Categories:
Main ingredient: fruitPreparation: electuaryType: -Latwergenn von kutenn Regelpirn ader verardopfel Nym kuten In eynenn hafenn Vnd thue holtzlein da fur das keyne herauß vall Vnd ker den hafenn vmb Vnd setz In auff ein anderen hafenn der demm gleich sey an dem brort Vnd sydings wassers voll sey das der selb dunst die kuetenn waych mach So nym sie danne also warmm vnd thue sie In ein engs sib vnd streich sie durch das die kernn vnd hewt heraussenn bleiben vnd Nym danne den selbenn Taig vnd wig In vnd ydemm pfunt taigs soltu ein halbs seydel honigs Ader ein halb pfunt Zuckersz gebenn ob du wilt Vnd Rur das durch ein ander Vnd lasz denn funff ader sechsz tag steenn Vnd durch ein ander zergenn vnd waychenn Vnd wenne dus siedenn wilt So thue sie In ein kessell auff ein dryfusz auff kolenn vnd Rur sie mit einem praitemm scheyt das nicht Anprynne Vnd wenn es dick genug gesewdt So thue ein halb lot pfeffers darann Vnd alszo warmm In kessel Nym alle wagenn zu einem libra taigs ain quintenn muschat ein quintenn Negelein eyn quinten Zymyn Vnd 1/2 lot oder ein quinten Ingwerß nach demm Vnd du sie gernn rosch hast Vnd wurck sie damit ausz Vnd mach kuchenn darausz Tustu aber keyn wurtz dar ein vber all So ist sie gut fur die Stul Vnd die mit zucker gemacht ist als obenn geschriben stat ist Zu mal gut fur die stul wenne kein wurtz dorInne ist Vnd mit wurtzenn ist sie allwegenn gut vnd gesunt auff die kost Zu essenn Wanne [187v] sie dewet wol Vnd die mit Zucker dewet noch pasers auff die kost Vnd vor der kost verstopfft sie etc.