DV solt nemen hecht vnd slach die auff vnd tuee die greatt dauon vnd den swaicz von hecht muest du haben do wirt es swarcz von hastu sein nicht genueg So nym schifflein leczellten die solt prennen das sy swarcz werden vnd lass chalt werden vnd stozz chlain vnd slach durch ein sib vnd nymm dann ein wein vnd leg die leczellten darIn vnd hakch mit den vischen chlain das du zu massen daran Vnd nym ein Rokchein prott vnd reib das chlain vnd mach es durch einander mit dem visch vnd leczellten vnd gewurcz es wol vnd tuee nicht Saffran daran Nym nue daz merrer tail der visch do mach von dem visch do mach ain pratten von vnd stekch den pratten an den spizz vnd nym arbais prue die tue In den kessel vnd do leg den pratten In vnd lazz In sieden vncz an die stat vnd la In auch nicht versieden vnd der mach zwen oder drey das er sich auf ein schussel vergee vnd nym mandel vnd sneid In nach der leng klain vnd Spikch den praten damit vnd gancze negel stekch auch darIn do wirt es gesmach von Nu sol man 1/2 libra weinper haben die sol man reyben chlain wealhischen wein sol man sy durch slachen vnd zukcher vnd gut gewuercz das sol man darczu haben Vnd gib in hin