oder trucken So ist es gut etc.
Wildu sy dann pratten So leg sey dann auff eyn rost oder stos sy an eyn spis vnd begews sy mit einem smalcz oder gibs In einen gelben prodlerm etc.
Wiltu stokmilich machen daz mach auch dez sins wildu du gern So gib sy auch warm vnd du sy einem loffel von eyn ander etc.
Wildu gern so tu sy In ein chas kar vnd la sy wol der seigen vnd gib sey fur einem ayer chas daz macht du auch wol tuen vnd salcz sy gar len vnd gib sy mit saffran
Wiltu aber so gib sy ein gesulczt daz ist auch gut mach ein sulcz dar dar zu vnd stupp es woll etc.
Wildu ein weichselmuez machen So nim waichsel In ein pfannen vnd zertreib sy vnd du pawcz prat [83v] dar ein vnd ze treib ez mit wein durch eyn duch vnd wuercz es woll vnd ayer totter chlopf dar ein vnd mach es dann dick alz ein gemueez vnd versalcz es nicht
Wildu ein muez machen aus chersen daz mach auch dez sins alz daz weichselmuez vnd versalcz nit etc.
Wildu machen ein krichen mueez daz mach auch dez sins alz daz erst
Wildu machen ein spendling muez So nim die spendling vnd gews ein wenig wasserr dar an vnd sewd sy daz die kern dar aus vallen vnd nim eyn pawcz prat vnd treib es dan mit wein durch vnd tue ein honig dar vnder vnd wuercz ez woll vnd mach ez gewolt vnd mach ez dann ab alz die andern mueeser vnd versalcz nit
Wildu machen ein geprant opfelmuez so pren dy opfel ab In smalcz vnd hack sy vnd wuercz sy vnd tue honig dar vnter vnd mach ez dan ab In der pfannen daz ez dichk werd vnd salcz nicht etc.
Wildu machen ein muez aus piren So prat die piren In eyner glut daz sy swarcz werden vnd tuen sy dann In eyn chalcz wazzer vnd zewg In die heut ab vnd sewd sy dann vnd treib sy durch mit pawten prat vnd dar vnder wein vnd honig vnd sewd ez In hayssem smalcz vnd stupp ez woll vnd salcz nicht etc.
Wildu machen ein muez aus kloczenpiren So wasch [84r] si aus warmem wazzer vnd sneid dy stingel davon vnd di puczen vnd sewd si oder la sy In wasserr lind werden vnd stoz sy vnd treib sy durch vnd paewcz prot dar vnder vnd wein vnd honig dar vnder wuercz ez woll vnd salcz len etc.
Wildu machen ein mueez aus nussen so la die nuss erwallen In einer pfannen daz In die hauet ab gen vnd stoz sy dann vnd treib sy durch mit semel die pawt sey vnd mach ez ab vnd smalcz vnd versalcz nicht Wiltu so tuen ayer dar vnder vnd mach ez alz ein semel mueez an der dick etc.
Wildu machen ein holer muez So nim die holer plueet vnd tue sy In ein milich vnd la sy dar Inm sieden piz daz sy gar woll den gesmachen gewin oder hab vnd treib ez mit pawtem prot durch oder mach aus der milich ein mueez sunst vnd pall den holer fur heraus vnd versalcz nicht etc.
Wildu machen ein guet mandel mueez daz waist woll aus reis mel oder suenst mel oder stoz sy alz daz nuss muez etc.
Wildu machen ein guet mueez aus prein So sewd den prein In einer pfannen In milich vnd salcz In len vnd treib In dann durch mit ayern alz arbais vnd tuen ein smalcz In ein pffannen vnd den prein dar ein vnd la In also gemaleich sieden vnd deck die pffannen zu vnd leg frisch holer darauff So wirt ez geleig alz eyn kuech vnd gib ez dann auff ein schussel etc.
Wildu machen ein pfifferling mueez So nim die pfifferling vnd prock sy In eyn chalt wazzer vnd dauch daz sawer dar aus vnd stoz sy dann vnd nim ein semel vnd In ein milich vnd treib es [84v] dann allez mit ein ander durch vnd gib ez vnd wurcz ez vnd smalcz vnd versalcz nicht vnd gib ez auff ein schussel daz holer mueez dez sins etc.
Wildu machen ein guet ayer mueez So nim ayer vnd klopf di vnd ein gute milich vnd ein wenig melbs tue daz zu samen daz waist due vor woll
Wildu machen ein guet gestozzen hueen So sewd ez vnd stez In eim morser vnd nim pawt prot ein wenig dar vnter vnd treib ez durich mit wein vnd schlag ayer dar vnder vnd wurcz es vnd gib ez vnd versalcz ez nicht
Wildu machen ein krebs mueez so sewd die krebs vnd schell die swencz do von vnd die scher vnd daz ander stoz vnd treib ez durich alz daz huermueez vnd leg die helslein vnd die scher dar ein mach ez mit stupp vnd salcz es
Wildu machnn ein arbais mueez So sewd die vnd schlag sey durich vnd mach si ab mit stupp
Wildu machen ein zotet mueez So mach pleter daz die duen sein aus taig vnd sneid sy dann vnd daz sy klein sind alz die chlein ringlein vnd pack sy dann aus smalcz daz sy nit vast prawn sein vnd mach ez dann In einer guten milich vnd gib es vnd smalcz ez etc.
Wildu machen ein ge...auben mueez daz mach alz daz gestozzen huen oder gib praten od in einer ziseindel oder gesoten oder stoz sy In einem morserr oder hack sy gar vnd gib sy In einen chuech In einer pffannen mach ayer ab alz der ay kuechen machen woll vnd nim ein ander pfannen vnd tuen smalcz dar ein vnd der ayer ein leg vnd der [85r] ein leg vnd verpack ez vnd hack herte ayer dar vnder dy auben edoch ij oder trey vnd versalcz nicht etc.
Wildu machen ein gut mueez So nim ein mel vnd schlaeg aeyer dar vnter vnd hack ez vnd mach dar aus ein mueez vnd gilb ez vnd versalcz nit etc.
Wildu machen ein strawben muez So hack die strawben vnd mach ein mueez dar aus wildu so stoz dy strawben vnd treib sy durich mit wein vnd mach daz muz ab mit wurczen iner dick alz ein gestossen hueen muez etc.
Wildu machen ein muz von gestozzen chuchlein daz mach alz daz strawben mueez mit gewurczen
Wildu machen ein mueez von einer kelbrein leber so prat die leber vnd hack sy vnd nim pawcz prot vnd stoz es vnter einander vnd treib es durch vnd mach ez ab mit gewuercz vnd gilb ez nicht vnd laz ez swarczn vnd ein honig du auch darein
Wildu machen ein gestozzens aues kalpfleisch So hach ez klein vnd stoz ez vnd treib es durich mit pawtem prot vnd mit wein vnd mach ez alz ein gestozzen huen vnd laz daz fleich ein wenig sieden
Wildu machen ein lungen muez so sewd die vnd hack sy chlain vnd mach sy ab mit ayern vnd wurcz es vnd gilb es ob du wild etc.
Wildu machen ein zwifel muez so sewd die zwifel vnd hack sy chlain
Wildu machen ein zwifel muez So schell sy vnd sewd sy alz ein opfel muez In dem dampf vnd zertreib si dann vnd reib dann ein semel dar [85v] vnter vnd schlag es durich vnd mach ez ab mit gewurcz vnd sewr ez ein wenig vnd smalcz vnd versalcz nicht etc.
Item von knolach ein mueez So nim iij knolochs hawbt oder iiij vnd stoz ez vnd nim nuez oder mandel vnd stoz es vntereinander vnd treib ez durch vnd nim ein pfannen mit einem smalcz vnd tue ez dar ein vnd ruer ez durch ein ander vnd versalcz ez nicht etc.
Wildu machen ein rech muez So pren lezelten zw eim pfeffer vnd tue den rech swaiz dar vnter vnd honig vnd ein semel reib dar vnder mach ez ab mit gewurcz vnd mit smalcz vnd versalcz ez nicht etc.
Wildu machen ein furhes So sewd daz fleisch vnd hack ez vnd gewz den swais dar vnter vnd wein oder essich vnd reib ein prot dar vnder vnd honig tue auch dar vnter wurcz vnd tue ein klain gehackt zwiuel auch dar vnder vnd smalcz ez mach ez alzo ab vnd salcz ez etc.
Wildu machen ein muez von iiij varben So nim pissen vnd petersily vnd stoz ez vnd treib ez durich mit wein vnd doraus mach ein mueez daz wirt gruen Ein muez aus gueter milich daz ist weis Die trit varb so gilb eyn weis mueez Die iiij varb ist Nim eyn prent prot vnd stoz ez gar chlain vnd daz tuen auch vnter daz gemueez so wirt ez swarcz oder mit weichseln die selben milich treib durch vnd wel sy vor vnd salcz ez len so hast die iiij varb vnd die mueserr mach nicht ze duen vnd salb die schuesseln vor mit eynem honig so rint daz mueez dez der mynner vnder ein ander vnd richt ez an
Wildu machen eyn mueez aus vischen So sewd die visch auff halben weg vnd stoz den vnd nim geriben lezelten dar vnter vnd pawt semel vnd treib sy mit wein durch vnd wurcz sy vnd mach ez Inder dick alz eyn gestossen hueen
Wildu machen ein galrad von einem hechten so sewd den hecht vnd hach daz prot darnach sewd daz prot In wein vnd honig vnd gewurcz daz sewd alz vndereynander piz ez sich giezzen loz alz die latwargen vnd versalcz sy nicht
Wildu machen eyn galrat So nim wein vnd honig vnd lezelten vnd weinper maldel vnd sewd ez durch eyn ander Inder dick alz ein lener pfeffer vnd gilb ez vnd wurcz ez vnd salcz ez len vnd wildu gerne so tuen ein kelbrein leber dar ein die treib durch mit wein vnd sewd sy auch dar Inn etc.
Wildu machen ein guet essen So nim eines Iungen hirs horn vnd seng ez sawber vnd sewd ez vnd stoz es vnd nim daz horn vnd wein vnd honig vnd lezelten vnd sewd ez vnder ein ander ez sol nuer dez horns swais sein vnd der ist guet
Wildu machen ein gepresten sweinkopf so seng daz haupt sawber vnd sewd In daz daz prat davon vall vnd daz prat hack klain vnd mach In mit gewurcz ab vnd nim In dann vnd press In oder la es E der hiczen In einer pfannen oder mach pleter von ayern vnd die bestreg do mit vnd leg sy oft auff ein ander vnd sclag ein weizz duech dar vmb vnd press In vnd mach ein salsen dar zu von lezelten vnd von honig etc.
Wildu machen ein ziger von mandel so stoz die mandel vnd seck sy durch ein tuech vnd nim die milich halbe vnd sewd sy vnd geues dann die kalten milich dar auff gemischet mit zuker etc.
Wildu machen ein Igel von mandel So nim mandelmilch vnd sewd sy gar woll vnd seich sy vnd la sy auff einem tuech truckchen werden vnd mach sy alzo daz sy hert wird vnd stoz dann getailt mandel dar ein vnd geus mandel milich dar vber vnd wildu sy gilben daz macht du auch woll tuen etc.
Wildu ein chaes machen von mandel So nim mandelmilich vnd sewd sy mit wein daz sy gerin vnd seig sy dann durch ein tuch vber stro vnd la sy hert werden dar nach tue sy In ein kar vnd misch sy mit zuker vnd mit anderm gewuerczen vnd gib es dann truchken
Wildu machen verlornew ayer von mandel So tail dy milich In zway tail daz erst gilb vnd leg darein ein totern daz ander tail do mach weisse zeltel aus etc. di do geues mer mandel milich dar an di do gilb sey vnd zuker sy auch daz ist gut etc.
Wildu machen ein gut essen von eim rechhawbt So sewd ez daz daz prat da von vall vnd daz hack dar zu mach ein gehackt von fleisch vnd misch ez vnder einander vnd nim dann die hirren pain dy zway do tuen daz hiren ein vnd vmbslach sy mit eynem plat von ayeren vnd daz gehack slach vmb dy andern pain vnd prat sy dann vnd wurcz sy dann vnd versalcz nicht vnd wen sy gepraten so gib sy pratnew oder mach ein ziseindel dar vber oder In pfefferlein etc.
Wildu machen ein pasteten So mach ein taig von ayern alz du wollest machen hasenorel vnd daz prot den vnd mach ez vber ein hafen oder vber ein schussel vnd pach ez dann In einer pfannen vnd mach ein taig darzw oder tue vogel darein In ein zisendel oder visch vnd doch mit gewurcz so due pest muegest vnd mach ez oben zu will du gerne so sy In eim hafen da ist ez auch gut etc.
Wildu machen ein gefulten visch So tue dy haut vber [87r] sich pey dem zagel vnd la daz prat heraus vnd seud daz mit gewurczen vnd weinpern vnd daz tue wider In dy haut vnd mach In zw mit zwecken vnd prat In dann oder gib In In einem ziseindel vnd versalcz nicht etc.
Wildu machen ein gespicken proten von vischen So nim daz prat von dem visch vnd sewd ez vnd mach ez ab mit stupp vnd gilb ez vnd ein wenig semel mel vnd doch zway ayer od iij vnd formir es alz ein praten vnd seud ez woll vnd stoz dann an ein spis vnd beslag In mit ayer totern vnd prat In vnd sneid hert weisse ayer alz ein speck vnd scheck ez dar ein etc.
Wildu machen ein praten von ayren So slack die ayer In ein schuessel vnd wurcz sy vnd salcz sy vnd gews sy dann In ein secklein vnd daz pint zw vnd la sy dar In sieden daz gar hert werden vnd nim dann die ayer vnd steck sy dann an ein spis vnd prat sy vnd bestek sy dann auch mit den ayern so sicht er sam er gespickt sey etc.
Wildu machen ein wild praten aus den ayern So mach ez alz den praten dan daz due In nicht pratest vnd nicht beschlagest so sneid ez alz ein vinger vnd mach dann ein pfefferlein dar vber etc.
Wildu machen gehalbirte ayer So sewd die ayer hert vnd schel sy vnd sneid sy von ein ander vnd nim den totern heraus vnd hack In vnd petersily dar vnder vnd wurcz ez vnd salcz vnd mach ez ab mit eim ander ay vnd full ez In daz was vnd pack sy dann In ein smalcz vnd mach ein pfefferlein dar vber od gib si In eim ziseindel od In ein gelbs pruelein vnd salcz sy oder gib sy pachnew aues strawben taig
Wildu machen kraus ayer So sewd du ayer daz sy toterweich beleiben vnd mach dann zway lochlein In die spiczen vnd tue den totern heraus [87v] vnd hack petersily dar vnder vnd wurcz sy vnd daz daz weizz In der schalen beleib vnd mach dy tutern In einer pfannen vnd In eim smalcz daz sy nicht zw hert werden vnd full sy dann wider In dy ayer vnd la si dann sieden In einer fleischprue oder In wazzer vnd gib sy dann In einem guten pruelein wen du sy schelest oder In einem ziseindel oder rost si In smalcz
Wildu machen gefullt pratne ayer die mach auch dez sins dann daz tue sy pratest an eim spis mit schalen vnd mit all vnd daz weis hack auch etc.
Wildu machen ein mauschen chuechen So nim doch v ayer oder vij vnd klopf sy wol vnd doch iij loffel voller milich dar vnder vnd ein moßer hais vnd hais smalcz dar ein vnd gews daz dar ein vnd salcz vnd dek ez oben zw vnd leg chollen dar auff so wirt er hoch
Wildu machen ein reisch aus ayern So seud die ayer hert vnd nim dann daz hert vnd hack ez gar chlain vnd nim ein gute milich vnd sewd daz weis dar In vnd wem due ez wild so nim ayer chlar vnd ein wenig schon mel vnd slach daz vndereinander vnd geus ez dann In daz hefen do daz reisch ist so wirt ez dick vnd versalcz nicht
Wildu machen ein groz ay alz ein groz kugel So mach sy In zwo plater daz eine grosserer sey dann die ander vnd In der chlain den totern vnd In der grosse payde vnd den totern tue zu ersten In dy grossen vnd geus dann daz weis dor ein vnd la ez sieden so wirt es hert
Wildu machen ein vercherten visch In treierlay pachen gesoten vnd gepraten so nim den fisch vnd leg In auff ein rost vnd wo du In wild siden [88r] do slach ein tuch dar vmb daz nas sein von wein oder von essich vnd salcz In so sewt es das ander daz pach do besaw ez mit mel vnd geus hais smalcz dar auff daz tritt daz prat sich selb etc.
Wildu machen ein plametschir So seud ein chapawn vnd di haut tue da von vnd hach daz prat mit reis mel vnd wurcz ez woll mit guten gewuercz vnd tue honig auch dar zu ob du wild vnd la ez sieden piz ez truchken wirt so mach In dann ab vnd slach ein tuch dar vmb vnd la In woll durch trukchen etc.
Wildu machen ein gefult leber von einem kalb So hach die leber chlain vnd ayer dar vnder vnd wurcz sy vnd nim daz necz vnd tu si dar ein vnd la si sieden oder prat sy In einer pfannen oder mach ein ziseindel dar an oder mach sy duen vnd gib sy fur ein mueez
Wildu machen ein gerunen mandel milich So sewd visch schuppen vnd zwing sy durch vnd geus sy vnder dy mandel milich so wirt dar aus ein sulcz so leg sy dann auff so wirt sy hert oder la ez ein weisse sulcz sein vnd da leg ein waz due wild so ist ez ein weisse sulcz
Wildu machen ein furhes aus chalbs swais So nim ein pawt prot vnd daz pluet vnd treib ez durch mit wein vnd wurcz ez vnd tue ein honig dar vnder vnd hack dy lungen dar vnder vnd wiltu so macht due woll ein geriben prot dar ein tuen
Wildu machen ein holpraten aus fleischs So hack daz fleischs chlain vnd slach ayer dar vnter vnd wurcz vnd salcz vnd ein wenig mel vnd nim [88v] ein spis der alz groz sey alz ein welg holcz vnd spiz den vnd an der mit laz In groz vnd daz prat slach darvmb vnd prat In mit smalcz vnd wenn es hert werd so tue ez herab vnd wiltu In dann fullen daz tu mit weinper vnd veigen vnd mandeln oder mit vogelen In einem ziseindel oder visch vnd prot In dann paz auff ainem rost vnd verpren In nicht
Wildu machen ein gut fleisch So prat daz fleisch vnd mach ez In ein ziseindel vnd daz es kalpfleisch sein daz wirt ein gesmachs essen
Wildu machen gefult opfel so sneid oben die opfel auff vnd hol si aus vnd full sy dann mit praten opfeln di hak oder mit weinpern vnd mach dy opfel wider zu prat sy oder pach sy aus eim strawben taig vnd smalcz
Wildu machen gefult oblat die mach auch dez sins vnd mach dann zway pleter aus taig vnd die slach darvmb vnd vermach sy gar Inn vnd pach sy dann In einer pfannen etc.
Wildu machen gefult pleter aus ayern So nim ayer vnd klopf daz weis besunder vnd nim ein wenig smalcz In ein pfannen daz ez nuer den poden necz vnd geues die ayer dar ein vnd mach gar duenne pleter vnd mach aus den totern auch pleter vnd di pleter bestreich pranten opfeln oder weinper oder feigen vnd welig si dann vber ein ander vnd sneid si dann alz di rosen wurst vnd stoz ir doch v od iiij an ein spislein von holcz vnd mach ein taig vnd welig sy dar Inn vnd pachs dann vnd zewg dann die spislein heraus vnd sneid si dann noch der leng auff
Wildu machen gefult sniten dez sins so leg Ie ain [89r] sniten auff die andern wenn du sy bestreichest doch vier pach sy auch dez sins vnd sneid si auch auff zu sniczen etc.
Wildu machen gefult semel so sneid die semeln oben auff vnd hol sy aus vnd full si auch dez sines oder mach vogel In ein ziseindel oder visch vnd full di gar ein vnd mach dann daz lueklein wider zu vnd pach si auch etc.
Wildu machen gefult krebsen di mach mit ayeren vnd gehakten krebsen alz die gefulten ayer vnd dy prat an einem spislein oder pach sy etc.
Wiltu machen gesulczt krebs so seud die krebs vnd schel dy halselein aus vnd die schar vnd die tuee in ein sulcz von vischen oder kelbrein fussen etc.
Wildu machen ein gefuelte milich di prest zu dem ersten vnd mach si dann geleich alz di gefulten sniten vnd pach si auch vnd sneid si auch daz selben sins daz man die full sech etc.
Wildu machen ein gefulcz huen so zeug Im die haut ab daz si gancz beleib vnd nim pratigs wildprat vnd speck dar zw vnd hack daz alzo rohes chlain vnd tue gewurcz dar vnter vnd daz tue dann wider In di haut vnd tue ez In ein hafen vnd la ez sieden vnd gib ez dann In eim gueten prulein oder trukhen es ab auff einem rost etc.
Wildu machen ein sulcz aus vier varb So nim kelbrein fuess oder schaff fuezz vnd di sewd piz di pain da von vallen vnd mach dann die sulcz ab Die gruen varb ist mit petersily saft da tue der fuss vnter vnd la si dar vnder sieden vnd di treib durich di fuess far Die swarcz varib von weichsel oder prenten prot do due der fuss auch vnter die gelb mit saffran vnd wurcz si all vier di weiss ist von mandel oder von nuessen dy treib durich vnd [89v] sewd ygleichew varb besunder vnd tue ein wenig wein dar ein dann vnder die weissen nicht wann si geruen vnd wem due si dann auff wollest gissen so salb di schussel mit honig vnd la di sulcz vberslahen so rint si nit vnder ein ander etc.
Wildu machen ein gespott In dem mayen so nim ein fliessenden kes vnd sneid auff ein hoff schuessel grozzer dann ein vinger vnd slag ayer dar an vnd ruer ez woell durich ein ander vnd pach In aus einem mayschen putern etc.
Wildu machen gefulte pleter aus taig So mach die pleter gar duen mit einem welig holcz vnd nim dann ayer vnd sewd di hert vnd dy chacht chlain vnd di mach dann ab alz sam due wollest gehabritew air mach vnd wurcz ez vnd nim honig auch dor vnter vnd bestreich di pleter do mit vnd mach dann ein strawben taig vnd welg ez dar Inn vnd bach ez vnd sneid ez dann zu sniten vnd gib ez alzo trucken oder mach ein ziseindel dar vber
Wildu aber aus der full machen ein gemueez alz ein lungen muez So mach ez ein wenig len daz ez Im geleich sein wildu aber so treib ez durich mit wein so ist ez ein guet muez
Wildu machen ein krancz von vier varben So mach pleter aus ayern weiss aus chlar gelb aus totern vnd gruen mit saft vnd ayer chlar vnd swarcz auch dez sins vnd welig sy vber ein ander vnd sneid dann di ab Inder leng alz zway glider an ein vinger vnd stoz dann ye ain varib nach der andern an ein schin vnd mach In dann ze samen alz ain krancz vnd mach ein strawben taig vnd dar In letaig In vnd pach In dann vnd wend er gepach so zewch di schin heraus vnd besneid In dann oben vmb vnd vmb so siecht man die varib etc.
Wildu pachnemilich machen In einem morser oder In eim scherlen So nim ein guetew milich vnd doch vij ayer vnd die slach gar woll vnder ein ander vnd tue ein smalcz an den scherben vnd tue ez dann dar ein vnd dek ez obem zw vnd leg frisch koler dar auff Oder nim ein gerunnen milich di auff gelegt sey vnd slach si durich mit ayern vnd mach si dann auch dez sins alz vor In eim morsar oder In einem scherben etc.
Wildu machen ein haniff suppen So nim den haniff alzo rohen vnd stoz den gar woll vnd treib In dann du rich vnd wiltu gern so sewd In dann In einer pfannen vnd mach daz er gerin vnd aus dem topfen mach ein gemuez vnd wurcz In vnd ein honig tue auch dar ein vnd laz ez alzo weis vnd mach In in der dick alz ein prein der len sein
Wildu In pressen den haniff So mach In auch dez sins vnd press In dann vnd gib dann auch gesniten vnd tue ein suss stupp dar auff daz ist guet etc.
Wildu gern so pach In alz di presten milich wenn man aber nit smalcz wolt essen so ist ersust pesserr oder due mach In In ein pfefferlein oder ziseindel
Wildu In praten daz macht auch woll tuen wenn man smalcz ist am samcztag So macht due In geleich geben alz die presten milich vnd ab machen
Wildu ein chuechen dar aus machen So mach In dez sins alz den prein vnd treib In durich vnd laz In auch pachen In eim morsar
Wildu machen pehaymisch arbais So sewd die arbais In einer kaltguezz vnd wen si di paelig lassen so gews di kaltguezz vnd di arbais In ein schefflein vnd reib ez vnder ein ander auff einen durich slach vnd wasch si dann gar wol aues wasserr mit der haut vnd la si dann sieden vnd versalcz nicht vnd gib si dann also oder mach daz prulein gel etc.
Wildu machen ein pasteten So nim ayer vnd di mach In ein smalcz alz der ein gerueert air mach vnd di chlopff vnd nim dann ein smalcz daz hays sey In einem morsar vnd tue di air dar ein vnd nim dann vogel di rost auch In einem smalcz vnd di stoz dar ein oder pratnew huener vnd di zeslag vnd steks auch dar ein vnd lo di fusslein oben heraus ragen du macht auch woll pachen visch dar ein tueen
Wildu machen zotet arbais so sewd si alz die pehaymischen arbais vnd la sy dann trukhen sieden daz daz wazzer einsied vnd stoz sy dann woll vnd wurcz sy vnd tue honig dar ein vnd treib sy durich ein durichslach so werden si dann alz di maden
Wildu sy swarcz machen So mach si mit prantem prot daz stoz gar chlain vnd tue ez dar vnder vnd treib sy durch dez sins etc.
Wildu sy pachen So mach sy auch dez sins vnd la si stark werden vnd mach dann chugelein dar aus vnd pach si vnd welg sy In strawben taig etc.
Wildu si eins andern sins pachen So mach sy aber der lay vnd slach ayer dar vnder vnd mach ein taig dar aus vnd pach si mit einem loffel zewch sy ein alz di chlain chuegel etc.
Wildu ein chuechen dar aus machen So mach die arbais ab alz vor vnd schlag aier dar an vnd tue ez dann In hais smalcz In ein morßer oder In ein scherben oder In ein pfannen vnd la sy dar Inn pachen etc.
Wildu gesulcz arbais machen So mach si auch dez sins vnd sewd si In dem honig so werden si starkh vnd sneid si dann ze sniten vnd leg si In ein schussel vnd mach ein sulcz dar vber vnd di lo vber slahen so zerueert ez nicht vnd beleibt also etc.
Wildu gern due macht woll pleter da mit fullen aber ez ist etwas spor vnd zerueert gern etc.
Wildu machen ein holpraten dar aus So mach sy ab auch dez sins vnd slach sy vmb ein hulczein spis vnd daz der alz groz sein alz ein welg holcz oder grosserr vnd prat sy vnd begews sy mit hayssem smalcz Etleich sprechen man solt honig auch dar auff giessen so wurd er dester sterker vnd geriben lezelten den sol man auch dar ein tuen so ist er dester gesmecher vnd guet etc.
Wildu ein furhes aus arbais machen So sewd sy daz si nicht muesot werden vnd geprant pfeffer prot vnd treib si do mit durich vnd reib ein lezelten dor vnter oder ein prot vnd nim daz verpruennen prot vnd stoz ez gar chlain vnd tue ez auch dar vnder so wirt ez swarcz vnd nim chlain gesniten zwifel vnd di swais ab In ainem smalcz oder oel di tue dar ein vnd honig vnd wurcz ez vnd mach ein hert prot alz ein hasen kopf vnd tu ez dar ein vnd versalcz nicht etc.
Wildu gern so macht due geschoffzagel dar aus machen So nim nuer der geverbten gestozzen arbais vnd di mach alzo auff ein schussel daz waistu woll aufzetailen vnd wildu so trukh auff yegleich schuklein ein besunder gefert mit einem model etc.
Wildu machen wildprat aus rindfleisch So nim daz pratig sey vnd hach ez alzo rohes vnd ayer dar vnder vnd mach dann lange chugelein dar aus di In der grozz sein alz ein stuck fleisch vnd la si In einem wazzer sieden In einer pfannen vnd mach dann ein guet pfefferlein dar vber daz gelb sein oder ein ziseindel oder ein gucz pruelein
Wildu machen daz wildprat In ein sulcz This recipe possibly refers to the previous one. daz macht tue auch gar woll tueen aber due solt ez zu dem ersten wurczen vnd darnach so sulcz ez so ist ez gesmach In der sulcz di sulcz mach aus fleisch
Wildu machen ein angelegt huen So nim ein kappawn oder ein guet hennen vnd dy vider gar sawber [91v] vnd tue di hawt do von vnd sneid daz prat vber all vom dem pain vnd daz prat hakh auch alz var mit ayern vnd slach ez wider vmb di pain wenn due ez beraittest mit gewurcz vnd sewd ez dann In einer fleisch pruee vnd die pruee mach ein wenig schon etc.
Wildu machen ein gesoten huen In eim glaz so vider daz huenn vnd zewch Im di haut ab vnd la Im di fusslein dar an vnd daz helsslein vnd daz ander fleisch daz hak vnd wurcz ez vnd di fuslein schewb nach einander In daz glaz vnd pey dem helslein tue daz prat oben dar ein vnd secz daz glaz zu einer gluet vnd so sewt ez Aber di hawt solt due vor zu neen e due sy In daz glas tueest etc.
Wildu machen ein guet pachens von chelbrein lungen So hak di lungen chlain vnd ein winczig gesotes speks dar vnder vnd zway eyer totern oder trey vnd wurcz ez vnd mach dann chugellein dar aus vnd mach ein gueten strawben taig vnd zewch di chugellein dar durich vnd pach si vnd versalcz nicht etc.
Wildu machen ein paches So nim semel vnd ayer totern vnd doch iiij muscat vnd ye ains In vire vnd nim ein smalcz In ein pfannen vnd ruer ez dar In ab vnd tue ez dann In ein morsar der hays sein vnd ein wenig smalcz dar In vnd dek ez oben zu vnd koller dar auff di frisch sein vnd lo ez dann dar Inn pachen etc.
Wildu wamppenflekh pachen So lo sy gar woll sieden vnd mach ein strawben taig vnd zewch si da durich vnd pach si aber du solt si auch zw dem ersten In smalcz rosten ob du wild vnd salcz sy etc.
Wildu ein pachens machen vber ror So mach ein strawben taig vnd nym den rar di lid ab vnd zewch si durich den taig vnd pach sy vnd wenn si gepachen so zewch di ror heraus wisch si daz si nicht nas sein so pachstu mer dar vber pistu ein guet essen hast vnd mach ein gussel dar vber mit honig vnd ein wenig wein etc.
Wildu ror fullen wenn du si pachst So full si mit weinpern vnd feigen oder mit gepranten opfeln daz di ab gemacht sein mit gewurcz vnd di ortlein stoz In ein taig vnd hab si dann In daz smalcz daz ez auch pach etc.
Wildu charbel pachen So mach pleter alz di hasen orlein vnd zersneid di In der mit vnd tue ein hayss smalcz In ein morser vnd laz den morsar auff der gluet sten vnd vass sy an ein spislein vnd tue es In den morsar vnd rur ez vmb laz alzo pachen vnd ker ez vmb daz ist guet etc.
Wildu unclear... prestew milich eins andern sins dann daz erst So nim ayer vnd milich vnd chlopff di gar woll vnder ein ander vnd tue daz In ein pfannen vnd mach ez alz ein vogel speys vnd press sy dann In einem leinen duch vnd mach sy dann wie du wild etc.
Wildu ein pachens machen alz di gesniten fronsen So mach auch pleter von taig vnd zersneid die vnd welg si vber ein anderr vnd pach si In eim smalcz daz nicht ze hays sein vnd oben truk sy zesamen E du sy In daz smalcz tuest etc.
Wildu ein gestrikcz pachenes machen So mach ein starken strawben taig vnd nym ein chlain hoff schuessel vnd mach ein lochlein dar durich vnd dor durich so pach ez vnd ob ez In der mit zu samen wolt gen So wer Im mit eim hulcz ein spislein so wirt es alz die chrewcz etc.
Wildu machen ein saluay muez so pach saluay vnd hack In dann alz di stawben vnd mach dar aus ein mueez aus einer gueten milich vnd versalcz nicht etc.
Wildu pachen stern machen so mach pleter alz hasen orlein vnd sneid di stern dar aus vnd albeg zewgn vber ein andern vnd full si daz ist auch guet oder pach si alz anderr pachens ist aber peserr etc.
Wildu machen ein salsen So nym petersily vnd saluay vnd pfeffer chrawt vnd daz hak gar woll vnd voch ein taw mit einem weissen tuch vnd dawch ez do mit durich vnd trukhen ez ab vnd behalt ez wie lang du wild vnd wenn du wild so mach ez ab mit essik oder mit wein etc.
Wildu ein suss salsen machen So nym geriben lezelten vnd sewd In In wein vnd honig mit zimet Imber vnd daz mach dann duenn so ist sy guet etc.
Wildu ein weisse salsen machen So nym mandel kern vnd stoz si gar woll vnd reib sy durich mit wein oder mit essik Gewelt dir aber der mandel nicht So nym knoflach vnd mach si mit gewurcz ab vnd wildu si gelb haben so mach si gel oder gruen mit petersily saft etc.
Wildu machen ein salsen aus payssel per So nym geriben lezelten vnd reib ez durich mit wein oder mit esik vnd di per stoz vor etc.
Wildu mach ein salsen aus nuessen So nim nues vnd semel vnd hert gesoten ayer aber nim newr daz weiss von den ayern vnd stoz ez durich ein ander vnd treib ez durich mit wein vnd wurcz ez vnd salcz len so ist dy sals weis di weiss sals mit knoflach di treib durich mit semeln vnd salcz si nicht vnd ein wenig fleisch pruee duen dar vnder etc.
Wildu ein grune salß machen aus knoflach So nym daz gruen vnd petersily vnd hak ez vndereinander vnd stoz ez vnd treib ez durich mit semeln durch ein tuch In der dikh alz ein pfeffer mit essik oder mit wein etc.
Wildu machen ein salsen aus chren So nim chren vnd schab In schon an der wurcz vnd sneid In alz di wurfel vnd stoz sy vnd semel dar vnder vnd treib ez durich mit fleisch pruee etc.
Wildu so mach aus dem chrawt auch ein gruene [93r] salsen die wer auch gut geriben mit wein oder stos ez auch vnd treib si durich etc.
Wildu ein prawnew salß machen So nym erper vnd semel vnd treib ez durich mit wein etc.
Item plabew salß So nym hayper di mach auch dez sins mit semel vnd wein etc.
Item salß aus holper so stoz si vnd treib si durich mit wein vnd wurcz si daz sy suss sein oder nym ein honig auch dor vnder etc.
Wildu ein hueen praten an fewr So nym ein schawb vnd den mach naz mit eim ol vnd zunt In an vnd prat daz hueen da pey etc.
Wildu ein ayer Im smalcz auff eim papir machen so smirb daz papir mit eim smalcz vnd secz ez auff ain gluet vnd mach ez dar aueff etc.
Wildu ein reymigs ayer Im smalcz machen So slach di ayer In daz smalcz vnd daz dez smalcz vill sey daz ez vber di ayer gen vnd seich ez dann dar ab vnd zu dem ersten so laz daz smalcz nicht vast hays werden etc.
Wildu etc. prest visch so sewd si vnd tuen di grat dar aus vnd wurcz si dann gar woell vnd press si dann vnd mach si ab zu dem ersten E du sy geprest vnd gib si dann wie tue wild gesniten vnd zuker dar auff oder In eim guten Iuessel oder gehiczt auff einer gluet oder wie du wild etc.
Wildu machen ein gehakt holer mueez So sewd den holer In einer milich di guet sein vnd treib In durich daz di milich den smak hab vnd nym zway ayer oder iij vnd ein guet mel vnd slach di ayer dar vnder vnd hak ez gar woll vnd mach daz muez dar aus etc.
Wildu ein guet essen von hennen geben So nym die Iungen hueener vnd di stoz dy fuslein kreglein leberlein vnd die haelslein vnd mach ein gestossen hueen [93v] dar aus vnd sewd dann die hueener alz vil du ir dann wild vnd di gib dann dar In Indem gemueez daz ist auch seldsam essen
Wildu ein furhes aus dem plut machen So nym ein wein vnd sneid In di helsel ab vnd daz plut voch In den wein vnd daz sewd dann durich ein ander vnd mach ez dann mit pawtem prot vnd ob du wild so nym daz Ingunclear?? vnd gib ez dar In oder du hak es vnd reib ein prot dar ein etc.
Item ein chuechen aus ayern In einem morsserr So nym vij ayer vnd ein wenig schon mel vnd klopf ez durich ein ander vnd geues ein hais smalcz In dem morßer vnd di ayer dar ein vnd secz es auff ein gluet vnd dek es oben zu vnd frisch koller leg dar auff etc.
Wildu In eins andern sins machen In der pfannen So nym saluay dar vnter vnd gute chreniklein vnd reib ein prot dar vnter vnd pach In In einer pfannen vnd gib In dann wie du wild In einem ziseindel oder pfefferlein oder gib In suenst also trukhen etc.
Wildu machen wurst aus hunern kragen So nym rintfleisch vnd hach daz chlain vnd doch iij ayer oder iiij vnd wurcz ez dann vnd nym dann die kraegel vnd dy tu her vnd di chopfel laz an dem helslein vnd daz gehacht prat due dar ein vnd beleibt dir dez prates vber so mach chugellein dar aus vnd tue In di fusslein vnd di magellein tue auch an di fusslein vnd sewd ez dann alzo vnd gib ez dann In eim gelben prulein oder pfefflein daz auch gelb var sey oder In eim hueern mueez oder In eim ziseindel etc.
Wildu machen ein chuchen In eim morsar So nym ayer vnd di klopf gar woll vnd sneid petersily vnd saluay dar vnder vnd mach ez dann In ein morsar vnd mach dann ein suss prulein dar vber vnd daz zersneid alz groz alz di vinger vnd leg ez auff etc.
Wildu machen ein lawtrew fleisch pruee wenn daz fleisch nit guet wer So nym smalcz vnd lo ez gar woll In der fleisch sieden So wirt si lawter etc.
Wildu gesulcz visch verchern di nicht gesten wolten So mach ein swarczew varib vnd nim lezelten vnd honig vnd wein vnd di varb vnd sewd ez durich ein ander vnd tue ez dann vnder di visch vnd di sulcz die tue auch dor vnter vnd mach ez dez der sterker so ist ez woll gesmach etc.
Wildu ma...e wilprat aus vischen So tue dy grat dar aus vnd hack si chlain vnd petersily dar vnder vnd doch iij oder iiij ayer vnd mach dann chugellein dar aus vnd di sewd dann vnd tue gewurcz dar ein vnd wenn si gesieden so sneid si dann von ein ander vnd mach ein pfefflein dar vber alz sam du wollest machen ein furhes aus arbaissen etc.
Wildu ein gemacht wurst machen So henk di wurst In ein rauch vnd prat si dann vnd mach dann ein ziseindel dar vber mit zwifeln oder mit opfeln etc.
Wildu sawfuezz ein machen So nim ein semel vnd tue si In ein fleisch prue daz si waich werd vnd treib si durich alz ein pfefferr vnd In der dik vnd mach ez dann ab mit saffran vnd gewurcz vnd di fuezz vnd die oren tue dor ein etc.
Wildu machen ein gemacht staren So mach si In ein ziseindel oder In ein pfefferlein oder ein pikt oder mach ein mueez dar aus oder gib si praten oder gib si In eim pastel Wenn du daz pastel wild machen daz mach von ayern In einer pfanen vnd tuen di starn dar ein alz der wald vogel dar ein machen wolst
Wildu essen machen von varben ez sein gemuez oder pachens So mach di varib ab mit wein oder mit essik plobew varb von chornpluemen di derr In einem morserr vnd stoz si dar In gar chlain vnd mach si dann ab mit essik oder wein vnd loz si sten oder behalt ez wie lang du wild alzo mach gruene auch aus saft etc.
Wildu weisse machen So pren ayer schaln In einem [94v] hafen voller schall vnd pren si In einem zigelofen oder chalch ofen oder pey eim hafner vnd mach ez dann ze stupp vnd daz stupp mach dann mit ayer klar ab so wirt es weis oder mach es mit essik etc.
Wildu machen ein holer muez daz mach dez sins alz daz prauper mueez durich treiben mit pawter semel vnd wurcz ez auch salcz len
Wildu machen ein rosen muez So mach ez geleich alz daz holer muez seud di rosen In einer milich vnd treib si durich vnd mach ein muez dar aus Also machtu ein liligen muez woll mach dez sins oder ander pluenden di da gueten gesmach haben etc.
Wildu machen ein muez so prenn daz mel In smalcz ab vnd mach dann daz muez dar aus vnd In die milich slach ayer doch x oder xij vnd geues ez In daz smalcz vnd gilb daz muez so ist ez guet vnd versalcz ez nicht vnd lo ez nicht knollat werden
Wildu ein durden machen So nym mangolt vnd saluay vnd petersily vnd daz sneid alz chlain durich ein ander vnd wasch ez dann aus eim frischen wazzer vnd reib kes dar vnder vnd tue ein smalcz dar ein vnd ayer vnd mach dann pleter aus taig vnd da tue ez ein vnd pach ez In einer pfannen vnd tue ayer totern oben dar auf vnd la ez woll pachen etc.
Wildu Rabel machen daz mach auch dez sins vnd vohes In die pleter alz die krapffen vnd sewd ez In einer pfannen gar woll vnd wenn due si aus nempst so tue geriben kes dar auff vnd auch dar ein smalcz vnd salcz etc.
Wildu ein pastel machen aus fleisch So nym Iunge hueener vnd di sewd oder starn oder tauben oder was due wild vnd hack daz vnd nym ayer vnd mach si alz di eingerurten ayern vnd nim dam ein smalcz In ein pfannen oder In ein pek oder In ein scherben vnd daz ez hays sy vnd tue ye ain tail der ayer dar ein vnd dann ain tail dez fleischs vnd lo ez alzo pachen etc.
Wildu chuechel pachen So nym ein labs wasserer vnd mach den taig da mit an vnd slach ayer dar vnter vnd mach In nicht zu len vnd nim ein wenig smalcz In die pfannen vnd di chuchel zewch mit eim loffel ein vnd daz daz smalcz nicht dar vber gen So gent sy schon auff vnd werden dann rogel vnd trukhen etc.
Wildu si eins andern sins machen So nym ein haissew milich vnd zewch si klain ein daz haisset auch pratew chuchel etc.
Wildu aber haubete chuchel pachen di mach an mit kaltgazz vnd den taig lo ein weill sten vnd pach si dann dez sins alz di ersten etc.
Wildu ein selczsams ayeer Im smalcz machen so nym opfel vnd di tue In daz smalcz sam due praten opfel wollesst machen vnd wenn sy ein wenig prawn sein so slach di ayer dar ein vnd salcz zue ersten etc.
Wildu ein guet pachens machen aus geribner semel So nym geribnew semel vnd slach ayr dar ein vnd mach alzo den taig stark vnd pach si dann vnd zewg si dann mit eim loffel ein vnd versalcz sy nicht etc.
Wildu mandel muez machen So stoz di mandel vnd treib si durich mit semel wenn du nicht anders hast vnd mach ez ab mit zukker vnd versalcz nicht etc.
Wildu pratne gestosnew chuechel So nym hais wazzer vnd mach den taig do mit ab vnd air vnd daz der taig stark sein vnd stoz In gar woll In eim morsar daz er zach werd vnd zewg dann chlainew chueechel ein vnd daz daz smalcz nicht ze hais sein due macht In auch woll ab machen mit milich vnd versalcz sein nicht sy sint rogel tuet man In recht etc.
Ein kes mueez wildu daz machen daz daz durich getriben sein So mach ein guet kes prue vnd paw semeln dar ein vnd la sy dar Inn ab waikhen vnd treib si durich mit der prue vnd mach ez ab daz ist gut
Wildu ein gestossez mueez machen aus piessen wurcz vnd petersily wurcz oder ander wurcz So wasch si gar [95v] schon vnd stoz si dann In eim morsar vnd treib si durich mit wein vnd pawter semel vnd mach si dann ab vnd versalcz nicht
Wildu chueten latwergen machen So nym chuetten vnd leg di In ein kessel vnd geues wasserr dar an vnd laz si gar woll sieden dar nach nym sy heraus vnd sneid die kutten von dem kern stal vnd di cherstal wirf hin di chutten treib durich ein enge reittern mit einem starkhen loffel darnach so tue wider In den kessel vnd tue honig dar vnder vnd lo si sieden vnd lo si nit an pruenen vnd wenn si noch dem sieden prawn werden vnd lossen si auff zehen an dem loffel so haben sy ge nug gesoten darnach macht due si dann wurczen wie tue wild Mandel chern macht du auch dar zu nemen wenn due ez sewdest vnd geues ez dar noch auff ein pret daz ez trukhen werd so sneid ez zu chlainen stuklein vnd tue si In wew du wild etc.
Wildu weichel salsen machen oder latwergen daz weistu woll auch gesoten piz di chern davon vallen vnd durich getriben etc. Wildu si aus pieren machen oder opfelen daz mach auch dez ersten sins alz di kuetten vnd sneid di kern stal da von vnd sewd si dann aber pas etc.
Ein gesuelcz von kes So nym ein morben kes vnd semel mel vnd zereib ez vnder ein ander vnd nym dez kes mer dann dez melbs vnd leg ez auff ein pret vnd welg ez mit ayern daz nit zestark werd vnd mach dar aus zollen di nicht zu groz sein vnd sneid si dann chlain vnd nym ein morserr vnd tue ein wenig smalcz dar ein vnd secz ez zu dem fewr daz ez hays werd vnd leg dann di weklein dar ein vnd nym dann nichts anders dann lein oder ol etc.