Considerans hystorie sacre prolixitatem, necnon et difficultatem scolarium quoque circa studium sacre lectionis, maxime illius que in hystorie fundamento uersatur, negligentiam quorundam quoque ex inopia librorum imperitie sue solatia querentium, uolentium quasi in sacculo quodam memoriter tenere narrationes hystoriarum, temptaui seriem sanctorum patrum, a quibus per leuiticam et regalem tribum christus originem habuit, cum eorum operibus in unum opusculum redigere; quod et fastidientibus prolixitatem, propter subiectam oculis formam, animi sit oblectatio et a studiosis facile possint pre oculis habita memorie commendari et omnibus legentibus utilitas conferri; in quo quidem non facilem laborem immo negotium plenum uigiliarum assumpsi, cum breuitate secundum datam formam ita studui ut nichil de ueritate hystorie detruncarem sed, ab adam inchoans per patriarchas, iudices, reges, prophetas et sacerdotes eis contemporaneos usque ad christum, finem nostrum, ordinem perduxi.

Adam in agro damasceno formatus et in paradysum unde quatuor flumina oriuntur translatus, cum, femine de costa dormientis facte nomine sicut et ceteris rebus imposito, de christo et ecclesia prophetasset et eidem de comedendo pomo acquieuisset, pro disconuenientia nuditatis factis perizomatibus, a domino de paradyso collocatis cherubym et flammeo gladio post increpationem abiectus, de terra maledicta in sudore uultus panem acquirit.

Cain agricola, dolens sua munera et non fratris fuisse reprobata, licet a domino increpatus, fratrem septiformi peccato interfecit; postea uagus et instabilis super terram factus, postquam a domino est maledictus.

Istum seth genuit adam .ccxxx^o. anno etatis sue, quorum tamen .c. pretermittit moyses, quibus adam luxit abel.

Iste lamech, primus introducens bigamiam, cum uirum in uulnus et adolescentem in liuore occidisset, uxoribus ob hoc sibi penam in septuplum deberi predixit.

Iste enoch, placens deo, translatus est in paradysum; uiuit cum helia; qui, quibusdam litteris inuentis, librum etiam ut in epistula jude continetur scripsit, sub quo adam creditur mortuus.

Iste jabel, adinuentis portatilibus pastorum tentoriis, primus greges secundum qualitatem, genus et etatem distinxit.

Iste jubal, pater canentium in cythara et organo, idest musice artis inuentor, in columpna lateritia et altera marmorea contra incendium et diluuium sculpsit.

Iste tubal cain, ferrarie artis inuentor, sculpture operum in metallis fabricator, cuius malleorum sonitu jubal delectatus, proportiones ex eis prius perpendit.

Sexcentesimo anno uite sue, inundante diluuio, noe archam cum septem animabus intrauit, quam spatio annorum .c., loquente sibi domino .xx. annis prius, fecerat; et excrescentibus aquis super terram .cl. diebus, domino pluente .xl. diebus et noctibus, .xxvii^a. die septimi mensis cum stetisset archa super montes armenie, et post .xl. dies coruum emisisset et postea columbam ferentem ramum oliue, .xxvii^a. die secundi mensis egressus de archa, eadem scilicet die qua intrauerat anno reuoluto, cum .xvii^a. luna secundi mensis intrasset; et accepto sacrificio suo, cum concessionem carnis comedende sine sanguine suscepisset et in signum diluuii preteriti non futuri incendiique uenturi yris posita fuisset, uino, quod primus excoluerat, inebriatus et a cham irrisus, huic maledicens et reliquis filiis benedicens, obiit.

Post diluuium exorta sunt quatuor principalia regna: assyriorum ab oriente ubi primus regnauit belus, sycioniorum ab occidente ubi egialeus, scytharum ab aquilone ubi ninus, egyptiorum a meridie ubi nuneus; belo successit semiramis uxor sua, que babyloniam caput regni constituit, cui ninus, qui inuentor ydolorum fuit faciens ymaginem patri; tandem sardanapallus, a quo arbaces regnum ad medos transtulit, super quos tandem astiagies regnans, data filia sua principi persarum de quo cyrus ortus, ab eo est superatus; quo mortuo, regno ad persas translato, darius filius astiagis cum eodem cyro conregnauit.

Ab his tribus filiis noe texuntur generationes .lxxii.: .xu. de jafeth, .xxx. de cham, .xxuii. de sem, qui disseminati sunt per orbem; sem obtinuit asiam, cham affricam, jafeth europam; generationi sem tantum hic insistemus nam de aliis duobus fuerunt gentiles.

Ab isto heber dicti sunt hebrei uel ab abraham quasi abrahei.

Tempore huius phalec facta est linguarum diuisio in edificatione turris babel in agro sennaar; in cuius familia quia remansit hebrea lingua, omnium antiquissima, dictus est ipse phalec, idest ab aliis diuisus.

Iste thare, non ualens ferre iniurias sibi illatas de adorando igne in chaldea, ubi et filium suum primogenitum aram extinxerunt, peregrinatus est cum abraham et nachor et familia aram in charram mesopotamie, ubi, completis .ccu. annis, mortuus est.

Iste nachor, cum exisset de chaldea, ducta in uxorem melca filia fratris sui aram extincti, moratus in charram mesopotamie, mortuo ibi suo patre et abraham in terram chanaan peregrinante, hos tres fratres hus, buz, bathuel cum aliis quinque genuit; de quorum uno, scilicet buz, descendit balaam, qui secundum hebreos dicitur in job eliud buzites.

Abraham, suffocato aram, adoptans filium eius loth, ducta in uxorem sarai, cum patre peregrinatus est in charram; inde, mortuo patre, uenit in sychem et inde pentapolim; postea collocans tabernaculum inter bethel et ahy, cum in egypto uxorem simulasset sororem, rediens in conualle mambre habitauit, confederatus tribus fratribus, qui, cum de occisione quinque regum ueniens, a melchisedech decimas accipiente honoratus fuisset, signum dande prolis in pecudibus et auibus suscepit.

Iste loth, cum exisset de sodomis, submersis quinque ciuitatibus, genuit hos duos, moab et amon, de filiabus suis, ebrius factus.

Hanc cethuram abraham duxit in uxorem, mortua sara; quidam tamen dicunt eam fuisse agar, que de concubina facta est uxor, quod sonat interpretatio, nam cethura dicitur copulata.

Hanc rebeccam adduxit heliezer, seruus abrahe, ysaac de mesopotamia, sororem laban, filiam bathuelis.

Ysaac, cum laborante in partu rebecca et oraculum de esau seruituro jacob audiente, apud abimelech in geraris, cum uxorem dixisset sororem, de semine centuplum colligens, tribus puteis eruderatis et quarto facto in bersabee, ibidem federe inito cum abimelech et phicol, esau reprobato, jacob ignarus benedixit.

Hos duos cum aliis decem genuit ysmahel de uxore egyptia.

Esau, hispidus uenator, uenditis primogenitis a lenticula fulua, dictus edom, ductis uxoribus chananeis judith et bethsamath, supplantatus a fratre in benedictione, redeunti jacob de mesopotamia cum .cccc. uiris pacificus occurrit.

Jacob, fratre tum in primogenitura tum in benedictione supplantato, in mesopotamiam proficiens, cum prouisione iuxta luzam titulum erexisset et pro rachel et lya seruitium .xiiii. annorum laban complesset, pacto de aliis septem annis mutatione uirgarum uix completo, cum uxoribus et filiis undecim, a laban, furto sublatis ydolis a rachel, recedens, in galaad est comprehensus; inde cum laban federe inito in lapidibus ad manaym, ubi castra angelorum uidit, proficiens ordinatis turmis, uadum jaboc transiens, matutina lucta leso neruo cum angelo completa, mutatione nominis facta, premissis muneribus fratri suo, tremebundus occurrit; cuius filia dina a sychem oppressa et sychimitis in dolo occisis, iussu dei ipse in bethel altare erexit et domum purgauit; in effratha eo ueniente et rachel in partu bennoym expirante, cum trans turrim gregis tabernaculum fixisset, postea tempore famis in egyptum descendit, ubi a filio joseph honorifice susceptus, respondens pharaoni de etate, benedictis per ordinem filiis, uitam terminauit.

De juda descendit christus per hanc lineam inferius.

De filiis jacob numerosa proles descendit sed de leui et juda sufficiat, quia de his descendit christus.

Isti sunt duo filii joseph, quorum uterque facit tribum per se, remota tribu leui a sorte hereditatis.

Isti sunt filii jude de sue.

Iste job, ut tradunt quidam, fuit secundus rex post bale in edom, qui et in genesi dicitur jobab, pronepos esau, sed hebrei dicunt eum descendisse de hus, primogenito nachor.

Iste balaam, qui in job dicitur eliud, descendit de buz, qui, a balach conductus ut malediceret israel, ei benedixit, loquente prius sibi asina, et de ortu stelle et saluatoris prophetauit.

Istam thamar, cum dedisset judas duobus filiis, her et onam, et illi ob ignominiosum scelus perissent, remisit uiduam in domum paternam, timens eam tradere sela, quod fieri debebat secundum legem suscitandi seminis; de qua postea, sedente in biuio, mutato habitu, uadens judas, uxore sua sue mortua, cum yram opilione ad tondendas oues, phares et zaram ad unum concubitum genuit, suspicans esse scortum; que, postea ad patibulum ducta tamquam in adulterio deprehensa, per arrabonem anuli, baculi et armille se liberauit.

Duo filii caath, de altero tantum dicere sufficiat, quia de eo fuerunt sacerdotes.

Isti dathan et abiron, paucis mediantibus de ruben descendentes, ratione primogeniture pro moyse ducatum populi uolentes habere, propter seditionem quam mouerunt suggestione chore, absorti sunt.

Isti duo filii aaron perierunt igne diuino in deserto.

Iste chore litigauit contra aaron de sacerdotio, eo quod ipse fuerat de primogenito, scilicet ysuar, et ideo cum .ccl. igne diuino periit; dathan quoque et abiron tunc sunt absorti.

De eleazar fuerunt sacerdotes qui ponuntur in hac linea descendentes usque ad tempora christi secundum ordinem iudicum, regum et prophetarum.

Iste josue, moysi succedens in ducatum, loquente sibi domino, duobus exploratoribus missis in jericho de sethim, post septem dies jordanem siccis pedibus cum omni populo transiuit; .xii. lapides de alueo in siccum tulit, aliis .xii. de sicco in alueum reportatis; populum in galgala secunda circumcisione innouauit; ciuitatem jericho, septem diebus, clangentibus sacerdotibus bucinis in septimo septies, destruxit; achar, qui de anathemate regulam auream et clamidem coccineam tulerat, propter quod dominus iratus in ahy .xxxvi. uiros occiderat, lapidauit; ciuitatem ahy per insidias incendit; gabaonitas in seruos lignarios et aquarios recepit; quinque reges, qui obsederant gabaon, producto spatio diei sole et luna stantibus, peremit; .xxiiii. reges, qui erant cum jabin, interfecit; altari constructo in ebal, benedictiones et maledictiones acclamari fecit; terram aliis secundum concessionem, aliis secundum traditionem distribuit; duas tribus et dimidiam, que in reditu suo, post .xiiii. annos, altare iuxta tumulos jordanis construxerant, liberans dimisit; fedus a populo de colendo deo per aque effusionem initum in hoc uolumine scripsit.

Post mortem josue, ante othoniel, tradunt quidam fuisse factum quod legitur de ydolo miche et de uxore leuite.

Iste othoniel percussit cariath sepher unde habuit uxorem axam, que petiit irriguum superius cum irriguo inferiori.

Iste naason, egressus de egypto, princeps in tribu juda et ita uerum est quod dixit dominus ad abraham in genesi, quod quinta generatione exierunt filii israel de egypto, facta computatione secundum tribum regiam ut generationes uocemus non personas sed successiones; quod potes uidere computando a juda ad naason: nam quinquies dicitur ibi genuit; si uero in littera illa contineatur quarta generatione, in tribu sacerdotali sumendus est ordo computantibus a leui ad eleazar.

Iste aioth ambidexter fuit et, percusso eglon rege pingui, israel liberauit.

Iste sangar occidit .dc. uiros uomere uno.

Iste salmon in uxorem duxit raab meretricem, que recepit exploratores in jericho et abscondit in stipula lini supra murum et liberauit domum suam per filum coccineum positum in fenestra cum destrueretur jericho.

Ista delbora, uxor barach uel lapidoth, occiso sysara per jabel, uxorem aber cinei, dato poculo lactis, tandem jabin interfecit, cuius princeps fuit sysara, et canticum cecinit.

Iste gedeon, salutatus ab angelo cui supra petram carnes obtulit, ab ara baal destructa dictus jeroboal, suscepto signo in uellere, cum .ccc. aquam more canum lambentibus, laternis fractis et tubis clangentibus, quatuor reges oreb et zeb et zebee et salmana strauit.

Iste abimelech, filius jeroboal de concubina, in sychem factus rex super sychimitas, .lxx. fratres suos interfecit superstite jonathan, qui parabolam de oliua et ficu et uite et rampno sychimitis proposuit; eandem etiam sychem cum principe suo gaal per zebul destruxit et fragmine mole per manum mulieris in opido thesbe periit.

Hec figura ualet ad intelligendum quod dicitur in numeris de dispositione tribuum et leuitarum per quatuor climata circa tabernaculum; plus etiam ualet ad intelligendum difficilem transitum adamantii in josue, ubi ostenditur qui leuite quot ciuitates in quibus tribubus, sorte pro decimis, habitaculorum acceperunt.

Iste elimelech, tempore famis, cum uxore sua noemi de bethleem peregrinatus est in moab; ibi, acceptis uxoribus filiis suis, scilicet ruth et orpha, et mortuis filiis et patre, rediit noemi cum ruth moabitide, de qua booz genuit obeth, suscitans semen propinquo defuncto.

Iste jepthe, a filiis ut spurius abiectus, in regione tob commorans, postea super eos princeps factus, superatis ammonitis, uoto alligatus, filiam, post planctum uirginitatis .lx. dierum, immolauit; .xlii. milia de effraym, per sethboleth et thesboleth diiudicans, ad uada jordanis trucidauit.

Ab isto ozi translatum est sacerdotium de eleazar ad heli, qui fuit de ythamar, et priuati sunt sacerdotio hii quatuor exteriores.

Iste abiel, per multas successiones quas superfluum fuisset hic ponere, descendit de beniamin, de cuius filio cys natus est saul rex, cuius cys frater fuit ner; in paralipomenon tamen legitur quod fuit eius pater.

Iste samson, natus manue, cui natiuitas eius per angelum predicta, nazareus, uxore ducta in thampnatha, parabola de leone conuiuis proposita et per dolum mulieris soluta, cum segetes hostium ligatis uulpibus incendisset et mille uiros mandibula asini, aquam dante in ramoth lesbi, trucidasset et portas gaze in montem tulisset, tandem dolo dalile, rasis crinibus, a philisteis excecatus, mole deputatus, in templo dagon, renascentibus capillis, plures strauit mortuus quam uiuus.

Iste heli, sacerdos et iudex, in arguendis filiis tepidus et ideo a domino reprobatus, cum samuelem sibi oblatum nutrisset, audita strage filiorum et archa a philisteis capta, de sella cadens, fractis ceruicibus, expirauit.

Iste helcana de ysuar per chore descendit et duas habuit uxores, fenennam fecundam et annam sterilem, que, uotum faciens de masculo si deus daret quod faceret nazareum, peperit samuelem, quem obtulit heli in sylo.

Iste samuel, iudex et propheta, cum liberasset filios israel a philisteis per agnum immolatum, in lapide adiutorii in terminis posito, ad petitionem israel, saulem sibi a domino missum in regem inunxit, tribus signis confirmans unctionem, preceptum ei dans quod quia postea transgressus est; reprobatus a domino, in tantis angustiis est positus, ut samuelem mortuum magica arte suscitaret per phitonissam; hic etiam postea dauid regem inunxit.

Saul, diu quesitis asinabus patris sui, a samuele, quem consulebat in egressu ramatha, lenticula olei unctus, tria signa, in sepulcro rachel, in quercu thabor, in cuneo prophetarum inter quos psallebat, accipiens, in masphath iterum sortibus temperatis electus est et inunctus; qui, diuisis in frusta bobus, cum jabitas a naas liberasset, signum ire dei in tonitruo samuele inuocante audiuit; qui, non expectato septem diebus samuele, sacrificans et ideo ab eo redargutus fuit; sine ense et lancea, prereptante jonatha cum armigero, philisteos territos strauit et jonathan, qui fauum contra maledictum comedit, uix a se eripi sustinuit, quem dominus, quia agag amalechite pepercerat licet eum samuel lugeret, electo dauid, reprobauit.

Dauid, minimus fratrum, in regem electus a domino per samuelem et inunctus in bethleem in signum regis, postea in ebron in regem super tribum juda septem annis et sex mensibus, tertio super totum israel .xxxiii. annis, saulem psallendo mitigans, morte golie, animam jonathe sibi conglutinans, gener regis factus, cuius inuidia ob laudem uirginum erga se suscitata, cum eius cautelam .c. preputia dando frustrasset, ictum lancee dum psalleret insidiasque satellitum astucia micol statuam in lecto ponentis euasit; saulem cum lictoribus in nabaioth prophetantem, beneficio samuelis illesus, uidit; jonathe exercenti se sagittis fedus iurauit; in nobe panes sacerdotales comedit; simulato furore apud achis, recepto abiathar, solo de sacerdotibus a doech peremptis erepto, ceila liberauit; in cyph a manu saul irruentibus philisteis liberatus, eiusdem postea persequentis oram clamidis precidit; nabal stulto mortuo, abigail duxit; hastam et uas aque de capite saulis persequentis clam tulit; ab achis in sychelech rediens, amalechitas percussit; nuntium mortuis saulis occidens, carmen lugubre plangens, mortuo hisboseth, solus regnans, de jerusalem jebuseum eiecit et a mello edificauit; stratis philisteis in baal pharasim, archa in jerusalem reducta, a micol irrisus, promissa prole, domum domino prohibitus edificare, moab funiculis metiens, percussit philisteos et ydumeos in ualle salinarum; officiales dignitates distribuit; uriam manu ammonitarum occidit; absalon prius sibi reconciliatum postea se persequentem fugit; quo perempto et achitophel suspenso, jerusalem rediit; populo numerato, iram dei sibi acciuit; uncto salomone, dato ei de uindicta hostium precepto, obiit.

Hic redit sacerdotium ad eleazar tempore salomonis, qui, abiecto abiathar, qui fuit de ythamar, restituit sadoch de eleazar.

Salomon, occiso joab et semei et adonia, accepta a deo post immolationem sapientia et in iudicio de meretricibus cognita, templum ope yram condidit; septem annis et totidem mensibus, decima die septembris consecrauit; domum saltus cum domo regia fecit; reginam saba honorifice suscepit; precedentem uitam amore mulierum et cultu ydolorum maculauit.

Iste nathan non fuit nathan propheta, quem, mortuo patre, adoptauit dauid in filium.

Iste joab fuit princeps militie dauid.

Hii tres fuerunt nepotes dauid.

Iste amasa fuit princeps militie dauid, quem occidit joab in dolo.

Iste roboam, spreto seniorum consilio pro adolescentum temeritate sua, conturbans populum, duas tribus cum leuitica retinuit et dictum est regnum illud juda; qui, peccatis suis exigentibus, impetum susac regis egypti infestantis eum sustinuit, qui pro scutis aureis sublatis scuta erea substituit.

In hac linea a dextera parte ponuntur reges juda regnantes super duas tribus, quorum fuit primus roboam, nam tres reges superiores, saul et dauid et salomon, uniuerso israeli prefuerunt; ponuntur etiam prophete eis contemporanei ex opposito contra ipsos.

Iste jeroboam decem scissuras pallii ab achia sylonite accipiens et in egyptum fugiens, mortuo salomone, in sychem a decem tribubus electus in regem, uitulos conflatiles in dan et bethel posuit, qui, comminatione abdo prophete audita, manu arefacta et sanata, altari quoque scisso et propheta abdo a leone ob conuiuium falsi prophete occiso, ad eius persuasionem uias prauas non deserens, achiam sylonitem per uxorem de salute pueri consulens, triste nuntium sue desolationis audiens, obiit.

Hec sunt nomina regum qui post salomonem regnauerunt super israel, idest super decem tribus, a primo jeroboam , qui regnauit contra roboam, usque ad osee, sub quo captiuate sunt decem tribus a salmanasar, rege assyriorum, qui posuit eas iuxta fluuium gozam ultra montes medorum et persarum, idest ultra caspios montes; legitur in hystoria alexandri macedonis quod in eodem loco duas gentes inmundas, gog et magog, inclusit alexander, ne tota terra ab eis contaminaretur; hos autem antichristus liberabit et inde educet, et hunc judei expectant et credunt esse messiam.

Iste nadab, obsidens jebeton, urbem philistinorum, occisus est a baasa.

Iste baasa, licet correctus a jehu propheta, cum contra asa edificasset rama, impeditus per bennadab, mortuus est.

Iste asa, munitis gabaa et masphat ciuitatibus de lapidibus et lignis que collegerat baasa in rama, redargutus a jehu quia spem in bennadab posuerat, dolore pedum, quem intulerat prophete ponendo eum in neruum, obiit.

Iste hela, temulentus, a zamri est interfectus, qui, obsessus ab amri, succensus est in thersa.