Categories:
Main ingredient: -Preparation: -Type: medicinalIten Du solt auch wissenn welche zeit in dem iarr dir schad ist kummenn in deynen magen von feistem fleisch oder fischenn So soltu dar auff essenn pirnn oder keß Nach den vischen nueß vnd pirnn Nach dem fleisch keß vnd pirnn Doch soltu nymmer essenn gruen obs dann an dem tag so du serr gegangen hast vnd wenn du grosserr hitz in dem magenn enpfindest Vnd in dem summer soltu ir wenig essen oder ein gut weil dar auff nichts anders essenn Wann es spricht Avicenna wie wol das grun obs als pflawmen vnd krichenn vnd kirschen die do sawer sein vnd amerellen wie wol die nuetz sein vnd den lewten die do groß arbeit habenn vnd der vil Colera hat das hicziget den magen doch macht sie des menschenn plut wasserig vnd faul Dar vmb spricht er das die menschenn die mancherley vnd vil obs essenn das sie dick den Rittenn gewynnen vnd das tut kein ander obs dann das grun ist merr dan ich hie genent hab vnd ist nyemand gesund als der selbig meyster meynt wanne es macht alwegenn des menschen plut faul etc.