§ xiiij Item zuo machenn sued honig in win als vil du wilt vnd nim ouch ein witte schusslenn vnd bese denn win mit wissem mel als ein muesslin schlach ein eier tuter in ein ander schuessel vnd och ein Wenig saffrann das zertribe gar woll mit denn gemaechtenn honig wein vnd tuo es in denn ge zwerten teig temperier es gar wol vnd wuerff ye ein stoeiblin mels dar zuo in die schuesslenn als lang vntz du ein lidigenn teig gemachest dan so bereite ein sufer tuoch vnd zuech denn teig daruf mit einem welholtz zuo massenn duenn vnd schnide denn foerm gros oder kleinn als du die krappffenn haben wilt ouch ye der fuelle da richt dich nach oder waz teig man mit hefel oder birn oder hopff wasser macht die muesser alle uff gand vnd darnach aber knetten mit laemem wasser oder mit gesotten honig win da wueß dich nach zuo richtenn