Urkundenbuch des Herzogtums Steiermark

G[erlaus]^a dei gracia abbas in Rvͤna^b vocatus omnibus cuiuscumque dignitatis, condicionis, professionis fidelibus. Illuminatos fidei oculos more publico utentes, rem memoria dignam in presenciarum scripto mandamus, ut ex hoc fidei ac devocionis incitamentum generacioni omni, que ventura est, transmittamus. Duo siquidem nobiles viri, fratres Vͦdelricus videlicet et Cholo de Wilheringen, etsi seculi actibus impliciti, seculo tamen renunciancium meritis aliquatenus participari exoptantes annuente matre sua nobili matrona nomine Ottilia itemque sorore sua Elysabeth nomine pro peccatorum suorum remissione et eterna animarum absolucione aliquam patrimonii sui partem, id est castrum ipsum iam ante nominatum Wilheringen cum coadiacentibus circumquaque terminis cultis et incultis, quesitis et inquirendis, cum agris, vineis, pascuis, silvis, pratis, piscaturis, aquis aquarumque decursibus, cum omni denique utilitate, que predio illo vel ad presens inerat vel in posterum industria quavis elici poterat, deo et beate semper virgini Marie offerendo delegantes nostre manui vice Christi tali pacto contradidere, quatenus eundem locum in abbaciam Cysterciensis discipline regulariter ordinantes, abbatem ibi monachorumque conventum ex nostro, id est Rvͦnensi cenobio statueremus et eandem deinceps ecclesiam velut ex corpore Rvͦnensis ecclesie propagatam loco filie a nobis ac succesoribus nostris paterna pietate fovendam atque ad regularis tramitem conversacionis magistrali providencia dirigendam contineremus. Cum igitur consilio et hortatu simulque auxilio reverendi patris nostri domni Ade Eberacensis abbatis nobi­lium personarum votive peticioni annuissemus ac iuxta Cysterciensis ordinis tenorem circa locum omnia rite disposuissemus, unus fundatorum, domnus scilicet Oͮdalricus, vita decessit fratre suo Cholone^c superstite, qui et ipse cum postmodum egrotans decumberet, tam sue quam fraterne salutis nec non et uxoris defuncte memor loci possessionem ampliare curavit. Nos itaque dubios eventus formidantes et pro filiorum quiete curam gerentes una cum sepedicto Cholone^d fundatore consilium habuimus locum ipsum alicui ecclesiastice dignitatis persone committere, cui videlicet et auctoritas adesset ad protegendum in adversitate et larga benignitas inesset ad supplendam temporalium subsidiorum defeccionem. In utramque ergo hanc rem ex omnibus, que^e animo occurrebant, pari voto eademque sentencia nobis complacuit Babenbergensis kathedre sessorem eligere, ipsius advocacie ac tuicioni monasterium illud cum omnibus cuiuscumque modi possessionibus vel tunc temporis^f illo pertinentibus vel in posterum iusto quolibet modo eidem accendentibus, quas vel liberi fundatores libere omnimodaque libertate possidendas tradiderant seu fideles quique ex devocione contulerant, ad integrum commendare. Huius sane tradicionis nostre susceptor ac spei fautor benignusque promissor venerandus Babenbergensis ecclesie presul domnus Eberhardus extitit, quo die eciam filiam eiusdem Cholonis infantulam patre commendante suscepit. Ut ergo facti huius veritas cunctis in futurum temporibus illibata permaneat, paginam hanc de hoc conscribi ac sigilli nostri fecimus inpressione muniri testesque ascitos in utriusque dati confirmacione propriis nominibus annotari: Fridreich de Hunesberg et alii quam plures. Acta sunt hec [anno]^g incarnacionis dominice Mº Cº XºLVIº, indictione VIIIª^h, apostolice sedis pontificante Evgenio papa, regnante domno Chvnrado Romanorum rege IIº.