Mach den teig als vor ader als der lappen teig vor gelerd Mach die fulle nit zu starck von eyernn ader milch hunerbrue ader wolsmackend fleischbrue nit vil kloph die eyger dar Inn vnd milchsmaltz Saltzs vnd wurtzs als vor Setze die teigphan In die phan Guesz smaltz dar zcwischen das der teig nit anborne Thu die full In deigphannen hastue huener wilbroid alles vor gesoten an die stad Isz sie walt vogel gebroten fleisch Hacks alles vilschoen Thue isz In die fulle vnd mach eynen teig deckel dar vber verrenftels schon Gusz smaltz vf die decken Setz die phan vf rische kolnn Zcuem irsten eyn kleyn fuer vnd ye bas ye basz Rieb die phan oft vmb das . das smaltz vmb vnd vmb die teig phan gehe bisz isz brasselt vnd poppelt von sieden so ists gnuech keme dan eyn rauch So brente der thorte ane vnd wuerde brunseln Das verware mit smaltze Also ist die teigphan als woil zcue essen als die scharenn do Inne