Religionsdissens, Friedlosigkeit und Medienwandel im Reich und in Frankreich in der Mitte des 16. Jahrhunderts - die Druckmedien

Anonym:

HJe mit hastu lieber Teutscher dz vnder aim erdichten schein der straaff etlicher vngehorsamer Chur vnd Fürsten die doch kainer vngehorsam halb nie angesprochen vil weniger vberwunden Ja nit verhert seind worden vnser ware Religion außgereüttet das reych Teütscher nation inn ain ewige dienstbarkayt vnnd also vnser vatterland umnb leyb leben Eer guot und als vil an den Feynden und anfahern dises Tyrannischen fürnemens gelegen auch umb die seel hat sollen gebracht werden sihe vnd merck wie feyn ains auff das ander gang. Erstlich bedenck des Bapsts schreyben an die Eydgenossen darnach die Pündtnuß die er mit dem Kayser Carolo der Religion halben gemacht wiewols der Kayser kayn Religion sach nennet und also listiger weyß uns etliche die jme wie er gesorgt wider die Religion nit mit eeren hetten dienen künden abstrecken hatt wöllen Zum dritten so merck auff des Bapsts Bull vnd Ablas und zum letzsten solt due wisen so es alles nit geradtenwolt der Bapst durch sein anhang die sach gern mit Gifft und boese Moerderey wie wir gründtlich wissen außrichten Liß und thuo die augen auff bit Gott das er seyn Wort und das gemayn Vatterland vor solchem verderben erretten umb die Babylonischen Huorn mit jren helffern vnnd helffers helffern vnd also den vnuerschempten grewlichen betrug auß reütten woelle. Alles inn Teütscher und Welscher sprach gedruckt damit alle Nationes vor diser meyterey gewarnet seyen Zuo letst ist hin zuogethon die Condemnation vnd Pann wider den Christlichen Churfürsten und Ertzbischoff von Cölln der doch weder Kayser noch Bapst sein leben lang nit anderst hat erzürnet oder betrübt dann allayn das er die Lug an stat der waarhait den Antechrist an stat Christi nit hat woellen lassen regiern inn seineu sic Kirchen und bey seinen undertthonen. Rubrum Liß und erwigs wol ob nit anßtilgung sic der Religion Christi und aygenthuomblichs undertrucken und verderben der Teütschen Nation gesuocht werde.

[Augsburg],1546