Item In dem Sumer heb ich an vnd lass dann In dem winter dauon Wir woellen vnd suellen betrachten vmb froemde gemuesz die werden In dem winter guot So tracht das du siben farb habest So magstu mit eren wol bestan schwarcz guot plab muostu han Gell weiss rot praunn kuend wir das zue samen pringen wann du die farb wild vinden plab koren pluemen muost du haben Die nym In dem sumer abe vnd solt die derren In ainem ofen der sol nicht zue haiss sein vnd stoess sie gar schon vnd behalt sy zue lon Gruen lass vnns nit vergessen ob der petersill waer verganngen . So hab wir gruen waiczein sanngen oder Saffran Da wirt es gell von Die rott prawn varb geet von weichseln zue wann die zeittig werden die soltu ab den stinglein prechen Schlahe sy durch ain sib vnd lass sy durch sieden vnncz das sy die keren lassen vnd den dritten tayl nym hoenig darein So soltu sy sieden lassen wann es dan gesoten ist So lass es dann kalt werden wiltu es bewaren So thue es In ainen hafen der Innen verglast sey Daran pistu der farbe frey So machtu die behalten ain ganncz Iar das sy die varb nit verlieren Das soltu bedenncken schon Das der tunst nicht gee dauon .